ជាតិ
រថយន្ត
សង្គមជាតិ
ឡានស្លាកលេខអ្វីក៏ដោយ ឲ្យតែចតខុសច្បាប់នៅភ្នំពេញ សូមរាយការណ៍ទៅ ០១២ ៤៧៨ ១៩១
× ស្នងការដ្ឋាននគរបាលរាជធានីភ្នំពេញ ឲ្យសាធារណជនហៅទូរសព្ទទៅកាន់លេខ ០១២ ៤៧៨ ១៩១ ដើម្បីរាយការណ៍ ប្រសិនបើមានរថយន្តណា ចតល្មើសនឹងសញ្ញាចរាចរណ៍។
ឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ បានដាក់ចេញវិធានការក្តៅ ដោយបញ្ជាឲ្យកម្លាំងសមត្ថកិច្ច «ស្ទួចរថយន្តគ្រប់ភេទ យកទៅរក្សាទុក និងផាកពិន័យ» មិនថារថយន្តនោះ ពាក់ស្លាកលេខនគរបាល (ន.ប) ស្លាកលេខខេមរភូមិន្ទ (ខ.ម) ឬស្លាកលេខរដ្ឋនោះទេ ឲ្យតែឈប់ល្មើសនឹងស្លាកសញ្ញាចរាចរណ៍។ វិធានការរបស់លោក ស ថេត ត្រូវបានបង្ហោះលើទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញ នាថ្ងៃទី២ ខែកញ្ញា ឆ្នាំ២០១៩។
ស្នងការដ្ឋាននគរបាលរាជធានីភ្នំពេញ សរសេរថា ម៉ូតូ និង រថយន្ត នៅក្នុងរាជធានីភ្នំពេញ គឺកាន់តែកើនឡើង ដែលជាកត្តាចម្បង បណ្តាលឲ្យមានការកកស្ទះតាមបណ្តោយផ្លូវមួយចំនួន ហើយការកកស្ទះនេះ ក៏បណ្តាលមកពីការឈប់ និងការចតរថយន្តដោយគ្មានសណ្តាប់ធ្នាប់ផងដែរ ជាពិសេស នៅទីតាំងដែលមានស្លាកសញ្ញាហាមឃាត់។
ដើម្បីកាត់បន្ថយការកកស្ទះ ស្នងការដ្ឋាននគរបាលរាជធានីភ្នំពេញ ស្នើឲ្យប្រជាពលរដ្ឋ ចូលរួមគោរពច្បាប់ចរាចរណ៍ ជាពិសេស រថយន្តរបស់អង្គភាពមួយចំនួន ដូចជា រថយន្ត ដែលពាក់ស្លាកលេខ (ន.ប) ស្លាកលេខ (ខ.ម) និងស្លាកលេខរដ្ឋ ជាដើម ត្រូវធ្វើជាគំរូដល់ប្រជាពលរដ្ឋ ដោយមិនត្រូវឈប់ ឬចតនៅទីកន្លែងដែលមានស្លាកសញ្ញាហាមឡើយ៕
© រក្សាសិទ្ធិដោយ thmeythmey.com