អន្តរជាតិ
ប្រមុខការទូតចិន នឹងធ្វើទស្សនកិច្ចទៅកូរ៉េខាងជើង
× បើគ្មានអ្វីប្រែប្រួលទេ ប្រមុខការទូតចិនលោក វ៉ាង យី នឹងធ្វើទស្សនកិច្ចទៅកូរ៉េខាងជើងនៅសប្តាហ៍ក្រោយ។ ដំណើរទស្សនកិច្ចនេះអាចជាការរៀបចំដើម្បីត្រៀមទទួលដំណើរទស្សនកិច្ចរបស់ប្រមុខដឹកនាំកូរ៉េខាងជើង គីម ជុងអ៊ុន ដែលជាទស្សនៈកិច្ចនៅចិនជាលើកទី៥ ខណៈពេលភាពតានតឹងនៅក្នុងឧបទ្វីបកូរ៉េកំពុងតែកើនកម្តៅ។
តាមរយៈសំណើរអញ្ជើញពីសមភាគីកូរ៉េខាងជើងលោក រី យ៉ុងហូ(Ri Yong-ho) លោករដ្ឋមន្ត្រីការបរទេសចិន វ៉ាង យី នឹងធ្វើទស្សនកិច្ចទៅកូរ៉េខាងជើងចាប់ទីថ្ងៃទី ២ ដល់ថ្ងៃទី៤ ខែកញ្ញា ខាងមុខនេះ។
បើតាមការអះអាងរបស់លោក Geng Shuang ការធ្វើដំណើរទស្សនៈកិច្ចរបស់លោក វ៉ាង យីលើកនេះគឺធ្វើឡើងតាមការព្រមព្រៀងរបស់ប្រទេសទាំងពីរ និងដើម្បីលើកកម្ពស់ការអភិវឌ្ឍទ្វេភាគី។ ជាពិសេសចិនក៏ចង់មានតួរនាទីកសាងសន្តិភាព ស្ថិតភាពក្នុងតំបន់ និងការរំសាយអាវុធនុយក្លេអ៊ែររបស់កូរ៉េខាងជើងដែរ។
ការធ្វើដំណើរទស្សនកិច្ចរបស់លោក វ៉ាង យី គឺដើម្បីរក្សាឥទ្ធិពលរបស់ចិន នៅក្នុងឧបទ្វីបកូរ៉េ។ នេះជាសម្តីរបស់លោកសាស្ត្រាចារ្យ Ryo Hinata-Yamaguchi នៅសកលវិទ្យាល័យ Pusan National នៅកូរ៉េខាងត្បូង។ លោកសាស្ត្រាចារ្យរូបនេះបានលើកឡើងថា ទីក្រុងប៉េកាំងចង់រក្សាឥទ្ធិពលរបស់ខ្លួននៅក្នុងតំបន់ ខណៈពេលកូរ៉េខាងជើងចង់ស្វែងរកកិច្ចសហប្រតិបត្តិការលើបញ្ហាសេដ្ឋកិច្ច និងសុវត្ថិភាពនៅក្នុងប្រទេស។
ជាការពិត ដំណើរទស្សនកិច្ចរបស់ប្រមុខការទូតចិនរូបនេះ គឺធ្វើឡើងក្រោយទីក្រុងព្យុងយ៉ាងបានធ្វើការសាកល្បងអាវុធនុយក្លេអ៊ែរ តែរយៈពេលមួយសប្តាណ៍តែប៉ុណ្ណោះ ហើយជំនួបរវាងលោក វ៉ាង និងលោក រី ក៏ត្រូវគេរំពឹងថានឹងពិភាក្សាពីបញ្ហាមួយចំនួនទាក់ទងនឹងការរំសាយអាវុធនុយក្លេអ៊ែរដែរ។
បើតាមការចុះផ្សាយរបស់សារព័ត៌មាន South China Morning Post បានសរសេរថា ក្រោយពីជំនួបរបស់ប្រមុខការទូតចិន មេដឹកនាំកូរ៉េខាងជើង នឹងធ្វើទស្សនៈកិច្ចផ្លូវរដ្ឋទៅចិនវិញម្តង។ ការមកប្រទេសចិនលើកនេះ គឺជាលើកទី៥ហើយរបស់លោក គីម ជុងអ៊ុន បន្ទាប់ពីម្តងកាលពីខែមករា ឆ្នាំ២០១៩ និងបីដង ក្នុងឆ្នាំ២០១៨។ មែនទែនទៅ វាមិនមានអ្វីចម្លែកទេ ដែលមេដឹកនាំកូរ៉េរូបនេះ ធ្វើទស្សនៈកិច្ចទៅចិន គឺក្នុងគោលបំណងពិភាក្សាពីបញ្ហាសេដ្ឋកិច្ច និងសន្តិសុខជាមួយមេដឹកនាំលោក ស៊ី ជិនភីង។
សូមបញ្ជាក់ថា ការធ្វើទស្សកិច្ចរបស់ប្រមុខការទូតចិន លើកនេះ គឺមិនបានផ្តល់របៀបវារៈនៅក្នុងជំនួបប្រជុំឡើយ តែអ្នកនាំពាក្យចិនថា នឹងផ្តល់ព័ត៌មានឲ្យតាមក្រោយ។ ម្យ៉ាងវិញទៀត ជំនួបរវាងប្រមុខការទូតចិន និង ប្រមុខការទូតកូរ៉េខាងជើងរូបនេះ គឺស្របពេលភាពតានតឹងរវាងចិន និងអាមេរិកកំពុងកើនឡើងកម្ពៅជាពិសេស គឺការសាកល្បងមីស៊ីលបាលីស្ទិកកចម្ងាយខ្លីរបស់កូរ៉េខាងជើង៕
© រក្សាសិទ្ធិដោយ thmeythmey.com