អន្តរជាតិ
លោកប្រធានាធិបតី ដូណាល់ ត្រាំ និងលោកប្រធានាធិបតី ស៊ី ជិនភីង
×![]()
ដោយ: ធៀន ភារិន្ទ
សហរដ្ឋអាមេរិក នៅថ្ងៃទី១ ខែកញ្ញា បានចាប់ផ្តើមយកពន្ធ ១៥ភាគរយលើមុខទំនិញចិនដូចជា ស្បែកជើង នាឡិកាដៃវៃឆ្លាត និងទូរទស្សន៍ ខណៈពេលចិនបានសងសឹកលើការយកពន្ធពីផលិតផលអាមេរិកដូចគ្នា។ សង្គ្រាមពាណិជ្ជកម្មរវាងមហាអំណាចសេដ្ឋកិច្ចទាំងពីរនេះ បានធ្វើប៉ះពាល់ដល់ប្រជាជនប្រទេសទាំងពីរយ៉ាងខ្លាំង ជាពិសេសគឺការចំណាយលើការទិញផលិតផល។
ការយកពន្ធពីសំណាក់រដ្ឋាភិបាលទីក្រុងប៉េកាំង បានចូលជាធរមាន កាលពីម៉ោង១២ និង០១នាទី នៅថ្ងៃទី១ ខែកញ្ញា ដោយចិនបានយកពន្ធ៥ភាគរយលើផលិតផលអាមេរិកជាលើកដំបូង ស្របពេលរដ្ឋបាលដូណាល់ ត្រាំកាលវេលាម៉ោងដដែល បានប្រមូលពន្ធពីមុនទំនិញចិនវិញ ១៥ភាគរយ ដែលមានទំហំទឹកប្រាក់ច្រើនជាង ១២៥ពាន់លានដុល្លារដោយរួមបញ្ជូលទាំងបាសឆ្លាតវៃ កាសច្រៀកក និងសំលៀកបំពាក់ជាដើម។
ពាក់ព័ន្ធនឹងបញ្ហាខាងលើនេះ ប្រធានាធិបតីអាមេរិកបានសរសេរនៅលើ Twitter ថាគោលបំណងរបស់គាត់គឺចង់ឲ្យអាមេរិក ឈប់ពឹងផ្អែកទៅលើផលិតផលចិន ហើយជំរុញក្រុមហ៊ុនអាមេរិកទាំងអស់ខិតខំស្វែងរកផលិតផលមកពីប្រទេសផ្សេង ជាជាងពឹងផ្អែកទៅលើចិន។
តាមការចុះផ្សាយរបស់ទីភ្នាក់ងារសារព័ត៌មាន Reuters ការសិក្សាផ្សេងៗគ្នាបានបង្ហាញថា ការចំណាយរបស់ប្រជាជនអាមេរិក នឹងកើនដល់ ១០០០ដុល្លារក្នុងមួយឆ្នាំ ដោយសារការយកពន្ធរបស់ចិនចុងក្រោយលើផលិតផលអាមេរិកមានទំហំរហូតដល់ ៧៥ពាន់លានដុល្លារ ហើយវាជះឥទ្ធិពលយ៉ាងខ្លាំងលើអ្នកប្រើប្រាស់ផលិតផលក្នុងស្រុកអាមេរិក។
យ៉ាងមិញលោក Steve Lamar កាលពីថ្ងៃទី១ ខែកញ្ញា បាននិយាយថា សង្គ្រាមពាណិជ្ជកម្មថី្មនេះ គឺចំរដូវកាលលក់ដ៏សំខាន់បំផុតរបស់អាមេរិក។ លោកអះអាងថា ការយកពន្ធនេះ នឹងប៉ះពាល់ដល់ចិន តែជាការពិត វាប៉ះពាល់ដល់អាមេរិកទៅវិញទេ។ វាធ្វើឲ្យតម្លៃឡើងថ្លៃ ទំហំលក់ធ្លាក់ចុះ និងការងារត្រូវបាត់បង់។ បន្ថែមពីលើនេះទៅទៀត នាយកប្រតិបត្តិរងនៃសមាគមស្បែកជើង និងសំលៀកបំពាក់សហរដ្ឋអាមេរិករូបនេះ បានលើកឡើងទៀតថា អាមេរិកអាចមានដំណើរការល្អជាមួយចិន នៅពេលយើងបង្កើតភាពជិតស្និតជាមួយគ្នា កិច្ចចរចាដ៏សមប្រកបមួយ តែមិនមែនជាការយកពន្ធពីគ្នានោះទេ។
ដើម្បីជាការឆ្លើយតបទៅនឹងការយកពន្ធពីអាមេរិក ទីភ្នាក់ងារសារព័ត៌មានរដ្ឋចិន Xinhua បាននិយាយថា អាមេរិក គួរតែរៀនពីការទទួលខុសត្រូវ ក្នុងនាមជាមហាអំណាចពិភពលោក មិនមែនមានអាកប្បកិរិយាដូចជាបងធំនៅក្នុងសាលាឡើយ។ បានសេចក្តីថា អាមេរិកត្រូវតែមានទំនួញខុសត្រូវ និងចូលរួមជាមួយប្រទេសផ្សេងទៀត ដើម្បីឲ្យពិភពលោកមានភាពល្អប្រសើរឡើងវីញ និងមានវិបុលភាពរួមគ្នា។
យ៉ាងណាក៏ដោយ សង្គ្រាមពាណិជ្ជកម្មរវាងទីក្រុងប៉េកាំង និងវ៉ាស៊ីនតោននៅតែបន្តកើតមាន បើទោះបីជាមានជំនួបចរចានៅក្នុងខែកញ្ញានេះក៏ដោយ។ ជាក់ស្តែង ប៉េកាំងត្រៀមទទួលយកពន្ធបន្ថែមទៀត ពី ៥ ទៅ១០ភាគរយ លើទំនិញ១៧១៧ប្រភេទ ក្នុងចំណោម ៥០៧៨ ផលិតផល ដែលនាំចេញពីអាមេរិក នៅថ្ងៃទី១៥ ខែធ្នូខាងមុខ។ ដើម្បីជាការសងសឹក អាមេរិកបានយកពន្ធ ១៥ភាគរយលើទូរសព្ទដៃ កុំព្យូរទ័រ សំលៀកបំពាក់ និងប្រដាប់ប្រដាក្មេងលេងរបស់ចិន ហើយនឹងចូលជាធរមានក្នុងថ្ងៃ១៥ ខែធ្នូនេះដែរ។
លើសពីនេះទៅទៀត រដ្ឋបាលអាមេរិកនៅតែមិនទាន់អស់ចិននៅឡើយ ហើយមានគំរោងយកពន្ធពីផលិតផលចិនបន្ថែមទៀត។ តាមរយៈការិយាល័យនៃអ្នកតំណាងពាណិជ្ជកម្មអាមេរិក កាលពីថ្ងៃ២៩ ខែសីហា បានគូរបញ្ជាក់ថា អាមេរិក នឹងប្រមូលមតិសាធារណៈចាប់ពីថ្ងៃទី២០ ខែកញ្ញា លើគំរោងយកពន្ធបន្ថែមលើទំនិញចិនដល់ ៣០ភាគរយ ដែលមានទំហំទឹកប្រាក់ ២៥០ពាន់លានដុល្លារនៃបញ្ជីទំនិញ។ ពោលគឺការយកពន្ធនេះ គឺយកពីលើពន្ធ ដែលមាន២៥ភាគរយនៃបញ្ជីទំនិញ ដែលនឹងចូលជាធរមានក្នុងថ្ងៃទី១ ខែតុលាខាងមុខនេះ៕
Tag:
ចិន
អាមេរិក
© រក្សាសិទ្ធិដោយ thmeythmey.com
