ជាតិ
អ្នកជំនាញកសិកម្ម៖ ការលាយដីឲ្យត្រឹមត្រូវ ទើបធ្វើឲ្យដំណាំលូតលាស់បានល្អ!
× ភ្នំពេញ៖ ការដាំដុះដំណាំជារឿងសំខាន់ ដែលកសិករត្រូវយកចិត្តទុកដាក់ ជាពិសេសការរៀបចំដី និងលាយដីឲ្យបានល្អ។ បើតាមអ្នកជំនាញកសិកម្ម លោក យ៉ង សាំងកុមារ ដើម្បីបានដីល្អសម្រាប់ដាំដុះ កសិករត្រូវចេះស្វែងរកដីមានជីជាតិ, ត្រូវលាយដីជាមួយធ្យូងអង្កាម និងលាយជាមួយជីធម្មជាតិ។
ការលាយដីឲ្យបានល្អ វាមានប្រយោជន៍ និងជួយដល់ដំណាំរបស់កសិករឲ្យលូតលាស់បានល្អ។ ម្យ៉ាងវិញទៀត ការលាយដី មានជីជាតិនៅស្រទាប់ខាងលើ ដែលមានជាតិមមោក និងសារធាតុសរីរាង្គ រួមទាំងសារធាតុចិញ្ចឹមនៅក្នុងដី។ ដើម្បីលាយដីដាំដំណាំឲ្យបានល្អ គេត្រូវការដីដែលមានជីជាតិ, ធ្យូងអង្កាម និងជីធម្មជាតិ។ ក្នុងបទសម្ភាសខ្លីជាមួយសារព័ត៌មានថ្មីៗ លោក យ៉ង សាំងកុមារ អ្នកជំនាញកសិកម្ម បញ្ជាក់ថា សារៈប្រយោជន៍របស់ធ្យូងអង្កាមដែលលាយដីសម្រាប់ដាំដំណាំ គឺធ្យូងអង្កាម ធ្វើឲ្យដីផុស រក្សាសំណើមបានយូរ និងជួយដល់ការលូតលាស់របស់ឫស។ ចំណែកឯ ជីធម្មជាតិ ជាប្រភេទជីដែលបានមកពីលាមកសត្វ ហើយវាធ្វើឲ្យដីផុសល្អ។
សូមអញ្ជើញទស្សនាកិច្ចសម្ភាសខ្លីរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយលោក យ៉ង សាំងកុមារ អ្នកជំនាញកសិកម្មដូចតទៅ៖
អ្នកជំនាញកសិកម្ម លោក យ៉ង សាំងកុមារ ពន្យល់ថា៖ «ជាគោលយើងផ្សំជាមួយដី ដែលសម្បូរដោយសារធាតុសរីរាង្គ និងរបស់ដែលមានជីវិត, មានជីជាតិ, មានសារធាតុចិញ្ចឹម ដើម្បីផ្សំចូលគ្នា ទើបគេហៅថាដីល្អ»។ បន្ថែមលើនេះ ការរក្សាទុកដីឲ្យបានល្អ មុននឹងយកទៅដាំដំណាំផ្សេងៗ អាចប្រើពេលរយៈពេលមួយខែ ហើយកសិករអាចដឹងបានដោយលូកមើលថា បើដីនោះនៅក្តៅ និងស្អិត គឺមិនអាចយកវាមកដាំបានទេ ព្រោះវាប៉ះពាល់ដល់ការលូតលាស់របស់ដំណាំ។
ការលាយដីសម្រាប់ដាំដំណាំនេះ មានលំបាកក្នុងការរកធាតុផ្សំ ដូចជា ត្រូវយកអង្កាមមកដុតឲ្យទៅជាធ្យូងអង្កាម, ដីត្រូវទៅយកមកពីព្រៃភ្នំ ឬប្រើដីដែលនៅស្រទាប់លើដែលមានកាកសំណល់ពីធម្មជាតិ។ ជាមួយគ្នានេះ កសិករក៏ត្រូវការជីកំប៉ុសយកមកលាយ ហើយករណីខ្លះ អាចយកផេះ ដែលបានមកពីការដុតឈើ ឬអុស ដែលនាំឲ្យមានសារធាតុរ៉ែជំនួយដល់ដីផងដែរ៕
Tag:
កសិកម្ម
ដី
យ៉ង សាំងកុមារ
© រក្សាសិទ្ធិដោយ thmeythmey.com