សៀវភៅ៣០០ក្បាល បានផ្លាស់ប្តូរជីវិតអតីតក្មេងសុំទាន ប៊ួ បញ្ញា ឲ្យមានចំណេះនិងជីវភាពធូរធារ

ជាតិ

វីដេអូ

សៀវភៅ៣០០ក្បាល បានផ្លាស់ប្តូរជីវិតអតីតក្មេងសុំទាន ប៊ួ បញ្ញា ឲ្យមានចំណេះនិងជីវភាពធូរធារ

31, Aug 2019 , 6:29 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ «សៀវភៅមានតម្លៃណាស់ សម្រាប់ជីវិតខ្ញុំ។ ខ្ញុំហ៊ាននិយាយថា សៀវភៅ គឺជាទ្រព្យ, ជាលុយ, ជាគ្រូ, ជាមិត្ត, និងទីប្រឹក្សាដ៏ល្អសម្រាប់ខ្ញុំ។ ជីវិតខ្ញុំ បើគ្មានសៀវភៅទេ ខ្ញុំប្រាកដជាលំបាកបន្តិចហើយ ក្នុងការកសាងជីវិត, រកលុយ និងធ្វើឲ្យជីវភាពប្រសើរ»។ នេះជាការអះអាងរបស់លោក ប៊ួ បញ្ញា នៅក្នុងបទសម្ភាសជាមួយសារព័ត៌មានថ្មីៗ។ សៀវភៅប្រមាណ៣០០ក្បាល ដែលលោក បញ្ញា បានចំណាយប្រាក់ជាច្រើនទិញនោះ បានកែប្រែជីវិតរបស់លោកឲ្យក្លាយជាបុគ្គលមានចំណេះដឹងទូលំទូលាយ និងមានជីវិភាពធូរធារតាមការប្រើចំណេះដឹងទាំងនោះទៅធ្វើការងារ និងប្រកមុខរបររកស៊ីបន្ថែម។

ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com ជាមួយលោក ប៊ួ បញ្ញា សាស្ត្រាចារ្យភាសាបារាំង នៃវិទ្យាស្ថានបច្ចេកវិទ្យាកម្ពុជា (តិចណូ)ដូចតទៅ៖

កើតនៅជំរំសាយធូព្រំដែនខ្មែរ-ថៃ ក្នុងស្ថានភាពគ្រួសារក្រីក្រ និងធ្លាប់ដើរសុំទានជាមួយឪពុក នៅខេត្តសៀមរាប និងបន្ទាយមានជ័យ លោក ប៊ួ បញ្ញា មិនភ្លេចការសិក្សាឡើយ ហើយរូបលោកចូលចិត្តអានសៀវភៅតាំងពីកុមារភាពមកម្ល៉េះ។ ការស្រឡាញ់ការសិក្សា និងការអានសៀវភៅនេះ ក៏ព្រោះតែមានឪពុកដែលឲ្យតម្លៃលើការអប់រំ ជាអ្នកជំរុញលើកទឹកចិត្តផងដែរ។

អត្ថបទទាក់ទង

លោក ប៊ួ បញ្ញា៖ «និពន្ធសៀវភៅស្នេហា មិនចង់ឲ្យយុវជនក្លាយជាជនរងគ្រោះព្រោះស្នេហ៍»

ពីក្មេងសុំទាន លោក ប៊ួ បញ្ញា តស៊ូរៀនរហូតក្លាយជាសាស្ត្រាចារ្យភាសាបារាំង នៅសាលាតិចណូ

«ខ្ញុំគិតថាសៀវភៅដើរតួសំខាន់មែនទែន ក្នុងការកែប្រែជីវិតរបស់ខ្ញុំ។ អ្វីដែលខ្ញុំរៀនសូត្រនៅសាលា មិនទាន់គ្រប់គ្រាន់សម្រាប់ខ្ញុំនោះទេ។ ខ្ញុំឆ្លៀតពេលទំនេរថ្ងៃចុងសប្ដាហ៍សម្រាប់អានសៀវភៅ។ តាមរយៈអានសៀវភៅនេះ ធ្វើឲ្យខ្ញុំទទួលបានចំណេះដឹងថ្មីៗជាច្រើន ហើយខ្ញុំបានស្រូបយកចំណេះដឹងទាំងនោះ ដែលអាចឲ្យខ្ញុំដឹងច្រើនពីប្រទេសកម្ពុជា បញ្ហាក្នុងតំបន់ និងបញ្ហាពិភពលោក»។ នេះបើតាមលោក បញ្ញា ដែលតម្លៃនៃសៀវភៅមួយក្បាលៗ បានជួយកែប្រែជីវិតលោកពីក្មេងធ្លាប់ដើរសុំទាន មកក្លាយជាសាស្ត្រាចារ្យភាសាបារាំង និងជាអ្នកជំនួញម្នាក់។ ប្រភេទសៀវភៅដែលលោក បញ្ញា ចូលចិត្តអាន រួមមាន សៀវភៅទាក់ទឹងនឹងការអភិវឌ្ឍបុគ្គលិកលក្ខណៈ, ភាពជាអ្នកដឹកនាំ និងប្រវត្តិសាស្ត្រជាដើម។

មានវ័យ២៩ឆ្នាំ អតីតនិស្សិតវិស្វករ និងជាសាស្ត្រាចារ្យភាសាបារាំង នៃវិទ្យាស្ថានបច្ចេកវិទ្យាកម្ពុជា (តិចណូ) លោក ប៊ួ បញ្ញា ជំរុញឲ្យយុវជន និងប្រជាពលរដ្ឋទាំងអស់ យល់ពីសារៈសំខាន់នៃការអាន និងចាប់ផ្ដើមអានសៀវភៅណាដែលខ្លួនចូលចិត្ត ជាពិសេសចូលរួមបណ្ដុះការអាន៕តាមរយៈការអានសៀវភៅនេះ បានជួយកែប្រែជីវិតរបស់លោក បញ្ញា ឲ្យមានចំណេះដឹង និងក្លាយជាធនធានមនុស្សម្នាក់ដ៏មានសក្តានុពល៕