អន្តរជាតិ
លោក ម៉ាឌុយរ៉ូ បញ្ជាឲ្យធ្វើសមយុទ្ធយោធាដើម្បីការពារការវាយប្រហាររបស់កូឡុំប៊ី
×
ដោយ៖ ងួន សុភាវត្តី
ថ្ងៃអង្គារទី៣ ខែកញ្ញា ប្រធានាធិបតីវ៉េណេស៊ុយអេឡាលោក នីកូឡាស់ ម៉ាឌុយរ៉ូ បានបញ្ជាអោយយោធាទាំងអស់មានការប្រុងប្រយត្ន័អំពីការវាយប្រហាររបស់កូឡុំប៊ី។ លោកក៏បានបញ្ជាអោយមានការធ្វើសមយុទ្ធយោធានៅតំបន់ព្រំដែនជាប់កូឡុំប៊ីផងដែរ។
ក្នុងសេចក្ដីថ្លែងការណ៍ផ្សាយផ្ទាល់តាមទូរទស្សន៍ លោក នីកូឡាស់ ម៉ាឌូរ៉ូ បាននិយាយថា សមយុទ្ធយោធា នឹងប្រព្រឹត្តទៅជារៀងរាល់ឆ្នាំគឺនៅថ្ងៃ ទី១០ ដល់ទី២៩ ខែកញ្ញា និងស្ថិតនៅរដ្ឋ Zulia, Tachira, Apure និង Amazonas ដែលស្ថិតនៅជាប់ព្រំប្រទល់ជាមួយកូឡុំប៊ីតែម្ដង។
ការប្រកាសអោយមានការធ្វើសមយុទ្ធនេះ ធ្វើឡើយបន្ទាប់ពីកូឡុំប៊ីរៀបចំកងទ័ពដើម្បីទប់ទល់នឺងក្រុមឧទ្ទាម FARC ។ ក្រុមកងទ័ពព្រៃ FARC ដែលប្រឆាំងនឹងរដ្ឋាភិបាលកូឡុំប៊ីបានប្រកាសក្នុងវីដេអូមួយថា ខ្លួនបានកំពុងរៀបកងទ័ពនិងអាវុធឡើកវិញហើយ។ ក្រោយពីឃើញវីដេអូនេះ អាជ្ញាធរកូឡុំប៊ីបានសង្ស័យថា ក្រុមនេះកំពុងលាក់ខ្លួននៅវ៉េណេស៊ុយអេឡា។
ក្រៅតែពីរឿងនេះ កន្លងមកប្រទេសទាំងពីរក៏ធ្លាប់មានទំនាស់ពីបញ្ហាផ្សេងៗជាមួយគ្នាជាង១ទសវត្សរ៍មកហើយ ដូចជាការចល័តទ័ពជាដើម។
ជុំវិញការចោទប្រកាន់ពីវ៉េណេស៊ុយអេឡាថាកូឡុំប៊ីគ្រោងវាយប្រហារនេះ ក្រសួងការបរទេសកូឡុំប៊ីបានបញ្ជាក់ម្តងហើយម្តងទៀតថា ខ្លួនមិនមានគម្រោងវាយប្រហារវ៉េណេស៊ុយអេឡាទេ។ ក្នុងនោះដែរ សហរដ្ឋអាមេរិក ក៏បានចោទប្រកាន់រដ្ឋាភិបាលម៉ាឌូរ៉ូថា កំពុងផ្តល់ជម្រកដល់ក្រុមទ័ពព្រៃដែលប្រឆាំងនឹងរដ្ឋាភិបាលកូឡុំប៊ី។
ស្របពេលនេះដែរ មេដឹកនាំប្រឆាំងលោក ហ្វ័ន ក្វៃដូ បាននិយាយថា នឹងប្រើប្រាស់ប្រព័ន្ធផ្កាយរណបដើម្បីជួយកូឡុំប៊ីកំណត់ទីតាំងរបស់ក្រុមនោះ។ លោកបានបញ្ជាក់ក្នុងការផ្សាយតាមទូរទស្សន៍មួយថា៖ «យើងនឹងប្រើប្រាស់បច្ចេកវិទ្យាផ្កាយរណបដើម្បីកំណត់ទីកន្លែងរបស់ក្រុមឧទ្ទាមនេះដែលបានចូលមករស់នៅដោយខុសច្បាប់ ហើយយើងនឹងសហការគ្នាជាមួយកូឡុំប៊ីដើម្បីស្វែងរកពួកគេ»។
បើតាមទីភ្នាក់ងារព័ត៌មាន Reuters ប្រធានាធិបតីកូឡុំប៊ីលោក Ivan Duque បាននិយាយថាលោកនឹងមិនលើកលែងអោយក្រុមឧទ្ទាមទាំងនេះទេ បន្ទាប់ពីក្រុមនេះបាននិយាយថា ពួកគេនឹងត្រលប់មកន្រឆាំងនឹងរដ្ឋាភិបាលកូឡុំប៊ីម្តងទៀត៕
© រក្សាសិទ្ធិដោយ thmeythmey.com