អន្តរជាតិ
សិង្ហបុរី ត្រៀមលុយ៧១ពាន់លានដុល្លារ ដើម្បីទប់ទល់បម្រែបម្រួលអាកាសធាតុ
ប្រភព CNA
×![]()
ដោយ: ធៀន ភារិន្ទ
រដ្ឋមន្ត្រីហិរញ្ញវត្ថុទី២ លោក ឡរ៉េន វង់ (Lawrence Wong) កាលពីថ្ងៃទី03 ខែកញ្ញា បានប្រាប់សភាថា រដ្ឋាភិបាលនឹងត្រៀមលុយប្រមាណជា ១០០ពាន់លានសិង្ហបុរី ស្មើនឹងទំហំទឹកប្រាក់ជាង ៧១ពាន់លានដុល្លារអាមេរិក ក្នុងការត្រៀមទប់ទល់ការប្រែប្រួលអាកាសធាតុ។ ធនធានទាំងនេះ បានមកពីការកម្ចី ប្រាក់បម្រុង និងហិរញ្ញវត្ថុរបស់រដ្ឋាភិបាលផ្ទាល់។ 
ជាការពិតលោកនាយករដ្ឋមន្ត្រី លី សៀនឡុង ធ្លាប់ប្រកាសម្តងហើយកាលពីថ្ងៃជួបប្រជុំថ្នាក់ជាតិ កាលពីថ្ងៃទី១៨ សីហា ពីរឿងប្រយុទ្ធប្រឆាំងនឹងបម្រែបម្រួលអាកាសធាតុ និងការកើនឡើងកម្រិតទឹកសមុទ្រ។
យ៉ាងណាមិញ សម្រាប់លោករដ្ឋមន្ត្រី Lawrence Wong បាននិយាយថា សម្រាប់ហេដ្ឋានរចនាសម្ព័ន្ធតូចៗមួយចំនួន ដូចជារបាំងទប់ស្កាត់ទឹកជំនន់ក្នុងស្រុក មន្ទីពេទ្យ និងចំណតឡានក្រុង សិង្ហបុរីអាចប្រើប្រាស់លុយរបស់រដ្ឋាភិបាលសម្រាប់សាងសង់បាន។ ប៉ុន្តែសម្រាប់ជញ្ជាំងការពារទឹកសមុទ្រ សិង្ហបុរី ត្រូវការលុយច្រើន ដូចនេះរដ្ឋាភិបាលត្រូវតែខ្ចីលុយ ដើម្បីការពារផលប្រយោជន៍មនុស្សជំនាន់នេះ និងមនុស្សជំនន់ក្រោយ។
មែនទែនទៅ រដ្ឋាភិបាលសិង្ហបុរី បានបង្កើតវិធានការមួយចំនួនដូចជា ការបង្កើតស្ថានីយបូមទឹក ការបង្កើតប្រព័ន្ធធារាសាស្ត្រឲ្យកាន់តែច្រើន និងការចាក់ដីបន្ថែមនៅតំបន់ឆ្នេរភាគខាងកើតនៃសិង្ហបុរី។
លោក វង់ ដែលជារដ្ឋមន្ត្រីអភិវឌ្ឍជាតិផងដែរ ត្រូវបានសមាជិសភាលោក វ៉លធើ ថេរ៉េសា (Walter Theseira) ចោទជាសំណួរថា តើត្រូវការលុយបម្រុងប៉ុន្មានទើបគ្រាប់គ្រាន់ លើការដោះស្រាយបញ្ហាបម្រែបម្រួលអាកាសធាតុ។ រដ្ឋមន្ត្រីអភិវឌ្ឍជាតិរូបនេះមិនបានបញ្ជាក់ច្បាស់លាស់ឡើយ ប៉ុន្តែលោកបានឆ្លើយតបថា គឺត្រូវការប្រើប្រាស់លុយបម្រុង យកទៅចំណាយលើការចាក់បំពេញដីបន្ថែមនៅលើឆ្នេរ ដែលស្របទៅនឹងគំរោងការពារលុយបម្រុង ហើយត្រូវបានយល់ព្រមដោយប្រធានាធិបតី និងរដ្ឋាភិបាល។
ក្នុងន័យនេះ រដ្ឋមន្ត្រីខាងលើ ចង់សង្កត់ធ្ងន់ថា ដីដែលត្រូវបានចាក់បន្ថែម ត្រូវបានការពារដូចជាផ្នែកមួយនៃលុយបម្រុងដែរ ព្រោះនៅពេលដីត្រូវបានគេទិញ លុយដែលលក់បានត្រូវចូលទៅក្នុងលុយបម្រុង។ លោករដ្ឋមន្ត្រីអភិវឌ្ឍជាតិដដែលបានអះអាងទៀតថា ក្រសួងហិរញ្ញវត្ថុ នៅតែបន្តសិក្សាលើយុទ្ធសាស្ត្រក្នុងការទប់ស្កាត់ការប្រែប្រួលអាកាសធាតុ ដើម្បីការពាររដ្ឋបុរីមួយនេះ។
សូមបញ្ជាក់ថាកាលពីថ្ងៃជួបប្រជុំថ្នាក់ជាតិ លោកនាយករដ្ឋមន្ត្រី លី សៀនឡុង បានលើកឡើងពីគម្រោងការពាររដ្ឋបុរី ដើម្បីបញ្ចៀសការលិចទឹកក្នុងរយៈពេល១០០ឆ្នាំទៀត៕
Tag:
សិង្ហបុរី
© រក្សាសិទ្ធិដោយ thmeythmey.com
