អន្តរជាតិ
រុស្ស៊ី សន្យាវិនិយោគហេដ្ឋារចនាសម្ព័ន្ធនៅម៉ុងហ្គោលី ប្រធានាធិបតី ពូទីន និងប្រធានាធិបតី Khaltmaa Battulga, ប្រភពAFP
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី០៣ ខែសីហា សន្យាជួយកសាងហេដ្ឋានរចនាសម្ព័ន្ធនៅក្នុងម៉ុងហ្គោលី ខណៈប្រទេសមួយនេះ កាត់បន្ថយការពឹងផ្អែកលើប្រទេសចិន។
ម៉ុងហ្គោលី គឺជាប្រទេសតែមួយគត់ ដែលស្ថិតនៅក្នុងតំបន់យុទ្ធសាស្ត្ររវាងចិន និងរុស្ស៊ី ហើយសេដ្ឋកិច្ចរបស់ប្រទេសនេះ ពឹងផ្អែកយ៉ាងខ្លាំងលើការនាំចេញរ៉ែទៅប្រទេសជិតខាងរបស់ខ្លួន គឺចិន។ ប៉ុន្តែអាជ្ញាធរម៉ុងហ្គោលីចាប់ផ្តើមស្វែងរកទីផ្សារផ្សេងទៀតនៅតំបន់អាស៊ី ដើម្បីបញ្ចៀសការនាំចេញវត្ថុធាតុដើមទៅតែប្រទេសចិនមួយគត់។
រុស្ស៊ី គឺជាគោលដៅមួយនៃយុទ្ធសាស្ត្ររបស់ម៉ុងហ្គោលី។ ប្រធានាធិបតីរុស្ស៊ី វ្ល៉ាឌីមៀ ពូទីន បានធ្វើទស្សនកិច្ចនៅរដ្ឋធានីអ៊ូឡង់បាទ័រ ក្នុងគោលបំណងរឹតចំណងមិត្តភាព និងប្រារព្ធខួបលើកទី ៨០នៃដៃគូប្រយុទ្ធ។ ក្នុងពិធីប្រារព្ធខួបនៃការដៃគូប្រយុទ្ធម៉ុងហ្គោលី និងរុស្ស៊ី ប្រឆាំងនឹងការឈ្លានពានរបស់កងទ័ពជប៉ុនក្នុងឆ្នាំ១៩៣៩ លោក ពូទីន បានលើកឡើងថា រុស្ស៊ីមិនភ្លេចឡើយ ពីការជួយ និងគាំទ្ររបស់កងទ័ពម៉ុលហ្គោលី លើកងទ័ពសូវៀតក្នុងការប្រយុទ្ធតតាំងនឹងពួកណាស៊ី។
អំឡុងទស្សនកិច្ចនេះ ប្រធានាធិបតីម៉ុងហ្គោលី Khaltmaa Battulga និងប្រធានាធិបតី ពូទីន បានចុះហត្ថលេខាលើកិច្ចព្រមព្រៀងមួយចំនួន ដែលពាក់ព័ន្ធនឹងមូលនិធិវិនិយោគរួមគ្នា លើការអភិវឌ្ឍហេដ្ឋារចនាសម្ព័ន្ធ។ សម្រាប់កិច្ចព្រមព្រៀងនេះទៀតសោត លោក ពូទីន បានផ្តល់កម្ចីរហូតដល់ ១,៥ពាន់លានដុល្លារអាមេរិក ដើម្បីទុកជាអំណោយថ្ងៃបុណ្យខួបនៃការប្រយុទ្ធ។
ប្រធានាធិបតីម៉ុងហ្គោលី នឹងប្រើប្រាស់ជំនួយសម្រាប់យកទៅសាងសង់ផ្លូវដែកទៅព្រំដែនចិន ដើម្បីបើកផ្លូវជាច្រើនខ្សែរទៀត ក្នុងការនាំចេញធ្យូងថ្ម និងរ៉ែ។ លោក Battulga ក៏សង្ឃឹមថា ម៉ុងហ្គោលីនឹងមានស្ថានីយរថភ្លើងរបស់ខ្លួននៅកំពង់ផែរុស្ស៊ី ដើម្បីអាចនាំចេញធនធានធម្មជាតិរបស់ខ្លួនកាត់តាមប្រទេសរុស្ស៊ី។ នេះបើតាមទីភ្នាក់ងារព័ត៌មាន AFP ។
សូមបញ្ជាក់ថា ប្រទេសទាំងពីរមានទំហំពាណិជ្ជកម្មជាមួយគ្នាប្រមាណជា ១.៧ពាន់លានដុល្លារ ហើយ៩៥ភាគរយនៃពាណិជ្ជកម្ម គឺម៉ុងហ្គោលីទិញប្រេងពីរុស្សី៕
Tag:
រុស្ស៊ី
ម៉ុងហ្គោលី
© រក្សាសិទ្ធិដោយ thmeythmey.com