ក្រសួងយុត្តិធម៌ ផ្តើមធ្វើការតាមបញ្ជានាយករដ្ឋមន្ត្រី ដើម្បីកម្ចាត់អំពើពុករលួយក្នុងតុលាការ

ច្បាប់ / សិទិ្ធមនុស្ស / តុលាការ

ជាតិ

ក្រសួងយុត្តិធម៌ ផ្តើមធ្វើការតាមបញ្ជានាយករដ្ឋមន្ត្រី ដើម្បីកម្ចាត់អំពើពុករលួយក្នុងតុលាការ

05, Sep 2019 , 12:39 pm

រូបភាព

លោក អង្គ វង្ស វឌ្ឍានា រដ្ឋមន្រ្តីក្រសួងយុត្តិធម៌ (រូបពីក្រសួងយុត្តិធម៌)

ដោយ: ថ្មីៗ

លោក ជិន ម៉ាលីន អ្នកនាំពាក្យក្រសួងយុត្តិធម៌ អះអាងថា ក្នុងពេលដ៏ខ្លីខាងមុខនេះ ក្រសួងយុត្តិធម៌ នឹងជួបពិភាក្សាជាមួយស្ថាប័នសំខាន់ៗមួយចំនួន រួមមាន ឧត្តមក្រុមប្រឹក្សានៃអង្គចៅក្រម អង្គភាពប្រឆាំងអំពើពុករលួយ និង គណៈមេធាវី ដើម្បីស្វែងរកវិធានការរួមមួយ ក្នុងការទប់ស្កាត់អំពើពុករលួយ ក្នុងប្រព័ន្ធយុត្តិធម៌។

អ្នកនាំពាក្យរូបនេះ ប្រាប់សារព័ត៌មានថ្មីៗ តាមទូរស័ព្ទថា នៅពេលជួបគ្នារួចហើយ ក្រសួងយុត្តិធម៌និងស្ថាប័នទាំងនោះ នឹងចេញវិធានការជាកញ្ចប់តែម្តង ដើម្បីដាក់ជូនប្រមុខរដ្ឋាភិបាល ហើយបន្ទាប់ពីប្រមុខរដ្ឋាភិបាលឯកភាព វិធានការនោះ នឹងត្រូវយកមកអនុវត្តជាផ្លូវការ។ លោក បញ្ជាក់ដូច្នេះថា៖«វិធានការហ្នឹង ដើម្បីទប់ស្កាត់ កុំឲ្យមានអំពើពុករលួយតទៅទៀត។ [.....] យើង សង្ឃឹមថា នឹងកាត់បន្ថយអំពើពុករលួយបានច្រើន [ទោះ] មិនអាចលុបបានទាំងស្រុង….»។

សំឡេងលោក ជិន ម៉ាលីន៖

មុននឹងឈានទៅជួបស្ថាប័នពាក់ព័ន្ធទាំងនោះ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានបើកកិច្ចប្រជុំផ្ទៃក្នុងជាមួយមន្ត្រីរបស់លោកជាមុនសិន កាលពីថ្ងៃទី៣ ខែកញ្ញា ឆ្នាំ ២០១៩។ លោក ជិន ម៉ាលីន បានឲ្យដឹងថា កិច្ចប្រជុំនេះ ផ្តោតលើវិធានការផ្ទៃក្នុងរបស់ក្រសួងយុត្តិធម៌ ដែលត្រូវអនុវត្តក្នុងការដោះស្រាយអំពើពុករលួយក្នុងស្ថាប័នតុលាការ។

មន្ត្រីជាន់ខ្ពស់ក្រសួងយុត្តិធម៌ បន្តថា វិធានការទាំងនោះ គឺ ការធ្វើអធិការកិច្ចនិងការត្រួតពិនិត្យលើក្រមសីលធម៌របស់ក្រឡាបញ្ជី ព្រះរាជអាជ្ញា និង ចៅក្រម រួមទាំងការអនុវត្តច្បាប់និងនីតិវិធីរបស់ពួកគេផងដែរ។ លោក សង្កត់ធ្ងន់ថា៖«បើយើងរកឃើញ [ថាមានអំពើពុករលួយ] អាហ្នឹងមានកំហុសផ្នែកវិន័យ ឬត្រូវមានវិធានការច្បាប់តាមហ្នឹង»។

ក្រសួងយុត្តិធម៌ ចាប់ផ្តើមបើកកិច្ចប្រជុំនិងខ្នះខ្នែងស្វែងរកវិធានការជាបន្ទាន់បែបនេះ គឺបន្ទាប់ពីសម្តេចនាយករដ្ឋមន្ត្រី ហ៊ុន សែន បានដាក់បញ្ជា។ ប្រមុខរដ្ឋាភិបាល ទទួលបានរបាយការណ៍ពីឧត្តមក្រុមប្រឹក្សាពិគ្រោះនិងផ្តល់យោបល់ថា អំពើពុករលួយបានកើតឡើងនិងមានលក្ខណៈអាថ៌កំបាំងខ្លាំងក្នុងប្រព័ន្ធតុលាការ តាមរយៈមេធាវីមួយចំនួន ជាអ្នកលួចរត់ការ ដែលមានន័យថា មេធាវី យកលុយពីកូនក្តីឬអ្នកពាក់ព័ន្ធផ្សេងទៀត ទៅសូកមន្ត្រីតុលាការ ដូចជាក្រឡាបញ្ជី ព្រះរាជអាជ្ញា និង ចៅក្រម។

គណៈមេធាវី បានចេញសេចក្តីថ្លែងការណ៍មួយ កាលពីថ្ងៃទី៣០ ខែសីហា ដោយប្រាប់ទៅមេធាវីទាំងអស់ថា គណៈមេធាវី នឹងពិនិត្យសកម្មភាពប្រកបវិជ្ជាជីវៈរបស់មេធាវី «ឲ្យបានម៉ឺងម៉ាត់បំផុត» និងសហការជាមួយស្ថាប័នពាក់ព័ន្ធ ដើម្បីអនុវត្តប្រសាសន៍របស់ប្រមុខរដ្ឋាភិបាល។ តាមរយៈសេចក្តីថ្លែងការណ៍ គណៈមេធាវី អំពាវនាវឲ្យមេធាវី បន្តលើកកម្ពស់វិជ្ជាជីវៈរបស់ខ្លួន និង ចូលរួមប្រយុទ្ធប្រឆាំងនឹងអំពើពុករលួយ៕