អន្តរជាតិ
ឌូទើតេ ច្រានចោលការអំពាវនាវរបស់ចិនឲ្យហ្វីលីពីនបិទល្បែងភ្នាល់តាមអនឡាញ ប្រធានាធិបតីហ្វីលីពីនឌូទើតេ និងប្រធានាធិបតីចិន ស៊ី ជិនភីង
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ នៅថ្ងៃទី០៤ ខែកញ្ញា បានសម្រេចចិត្តមិនហាមឃាត់លើល្បែងភ្នាល់តាមអនឡាញ ព្រោះវាធ្វើឲ្យប៉ះពាល់ដល់ផលប្រយោជន៍ជាតិ។ ការសម្រេចចិត្តបែបនេះ ក៏ជាការច្រានចោលការអំពាវនាវរបស់រដ្ឋាភិបាលទីក្រុងប៉េកាំងដែលស្នើឲ្យរដ្ឋាភិបាលទីក្រុងម៉ានីលសហការលើការលុបបំបាត់ល្បែងភ្នាល់ឆ្លងប្រទេស។
«យើង នឹងមិនអនុញ្ញាតឲ្យមិនការបិទអាជីវកម្មភ្នាល់តាមអនឡាញឡើយ បើទោះបីជាមានការងារច្រើននៅក្នុងប្រទេសហ្វីលីពីនក៏ដោយ។» នេះជាសម្តីរបស់ប្រធានាធិបតីហ្វីលីពីន រ៉ូឌ្រីហ្គោ ឌូទើតេ វ័យ ៧៤ឆ្នាំ ដែលកាលពីចុងឆ្នាំ២០១៦ បានគាំទ្រការផ្តល់អាជ្ញាបណ្ណលើល្បែងភ្នាល់តាមអ៊ីនធឺណិត។
ថ្លែងសន្និសិទសារព័ត៌មានតាមកញ្ចក់ទូរទស្សន៍ជាមួយនឹងពាក្យព្រមានអ្នកគ្រប់គ្រងល្បែងតាមអនឡាញកុំចង់គេចពីការបង់ពន្ធ លោក ឌូទើតេ បាននិយាយថា៖ «យើងសម្រេចផ្តល់ផលប្រយោជន៍ឲ្យប្រទេស ហើយខ្ញុំសម្រេចថា យើងត្រូវការវា។
ជាការពិត ក្រុមហ៊ុនល្បែងភ្នាល់តាមអនឡាញ POGOs បានចូលរួមរកប្រាក់ចូលក្នុងកញ្ចប់ថវិកាជាតិរបស់ហ្វីលីពីនយ៉ាងច្រើនតាមរយៈការបង់ពន្ធ ជាពិសេសក្រុមហ៊ុននេះបានជួយជំរុញសេដ្ឋកិច្ចក្នុងស្រុក ទាក់ទាញភ្ញៀវទេសចរណ៍មកពីចិន និងធ្វើឲ្យតម្រូវការអចលនទ្រព្យកើនខ្ពស់។ បើទោះបី POGOs ជាក្រុមហ៊ុនភ្នាល់តាមអនឡាញក៏ដោយ តែក្រុមហ៊ុនមួយនេះបានហាមឃាត់មិនឲ្យប្រជាជនហ្វីលីពីនលេងល្បែងភ្នាល់ឡើយ។
តាមការចុះផ្សាយរបស់ទីភ្នាក់ងារសារព័ត៌មាន Reuters អ្នកត្រួតពិនិត្យល្បែងភ្នាល់ហ្វីលីពីន បានសិក្សាលើការផ្តល់អាជ្ញាបត្រឲ្យក្រុមហ៊ុនល្បែងភ្នាល់តាមអនឡាញ ៦០ក្រុមហ៊ុន។ ប៉ុន្តែកាលពីថ្ងៃទី១៩ ខែសីហា អាជ្ញាធរហ្វីលីពីន ឈប់ផ្តល់អាជ្ញាបណ្ណទៅឲ្យក្រុមហ៊ុនល្បែងភ្នាល់តាមអនឡាញថ្មីៗទាំងអស់។ សមាជិកសភាហ្វីលីពីន និងរដ្ឋមន្ត្រីខ្លះលើកឡើងថា ការឈប់ផ្តល់អាជ្ញាបត្រនេះ គឺជាគ្រប់គ្រងទេសចរណ៍ជនជាតិចិន ជាពិសេសគឺកំណើនកម្មករខុសច្បាប់របស់ចិន ដែលធ្វើឲ្យប៉ះពាល់សន្តិសុខសាធារណៈ។
យ៉ាងណាក៏ដោយ ចិនបានសារទរចំពោះចំណាត់ការនេះ ហើយសង្ឃឹមថាហ្វីលីពីននឹងហាមឃាត់អាជីវកម្មភ្នាល់គ្នាតាមអនឡាញ ដើម្បីគាំទ្រការលុបបំបាត់ល្បែងភ្នាល់គ្នាឆ្លងប្រទេសរបស់ចិន។ ប៉ុន្តែតាមរយៈការសិក្សារបស់ធនាគាកណ្តាលរបស់ហ្វីលីពីនបានរកឃើញថា ការលុបចោលល្បែងភ្នាល់តាមអនឡាញធ្វើឲ្យប៉ះពាល់ដល់សេដ្ឋកិច្ចជាតិ។
សូមបញ្ជាក់ថាកាលពីខែសីហា ប្រទេសកម្ពុជាបានហាមឃាត់លើល្បែងភ្នាល់គ្នាតាមអនឡាញតាមការអំពាវនាវរបស់ចិន ដើម្បីទប់ស្កាត់នូវការជំរឹតទារប្រាក់តាមប្រព័ន្ធអ៊ីនធឺណិត៕
Tag:
ឌូទើតេ
ហ្វីលីពីន
ចិន
© រក្សាសិទ្ធិដោយ thmeythmey.com