កោះនៅបឹងកន្សែងអណ្តែតឡើងវិញ បង្កឲ្យមានការភ្ញាក់ផ្អើល!

ជាតិ

២៥ខេត្ត/រាជធានី

កោះនៅបឹងកន្សែងអណ្តែតឡើងវិញ បង្កឲ្យមានការភ្ញាក់ផ្អើល!

04, Sep 2019 , 11:08 am

រូបភាព

រូបភាពផ្តល់ដោយលោក ធី ចាន់ដាលីន អនុប្រធានមន្ទីរទេសចរណ៍ខេត្តរតនគិរី

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ភ្លៀងធ្លាក់ជាបន្តបន្ទាប់ជិត១សប្តាហ៍ ធ្វើឲ្យកោះមួយ ស្ថិតនៅក្នុងបឹងកន្សែងបានអណ្ដែត បង្កការភ្ញាក់ផ្អើលដល់ប្រជាពលរដ្ឋ រួមទាំងភ្ញៀវទេសចរនាំគ្នាទៅថតទិដ្ឋភាពនៅទីនោះ។ លោក ធី ចាន់ដាលីន អនុប្រធានមន្ទីរទេសចរណ៍ខេត្តរតនគិរី បានប្រាប់សារព័ត៌មានថ្មីៗថា កោះនៅបឹងកន្សែងនេះ ពិតជាបានអណ្ដែតមែន គឺអណ្ដែតតាំងពីព្រឹកថ្ងៃទី២ កញ្ញា។

កោះ នៅបឹងកន្សែង ស្ថិតនៅកណ្តាលក្រុងបានលុង ខេត្តរតនគិរី ដែលមានដើមឈើដុះស្កេះស្កះនៅលើ បានអណ្ដែតឡើងវិញនៅព្រឹកថ្ងៃទី២ កញ្ញានេះ បន្ទាប់ពីខកខានអណ្ដែតកាលពី១០ឆ្នាំមុន។ លោក ធី ចាន់ដាលីន អនុប្រធានមន្ទីរទេសចរណ៍ខេត្តរតនគិរី បានប្រាប់សារព័ត៌មានថ្មីៗថា៖ «កោះបឹងកន្សែងនេះ បានអណ្ដែតចេញពីត្រើយម្ខាងនៃបឹង ចំណុចមុខសណ្ឋាគាររតនគិរីបូទិច ទៅជ្រុងម្ខាងនៃផែជិតសណ្ឋាគារទែរូវិញ»។

អនុប្រធានមន្ទីរទេសចរណ៍រូបនេះ បន្តថា បើគិតពីវិទ្យាសាស្ត្រ ដោយសារឆ្នាំនេះ ទឹកធំ និងមានភ្លៀងធ្លាក់ច្រើន ដែលអាចធ្វើឲ្យកោះនេះអណ្ដែត។ ដោយឡែក បើនិយាយពីជំនឿវិញ ប្រជាពលរដ្ឋនៅទីនោះ មានជំនឿថា កោះនោះមានអ្នកតាកាន់។ លោក ធី ចាន់ដាលីន បញ្ជាក់យ៉ាងដូច្នេះ៖ «កោះនេះ ខានអណ្ដែតជាង១០ឆ្នាំហើយ ព្រោះរាល់ដងទឹកតិច ឆ្នាំនេះទឹកធំ ទឹកបឹងឡើងខ្ពស់ទើបធ្វើឲ្យកោះអណ្ដែត។ បើតាមជំនឿវិញ ពីដើមមក កោះនេះមានអ្នកតាកាន់ នៅពេលណាគាត់ចង់អណ្ដែតទៅណាគឺទៅនោះហើយ។ ទោះបីខ្យល់បក់ទៅលិច តែកោះនេះអាចអណ្ដែតទៅខាងកើតបាន»។

(រូបភាពផ្តល់ដោយលោក ធី ចាន់ដាលីន អនុប្រធានមន្ទីរទេសចរណ៍ ខេត្តរតនគិរី)

កោះដ៏ធំដែលអណ្ដែតសន្សឹមៗពីជើងទៅកើតនេះ បានធ្វើឲ្យប្រជាពលរដ្ឋដែលមានជំនឿនាំគ្នាទៅបន់ស្រន់ និងសែនព្រេង នៅបរិវេណអ្នកតាបឹងកន្សែង និងមួយចំនួនបានថតរូបកម្សាន្ត។ លោក ធី ចាន់ដាលីន បន្ថែមថា មន្ទីរទេសចរណ៍ខេត្តរតនគិរី នឹងផ្សព្វផ្សាយពីព្រឹត្តិការណ៍ដ៌អស្ចារ្យនេះ ទៅកាន់ប្រជាពលរដ្ឋក្នុងខេត្តរតនគិរី និងទូទាំងប្រទេស ឲ្យមកទស្សនាទិដ្ឋភាពកោះអណ្ដែតនេះ។

(រូបភាពផ្តល់ដោយលោក ធី ចាន់ដាលីន អនុប្រធានមន្ទីរទេសចរណ៍ ខេត្តរតនគិរី)

លោកស្រី ខៃ ចិន្តា អ្នករស់នៅខេត្តរតនគិរីជិត២០ឆ្នាំ និងជាម្ចាស់សណ្ឋាគារទែរូ នៅមុខបឹងកន្សែង បានប្រាប់សារព័ត៌មានថ្មីៗតាមទូរសព្ទថា៖ «កោះនេះ បានអណ្តែតឡើងវិញ នៅក្នុងសប្ដាហ៍នេះ។ ប៉ុន្តែ កាលពី១០ឆ្នាំមុន កោះនេះ តែងតែអណ្ដែតជាញឹកញាប់ទៅវិញទៅមក ហើយអណ្តែតលឿនៗក្នុងទិសដៅពីបណ្តោយបឹង មិនសន្សឹមដូចអណ្ដែតលើនេះទេ»។ សម្រាប់លោកស្រី ខៃ ចិន្តា គឺចង់ឲ្យអាជ្ញាធរស្ដារសម្អាតផ្ទៃបឹងឲ្យមានពណ៌បៃតងឡើងវិញ ដើម្បីលើកសម្រស់បឹងកន្សែង និងទាក់ទាញភ្ញៀវទេសចរឲ្យកាន់តែច្រើនមកកម្សាន្តនៅខេត្តរតនគិរី។

(រូបភាពសណ្ឋាគារ Terres Rouges Lodge នៅមុខបឹងកន្សែង ក្រុងបានលុង ខេត្តរតនគិរី)

សូមបញ្ជាក់ថា បឹងកន្សែងដែលមានរាងដូចលោកខែនេះ មានទំហំ ២៩ហិកតា និងមានជម្រៅជ្រៅបំផុតកម្ពស់ ៤ម៉ែត្រ ហើយផ្ទៃបឹងនេះ ភាគច្រើនជាតំបន់ដីគោក។ ជាមួយគ្នានេះ រដ្ឋបាលខេត្តរតនគិរី មានគម្រោងសង់ផែលំហែកាយបន្ថែម និងផ្លូវជុំវិញមាត់បឹងកន្សែងផងដែរ៕