អន្តរជាតិ
លោក ចនសុន គំរាមបោះឆ្នោតមុនអាណត្តិ ដើម្បីអូសអង់គ្លេសចេញពីអឺរ៉ុប នាយករដ្ឋមន្រ្តីអង់គ្លេស បូរីស ចនសុន ។ រូបភាព AFP
× ការចាកចេញពីសហភាពអឺរ៉ុប (Brexit) បានធ្វើឲ្យអង់គ្លេសឈានទៅរកវិបត្តិនយោបាយដ៏គ្រោះថ្នាក់ ខណៈដែលស្ថាប័ននីតិបញ្ញត្តិ និងនីតិប្រតិបត្តិខ្វែងគំនិតថា ត្រូវចាកចេញដោយរបៀបណា។ លោកនាយករដ្ឋមន្ត្រី បូរីស ចនសុន នៅថ្ងៃទី៣ ខែកញ្ញា បានលើកឡើងពីលទ្ធភាពរៀបចំការបោះឆ្នោតមុនអាណត្តិ បន្ទាប់ពីបរាជ័យក្នុងការទប់ស្កាត់សភាពីការជជែកលើសំណើពន្យារពេលចាកចេញជាថ្មី។ បក្សអភិរក្សកំពុងកាន់អំណាច ក៏រង្គោះរង្គើពញរោះសមាជិកបក្សខ្លះ មិនគាំទ្រជំហរលោក ចនសុន ។
៦សប្ដាហ៍ជានាយករដ្ឋមន្ត្រីអង់គ្លេស លោក បូរីស ចនសុន បានរងបរាជ័យដ៏អាម៉ាស់មួយ។ នាការបោះឆ្នោតថ្ងៃទី៣ ខែកញ្ញា សមាជិកសភា៣២៨ បានគាំទ្រសំណើជជែកពីសេចក្ដីស្នើច្បាប់មួយដែលបង្ខំរដ្ឋាភិបាលលោក ចនសុន ឲ្យអឺរ៉ុបពន្យារពេលចាកចេញរយៈពេលបីខែទៀត បើភាគីមិនអាចរកបានកិច្ចព្រមព្រៀងថ្មីនៅពាក់កណ្ដាលខែតុលាទេនោះ។ ការបោះឆ្នោតលើសេចក្ដីព្រាងច្បាប់នេះ នឹងធ្វើឡើងនៅថ្ងៃទី៤ ខែកញ្ញា ហើយបើត្រូវអនុម័ត គម្រោងចាកចេញនៅថ្ងៃទី៣១ ខែតុលាដោយគ្មានកិច្ចព្រមព្រៀងរបស់លោក ចនសុន នឹងត្រូវរលាយ។
ជាការពិត លោក ចនសុន ពិតជាជួបព្យុះដ៏ធំមួយ ព្រោះបក្សអភិរក្សបានបាត់បង់សំឡេងភាគច្រើនក្នុងសភាទៅហើយ បន្ទាប់ពីសមាជិកសភាមួយរូបបានចូលរួមជាបក្សដែលមាននិន្នាការគាំទ្រអឺរ៉ុប។ កាន់តែធ្ងន់ធ្ងរនោះ សមាជិកសភាបក្សអភិរក្សចំនួន២១នាក់ទៀត ក៏បានចូលដៃជាមួយបក្សប្រឆាំងដើម្បីរារាំងគម្រោងរបស់ប្រធានបក្សខ្លួនទៅទៀត។ នេះបើតាមទីភ្នាក់ងារព័ត៌មាន AFP ។
ថ្លែងទៅកាន់កិច្ចប្រជុំសភាក្រោយរងបរាជ័យ លោក ចនសុន បានព្រមានថា លោកគ្មានជម្រើសអ្វីនៅសល់ទៀតឡើយ ក្រៅពីការប្រកាសរៀបចំការបោះឆ្នោតមុនកំណត់ប៉ុណ្ណោះ។ លោក ចាត់ទុកសេចក្ដីព្រាងរបស់ «សមាជិកសភាឧទ្ទាម» ជាការប្រគល់ដំណើរការចាកចេញទៅឲ្យអឺរ៉ុបចាត់ចែង ដែលការណ៍នេះបង្កឲ្យមានការយល់ច្រឡំកាន់តែច្រើន និងការពន្យារពេលកាន់យូរទៀត។ លោកគំរាមថា បើសភាគាំទ្រសេចក្ដីស្នើច្បាប់នេះ ការបោះឆ្នោតមុនអាណត្តិជាច្រកចេញតែមួយគត់។
យ៉ាងណាមិញ ការប្រកាសរៀបចំការបោះឆ្នោតមុនអាណត្តិដើម្បីរៀបចំសភាថ្មីនេះ ក៏មិនមែនជារឿងងាយស្រួលដែរ។ លោក ចនសុន ត្រូវបានសំឡេងពីរភាគបីពីសមាជិកសភាទាំងអស់។ បញ្ហានោះ គឺលោក ចនសុន គ្មានសូម្បីសំឡេងភាគច្រើនក្នុងសភាដើម្បីដំណើរការប្រចាំថ្ងៃផង។ បក្សពលករ ដែលជាប្រឆាំងដ៏ធំនោះ ក៏មិនគាំទ្រគម្រោងនេះ។ ប្រធានបក្សប្រឆាំង ជេរេមី ខប៊ីន និយាយថា លោកចង់បានការបោះឆ្នោត ប៉ុន្តែចង់អនុវត្តគម្រោងពន្យារពេលចាកចេញសិន។
ពាក់ព័ន្ធសមាជិកសភា២១នាក់ដែលធ្វើឲ្យលោក ចនសុន ក្ដៅស្លឹកត្រចៀកវិញ ពួកគេនឹងត្រូវបណ្ដេញចេញពីបក្សមិនខាន។ អតីតរដ្ឋមន្ត្រីហិរញ្ញវត្ថុ ហ្វីលីព ហាម៉ុន (Philip Hammond) និងចៅប្រុសបង្កើតអតីតនាយករដ្ឋមន្ត្រី វីនស្តុន ឆឺឈីល និងសមាជិកសភាកាន់តំណែងយូរជាងគេ ស្ថិតក្នុងចំណោមសមាជិកឧទ្ទាមទាំង២១នាក់ និងកំពុងជាមុខសញ្ញាបណ្ដេញចេញពីបក្សអភិរក្សដូចលោក ចនសុន បានព្រមានទុកតែម្ដង៕
Tag:
Brexit
Boris Johnson
អឺរ៉ុប
© រក្សាសិទ្ធិដោយ thmeythmey.com