ជាតិ
សង្គមជាតិ
សេដ្ឋកិច្ច
ពន្ធដារ នឹងប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់ចលនទ្រព្យក្នុងរង្វង់សាច់ញាតិ នៅពេលម្ចាស់ដីបំពេញកាតព្វកិច្ចពន្ធរួច
× ភ្នំពេញ៖ អគ្គនាយកដ្ឋានពន្ធដារ បានអះអាងថា ម្ចាស់អចលនទ្រព្យ នៅតែទទួលបានការលើកលែង(ប្រាក់ពន្ធសូន្យរៀល) ឬការអនុគ្រោះពន្ធ ប្រថាប់ត្រាចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យក្នុងសាច់ញាតិ តាមច្បាប់ដដែល ប៉ុន្តែម្ចាស់អចលនទ្រព្យត្រូវបំពេញកាតព្វកិច្ចពន្ធឲ្យរួចរាល់ជាមុនសិន។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចុះថ្ងៃទី ២៧ សីហា។
បើតាមអគ្គនាយកពន្ធដារ កាតព្វកិច្ចដែលម្ចាស់អចលនទ្រព្យត្រូវបំពេញ រួមមានពន្ធលើអចលនទ្រព្យ និងពន្ធលើដីធ្លីដែលមិនបានប្រើប្រាស់ ឬទូទាត់បំណុលពន្ធជាមុនសិន ទើបក្រសួងប្រថាប់ត្រាផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យក្នុងរង្វង់ញាតិជូនបាន។
តាមប្រកាសព័ត៌មានដដែល អគ្គនាយកដ្ឋានពន្ធដារ បានស្នើដល់ម្ចាស់អចលនទ្រព្យទាំងអស់ ត្រូវបំពេញកាតព្វកិច្ចចុះបញ្ជី និងដាក់លិខិតប្រកាសបង់ពន្ធជារៀងរាល់ឆ្នាំ នូវពន្ធទាំងពីរប្រភេទទៀត គឺពន្ធលើអចលនទ្រព្យ និងពន្ធលើដីធ្លីដែលមិនបានប្រើប្រាស់ឲ្យបានត្រឹមត្រូវ និងទាន់ពេលវេលា បើអចលនទ្រព្យនោះត្រូវជាប់កាតព្វកិច្ចបង់ពន្ធ។ ក្នុងករណីម្ចាស់អចលនទ្រព្យ ខកខានដាក់លិខិតប្រកាសពន្ធនេះកន្លងមក នោះនីតិវិធីនៃការពិនិត្យចំពោះការលើកលែងពន្ធ នឹងត្រូវចំណាយពេលយូរ។ លើសពីនេះ អចលនទ្រព្យនោះ នឹងតម្រូវកំណត់ឲ្យបង់ពន្ធ ពន្ធបន្ថែម និងការប្រាក់ ក្នុងពេលជាមួយគ្នានឹងការស្នើសុំប្រកាសបង់ពន្ធប្រថាប់ត្រាតែម្តង។ ចំពោះអចលនទ្រព្យដែលជាកម្មសិទ្ធរបស់នីតិបុគ្គល(ក្រុមហ៊ុន) ក៏មានការពិនិត្យបំណុលពន្ធដទៃទៀតដែរ ហើយបើក្រុមហ៊ុនមានជំពាក់បំណុលពន្ធ នឹងតម្រូវឲ្យបង់ពន្ធទាំងនោះសិន ទើបពន្ធដារ អាចប្រថាប់ត្រាជូនបាន។
ពលរដ្ឋដែលចង់ផ្ទេរទ្រព្យសម្បត្តិទៅសាច់ញាតិណាម្នាក់ នឹងទទួលបានការលើកលែងពន្ធ ឬអនុគ្រោះពន្ធ ដូចដែលមានចែងក្នុងប្រការ៥ ដែលចុះថ្ងៃទី២៦ ខែមេសា ឆ្នាំ២០១៧ របស់ក្រសួងសេដ្ឋកិច្ច និងហរិញ្ញវត្ថុ ស្តីពីការប្រមូលពន្ធប្រថាប់ត្រា។ បើតាមសេចក្តីប្រកាសព័ត៌មានរបស់ដដែល
បើតាមប្រកាសព័ត៌មានដដែល ការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យក្នុងរង្វង់សាច់ញាតិ គឺនឹងធ្វើទៅលើការធ្វើសន្តតិកម្ម ដែលផ្ទេរអចលនទ្រព្យពីមនុស្សស្លាប់ទៅមនុស្សរស់ក្នុងរង្វង់ញាតិ និងការធ្វើប្រទានកម្ម ដែលជាការផ្ទេអចលនទ្រព្យពីមនុស្សរស់ទៅមនុស្សរស់ក្នុងរង្វង់ញាតិ រវាងឪពុកម្តាយបង្កើត និងកូនបង្កើត រវាងប្តីនិងប្រពន្ធ រវាងយាយតាបង្កើតនិងចៅបង្កើត,ពីឪពុកម្តាយទៅកូនបង្កើត និងកូនប្រសារ ដែលជាសហព័ទ្ធរបស់កូនបង្កើតនោះដើម្បីជាទ្រព្យរួមក្នុងអំឡុងពេលអាពាហ៍ពិពាហ៍។
អគ្គនាយកដ្ឋានពន្ធដារ ក៏ផ្តល់ការអនុគ្រោះពន្ធទៅលើកិច្ចការផ្ទេរសិទ្ធិ ឬសិទ្ធិកាន់កាប់អចលនទ្រព្យរវាងឪពុកម្តាយក្មេក និងកូនប្រសារ និងរវាងបងប្អូនបង្កើត និងបងប្អូនបង្កើត ដែលត្រូវបានដកចេញនូវមូលដ្ឋានគិតពន្ធប្រថាប់ត្រា ២០០លានរៀល ចំពោះការធ្វើសន្តតិកម្ម និង១០០លានរៀល ចំពោះការធ្វើប្រទានកម្ម៕
Tag:
ពន្ធ
ញាតិ
ក្រសួងសេដ្ឋកិច្ច
© រក្សាសិទ្ធិដោយ thmeythmey.com