ជាតិ
ក្រសួងទេសចរណ៍កាត់បន្ថយរបាំងមិនចាំបាច់ សម្រាប់ភ្ញៀវទេសចរណ៍ចូលទស្សនាកម្ពុជា
× ក្រសួងទេសចរណ៍ សម្រេចកាត់បន្ថយរបាំងមិនចាំបាច់មួយចំនួន ដើម្បីសម្រួលការធ្វើដំណើរដល់ភ្ញៀវទេសចរណ៍ តាមតំបន់ច្រកទ្វារព្រំដែនអន្តរជាតិចូលមកកម្ពុជា។ នេះបើតាមហ្វេសប៊ុកក្រសួងទេសចរណ៍។
ក្រសួងទេសចរណ៍ បានបញ្ជាក់ថា ការសម្រេចកាត់បន្ថយរបាំងមិនចាំបាច់ ដែលក្រសួងសម្រួលដល់ភ្ញៀវទេសចរណ៍នេះ រួមមាន បែបបទនៃការបំពេញសាលាកបត្រចូល -ចេញ និងស្នើសុំទិដ្ឋាការពេលមកដល់ គឺត្រូវបានបញ្ចូលគ្នាតែមួយសន្លឹក ដោយមានជាភាសាខ្មែរ ចិន និងអង់គ្លេស។ ជាមួយគ្នានេះភ្ញៀវទេសចរត្រូវបំពេញបែបបទចូលតែម្តងគត់ ហើយពេលត្រឡប់ចេញទៅវិញ មិនតម្រូវឲ្យបំពេញបែបបទ និងរូបថតឡើយ។ ចំពោះពលរដ្ឋខ្មែរដែលធ្វើដំណើរចេញ និងចូលប្រទេស ដែលកាន់លិខិតឆ្លងដែនអេឡិចត្រូនិចខ្មែរ (E-Passport) មិនតម្រូវឲ្យបំពេញបែបបទទេ។
ចំណែកឯបែបបទចូលនិងចេញតាមច្រកទ្វារព្រំដែនអន្តរជាតិ ភ្ញៀវទេសចរដែលបើកបរដោយខ្លួនឯង (Self Driving Tours) មានបំណងចូលមកទស្សនាក្នុងប្រទេសកម្ពុជា ដោយប្រើប្រាស់មធ្យោបាយធ្វើដំណើរផ្ទាល់ខ្លួន នាំចូលបណ្តោះអាសន្ននិងចេញទៅវិញតាមច្រកទ្វារព្រំដែនអន្តរជាតិនានាទូទាំងប្រទេស អាចបំពេញប្រតិវេទន៍គយសង្ខេបសម្រាប់មធ្យោបាយធ្វើដំណើរចូល-ចេញបណ្តោះអាសន្ន (Summary declaration form for temporary entry-exit of conveyance of tourists) ជាមួយមន្ត្រីគយតាមច្រកទ្វារព្រំដែនអន្តរជាតិទូទាំងប្រទេសបាន។ ក្រៅពីនេះ ភ្ញៀវទេសចរមិនចាំបាច់បង់ប្រាក់និមុត្តិធានា (Deposit) និងថ្លៃធានារ៉ាប់រងឡើយ។ នេះបើតាមក្រសួងទេសចរណ៍។
ការសម្រេចកាត់បន្ថយរបាំងមិនចាំបាច់មួយចំនួនដល់ភ្ញៀវទេសចរចូលមកទស្សនាកម្ពុជា តាមច្រកទ្វារអន្តរជាតិទូទាំងប្រទេសកម្ពុជា ត្រូវបានក្រសួងទេសចរណ៍សហការជាមួយក្រសួងមហាផ្ទៃ និងអង្គភាពពាក់ព័ន្ធផ្សេងទៀត៕
Tag:
ច្រកទ្វារព្រំដែនអន្តរជាតិ
ចេញចូលកម្ពុជា
© រក្សាសិទ្ធិដោយ thmeythmey.com