អន្តរជាតិ
រូបភាពតំណាង
×![]()
ប្រទេស ទីម័រខាងកើត នៅថ្ងៃសុក្រទី ៣០ សីហា ឆ្នាំ២០១៩ បានប្រារព្ធខួប២០ឆ្នាំ ចាប់តាំងពីបោះឆ្នោតបញ្ចប់គាំទ្រដោយអង្គការសហប្រជាជាតិក្នុងគោលដៅផ្តាច់ខ្លួនចេញពីការកាន់កាប់រាប់ទសវត្សរ៍ពីសំណាក់កងកម្លាំងឥណ្ឌូណេស៊ី។ ការបោះឆ្នោតជាប្រវត្តិសាស្ត្រនេះហើយ បានត្រួសត្រាយផ្លូវឆ្ពោះទៅក្លាយជាប្រជាជាតិឯករាជ្យពេញលេញមួយ។ 
បដានិងទង់ជាតិ ត្រូវគេដោតជានិមត្តិសញ្ញានៅពាសពេញរដ្ឋធានី ឌីលី នៃប្រទេសទីម័រខាងកើត ខណៈប្រជាជននាំគ្នាជួបជុំគ្នាអបអរសាទរព្រឹត្តិការណ៍ជាប្រវត្តិសាស្ត្រនេះ។ ពោលគឺ ២ ទសវត្សរ៍ក្រោយពីប្រជាជាតិដែលមានប្រជាជនរស់នៅត្រឹមតែជាង ១,៣លាននាក់ (២០១៧) បានឃើញដំណើរផ្លាស់ទៅរកប្រជាធិបតេយ្យប្រកបដោយស្ថិរភាព។ ក្នុងពិធីផ្លូវការនៅថ្ងៃសុក្រនេះ ក៏មានការចូលរួមពីនាយករដ្ឋមន្ត្រីអូស្ត្រាលី Scott Morrison ផងដែរ។
រឿងរ៉ាវនៃព្រឹត្តិការណ៍ប្រវត្តិសាស្ត្រខាងលើ បានកើតឡើងបែបនេះ។ នៅថ្ងៃទី ៣០ សីហា ឆ្នាំ១៩៩៩ ប្រជាជនទីម័រខាងកើតជិត ៨០ភាគរយ បានបោះឆ្នោតផ្តាច់ខ្លួនចេញពីប្រទេសក្បែរខាង ឥណ្ឌូណេស៊ី ដែលបានឈ្លានពានអតីតម្ចាស់អាណានិគមព័រទុយហ្គាល់ ក្នុងឆ្នាំ១៩៧៥។ ហើយ ក្រោយមកខ្លួន បានចាប់ផ្តើមចូលកាន់កាប់ប្រទេសទីម័រខាងកើតយ៉ាងឃោរឃៅបំផុត អស់រយៈពេល ២៤ឆ្នាំ។ ក្នុងរយៈពេលនេះ គេប៉ាន់ស្មានថា ជីវិតមនុស្សជាង ២៥ម៉ឺននាក់ បានបាត់បង់ ដោយសារការប្រយុទ្ធគ្នា ជំងឺ និងដាច់ពោះស្លាប់។
ភាពជោគជ័យនៃការបោះឆ្នោតនេះ បានប្រែក្លាយជាថ្លុកឈាម ក្រោយពីកងកម្លាំងសន្តិសុខឥណ្ឌូណេស៊ី បានបើកយុទ្ធនាការបង្ក្រាបយ៉ាងព្រៃផ្សៃបំផុតលើប្រជាជនទីម័រខាងកើត។ ពួកគេ បានបំផ្លិចបំផ្លាញហេដ្ឋារចនាសម្ព័ន្ធ និងបង្ខំឲ្យប្រជាជនរាប់ម៉ឺននាក់ភៀសខ្លួនទៅកាន់ទីម័រខាងលិច ដែលជាទឹកដីឥណ្ឌូណេស៊ី។ មនុស្សប្រមាណ ១៤០០នាក់ បានស្លាប់ក្នុងហេតុការណ៍នេះ។
ជាចុងក្រោយ ទីម័រខាងកើត ដែលមានប្រជាជនភាគច្រើនកាន់សាសនាកាតូលិក ត្រូវបានទទួលស្គាល់ជាលក្ខណៈអន្តរជាតិ ជាប្រជាជាតិឯករាជ្យមួយក្នុងតំបន់អាស៊ីអាគ្នេយ៍ នៅថ្ងៃទី ២០ ខែឧសភា ឆ្នាំ២០០២ ៕
Tag:
ទីម័រខាងត្បូង
ឥណ្ឌូណេស៊ី
ឯករាជ្យ
UN
© រក្សាសិទ្ធិដោយ thmeythmey.com
