អន្តរជាតិ
នយោបាយអន្តរជាតិ
មេដឹកនាំហុងកុង៖ យើងដកសេចក្តីព្រាងច្បាប់បត្យាប័ន ដើម្បីសម្រាលកង្វល់សាធារណៈ
× «រដ្ឋាភិបាល [ហុងកុង] នឹងដកហូតសេចក្តីព្រាងច្បាប់ [បត្យាប័ន] ជាផ្លូវការ ដើម្បីសម្រាលកង្វល់របស់សាធារណៈ»។ លោកស្រី ការី ឡាំ (Carrie Lam) លើកឡើងបែបនេះ ក្នុងវីដេអូមួយ ដែលបានចុះផ្សាយដោយការិយាល័យលោកស្រី នៅល្ងាចថ្ងៃពុធទី ៤ កញ្ញា។ សេចក្តីព្រាងច្បាប់បត្យាប័ននេះ ជាដើមចមធំបំផុតដែលនាំឲ្យមានការផ្ទុះបាតុកម្ម ដែលអូសបន្លាយពេល ៣ខែមកនេះ ។
ការសម្រេចចិត្តនេះ មានន័យថា រដ្ឋាភិបាលហុងកុង យល់ព្រមតាមការទាមទារមួយក្នុងចំណោមប្រាំរបស់ក្រុមបាតុករហុងកុង ដែលបានធ្វើសកម្មភាពតវ៉ាអស់ពេល ១៣សប្តាហ៍មកហើយ។
កាលពីពាក់កណ្តាលខែមិថុនាកន្លងទៅ លោកស្រី ការី ឡាំ បានផ្អាកសេចក្តីព្រាងច្បាប់បត្យាប័ន ដែលនឹងបើកផ្លូវឲ្យធ្វើបត្យាប័នឧក្រិដ្ឋជនពីហុងកុង ទៅចិនដីគោកបាន។
ប្រភពរដ្ឋាភិបាល ដែលបានប្រាប់ទៅកាន់កាសែតហុងកុង South China Morning Post បានបញ្ជាក់ថា លោកស្រី ឡាំ នឹងជួបជាមួយសមាជិកសភាហុងកុង នៅរសៀលថ្ងៃទី ៤ កញ្ញា នៅគេហដ្ឋានផ្លូវការលោកស្រី ក្នុងវិមានរដ្ឋាភិបាលហុងកុង។
ក្រុមអ្នកតាក់តែងច្បាប់ហុងកុងទាំង៤៣នាក់ ត្រូវបានអញ្ជើញទៅជួបលោកស្រី ការី ឡាំ នៅម៉ោង ៤ រសៀល ថ្ងៃពុធនេះ។ លើសពីនេះ បុគ្គលសំខាន់ៗមួយចំនួនទៀតរបស់រដ្ឋាភិបាលចិន ក៏ត្រូវបានអញ្ជើញឲ្យចូលរួមក្នុងកិច្ចប្រជុំរសៀលនេះផងដែរ។ ប្រភពដដែល បញ្ជាក់បែបនេះ។
ទាក់ទិននឹងការប្រកាសជំហរបែបនេះ ប្រភពរដ្ឋាភិបាលមួយទៀត តាមរយៈកាសែតហុងកុងដដែល បកស្រាយថា ការដកហូតសេចក្តីព្រាងច្បាប់ធ្វើបត្យាប័នទាំងស្រុងបែបនេះ គឺជាវិធីសាស្ត្រដ៏ងាយស្រួលបំផុតដើម្បីបន្ថយភាពតានតឹងដែលកំពុងបន្តក្នុងទីក្រុងនេះ។
«ប្រធានប្រតិបត្តិហុងកុង បានចាប់ផ្តើមផ្លាស់ប្តូរគំនិតលោកស្រី ក្រោយពីជួបប្រជុំជាមួយនឹងមេដឹកនាំទីក្រុងចំនួន ១៩នាក់ កាលពី២សប្តាហ៍មុន។ លោកស្រី ចាប់អារម្មណ៍នឹងការយល់ឃើញរបស់ពួកគេជុំវិញមធ្យោបាយកាត់បន្ថយភាពតានតឹង»។ ប្រភព បញ្ជាក់បែបនេះ។
គួររំលឹកថា កាលពីថ្ងៃទី ២៤ សីហា មេដឹកនាំ និងអ្នកនយោបាយជាន់ខ្ពស់នៃទីក្រុង ហុងកុង ចំនួន ១៩នាក់ បានជួបជុំគ្នានៅឯផ្ទះលោកស្រី ការី ឡាំ ដើម្បីគិតគូររកដំណោះស្រាយវិបត្តិបាតុកម្មប្រឆាំងរដ្ឋាភិបាលដ៏កក្រើកនេះ៕
© រក្សាសិទ្ធិដោយ thmeythmey.com