អន្តរជាតិ
ការស្វែងរកមូលនិធិសម្រាប់ការអប់រំជាបន្ទាន់សម្រាប់កុមាររាប់លាននាក់ដែលស្ថិតនៅក្នុងស្ថានភាពមានវិបត្តិ
រូបឯកសារ៖ កុមារអាហ្វហ្គានីស្ថានប្រមូលស្មៅ និងមែកឈើសម្រាប់ដុតនៅក្នុងវាលស្រែមួយជាយក្រុង Herat។
×![]()
ដោយ: VOA
ហ្សឺណែវ ៖ មូលនិធិសាកលសម្រាប់ការអប់រំជាបន្ទាន់ កំពុងស្វែងរកថវិកាចំនួន១ពាន់ ៨រយលាននៅត្រឹមឆ្នាំ២០២១ ដើម្បីផ្តល់ឲ្យកុមារនិងយុវជនចំនួន៩លាននាក់ ដែលជាប់នៅកន្លែងដែលមានសង្គ្រាម និងនៅក្នុងស្ថានការណ៍មានវិបត្តិផ្សេងៗទៀត។ មូលនិធិដែលមានឈ្មោះថា ការអប់រំមិនអាចរង់ចាំបាន ឬ Education Cannot Wait នេះ ត្រូវបានរៀបចំឡើងនៅឯជំនួបកំពូលសប្បុរសធម៌ពិភពលោកឆ្នាំ ២០១៦ ដើម្បីផ្តល់ការអប់រំដល់កុមារដែលបានបាត់បង់ឱកាសទទួលការអប់រំ។
មូលនិធិនេះប្រមូលថវិកាបាន៥រយលានដុល្លារចាប់តាំងពីមូលនិធិបានចាប់ផ្តើមប្រតិបត្តិការកាលពីឆ្នាំ ២០១៧។ នៅក្នុងរយៈពេលពីរឆ្នាំដំបូងរបស់ខ្លួន មូលនិធិនេះបានផ្តល់ការអប់រំជាបន្ទាន់ដល់មនុស្សវ័យក្មេងប្រមាណជាង១លាន ៥សែននាក់ដែលបានជាប់នៅក្នុងសង្គ្រាម បង្ខំឲ្យផ្លាស់ទីលំនៅ រងគ្រោះដោយគ្រោះធម្មជាតិ និងវិបត្តិផ្សេងៗទៀត នៅក្នុងប្រទេសចំនួន ២៩។
នាយិកាមូលនិធិការអប់រំមិនអាចរង់ចាំបាន លោកស្រី Yasmine Sherif បានថ្លែងថា ការវិនិយោគក្នុងចំនួនគួរឲ្យកត់សម្គាល់ កំពុងតែកើតមានឡើងនៅក្នុងតំបន់ Sahel ដូចជានៅក្នុងប្រទេសប៊ឺគីណា ហ្វាសូ (Burkina Faso) និងប្រទេសនីហ្សេ ដែលជាប្រទេសស្ថិតនៅក្នុងចំណោមប្រទេសដែលកំពុងត្រូវការការអប់រំខ្លាំងបំផុតក្នុងពិភពលោក។ លោកស្រីបានថ្លែងថា កុមារនៅក្នុងប្រទេសកាម៉េរូន មិនបានទៅសាលារៀនរយៈពេលពីរឆ្នាំមកហើយ ដែលនេះ គឺដោយសារតែវាជាផ្នែកមួយនៃយុទ្ធសាស្ត្រសង្គ្រាម។
លោកស្រីបានប្រាប់ VOA ថា ការអប់រំ គឺត្រូវបានរៀបចំឡើងជាពិសេស ដើម្បីដោះស្រាយទុក្ខលំបាកវេទនារបស់កុមារដែលជាប់ក្នុងសង្គ្រាម ដែលពួកគេទាំងនោះ មានការបាក់ស្បាតយ៉ាងខ្លាំង។
លោកស្រី Sherif បានថ្លែងថា៖
«ទីមួយ ការអប់រំដែលមានគុណភាព ត្រូវការសេវាកម្មសុខភាពផ្លូវចិត្ត និងសេវាកម្មចិត្តសាស្ត្រសង្គម។ វា គឺជាអាទិភាពចំបងរបស់យើង។ ទីពីរ កិច្ចការនេះតម្រូវឲ្យមានការរួមបញ្ចូល និងសមភាពយេនឌ័រ ដើម្បីឲ្យប្រាកដថា កុមារី ត្រូវបានគេយកចិត្តទុកដាក់មុនគេ គឺមិនត្រូវបានគេទុកចោលនៅក្នុងចំណោមអ្នកទាំងឡាយដែលត្រូវបានគេទុកចោលទាំងនោះ»។
លោកស្រី Sherif ថ្លែងថា មូលនិធិនេះកំពុងធ្វើការជាមួយរដ្ឋាភិបាលប្រទេសអាហ្វហ្គានីស្ថាន ដើម្បីនាំយកកុមារីឲ្យចូលរៀនវិញ។ លោកស្រីថ្លែងទៀតថា កុមារដែលផ្លាស់ទីលំនៅនៅសាធារណរដ្ឋប្រជាធិបតេយ្យកុងហ្គោ កំពុងតែទទួលបានការអប់រំក្នុងពេលឥឡូវនេះ ដូច្នេះពួកគេមិនចាំបាច់ចាំរហូតដល់ជម្លោះចប់នោះទេ។
របាយការណ៍មួយរបស់ទីភ្នាក់ងារជនភៀសខ្លួនរបស់អង្គការសហប្រជាជាតិដែលបានចេញនាពេលថ្មីៗនេះបានរកឃើញថា ពាក់កណ្តាលនៃជនភៀសខ្លួនជាកុមារ ដែលមានចំនួនប្រមាណជាង ៧លាននាក់ក្នុងពិភពលោក មិនបានទៅសាលារៀនទេ។
លោកស្រី Sherif ថ្លែងថា ជិត៥០ភាគរយនៃអ្នកដែលទទួលបានប្រយោជន៍ពីមូលនិធិនេះ គឺជាកុមារី។ លោកស្រីថ្លែងថា ៤៦ ភាគរយទៀត គឺជនភៀសខ្លួន និងមនុស្សវ័យក្មេងដែលផ្លាស់ទីលំនៅនិង ១៤.០០០ នាក់ គឺកុមារពិការ។
លោកស្រីថ្លែងថា កុមារដែលទៅសាលារៀនជួបប្រទះគ្រោះថ្នាក់ជាច្រើន។ ក៏ប៉ុន្តែ លោកស្រីថ្លែងទៀតថា កុមារដែលមិនបានទៅសាលារៀន គឺប្រថុយនឹងគ្រោះថ្នាក់ខ្លាំងជាងទៅនឹងការកេងប្រវ័ញ្ច ការបំពាន អំពើហិង្សាផ្លូវភេទ ការរៀបការ និងការមានផ្ទៃពោះទាំងខ្លួននៅក្មេង និងការបង្ខំឲ្យចូលរួមជាមួយក្រុមជនប្រដាប់អាវុធ៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
