ប្អូនប្រុសលោក ចនសុន លាលែងតំណែងរដ្ឋមន្ត្រី ព្រោះមិនត្រូវគ្នាជាមួយបងប្រុសរឿង Brexit

អន្តរជាតិ

ប្អូនប្រុសលោក ចនសុន លាលែងតំណែងរដ្ឋមន្ត្រី ព្រោះមិនត្រូវគ្នាជាមួយបងប្រុសរឿង Brexit

06, Sep 2019 , 7:39 pm

រូបភាព

លោក ចូ ចនសុន (ឆ្វេង) ជាមួយបងប្រុស បូរីស កាលពីឆ្នាំ ២០១២

ដោយ:

ទំនាស់រវាងភក្តីភាពចំពោះគ្រួសារនិងប្រយោជន៍ជាតិបានបង្ខំឲ្យលោក ចូ ចនសុន (Jo Johnson) ដែលជាប្អូនប្រុសបង្កើតនាយករដ្ឋមន្ត្រីអង់គ្លេសលោក បូរីស ចនសុន សម្រេចចិត្តចុះចេញពីតំណែងជារដ្ឋមន្ត្រី។ បន្ថែមពីនេះ លោកអះអាង នឹងឈប់ធ្វើជាសមាជិកសភាដែលកាន់អស់ពេល៩ឆ្នាំមកហើយផងដែរ។

ការដើរចេញពីកៅអីរដ្ឋមន្ត្រីដ៏ភ្ញាក់ផ្អើលរបស់លោក ចូ ធ្វើឡើងបន្ទាប់ពីលោកនាយករដ្ឋមន្ត្រី ចនសុន ដែលជាបងប្រុស បានបណ្ដេញសមាជិកសភាអភិរក្សនិយម២១នាក់ ចេញពីគណបក្សលោក។ ហហេតុផលនោះគឺ ពួកគេមិនព្រមគាំទ្រយុទ្ធសាស្ត្រលែងលះជាមួយអឺរ៉ុបរបស់លោក។ ក្នុងចំណោមនោះក៏មាន ចៅប្រុសអតីតនាយករដ្ឋមន្ត្រីអង់គ្លេស វីនស្តុន ឆឺឈីល (Winston Churchil) និងអតីតរដ្ឋមន្ត្រីហិរញ្ញវត្ថុម្នាក់ផងដែរ។

ចាប់តាំងពីចូលកាន់អំណាចក្នុងខែកក្កដាមក លោក បូរីស ចនសុន បានព្យាយាមអូសទាញសមាជិកគណបក្សអភិរក្សនិយមដែលហែកហួរគ្នាក្នុងសំណុំរឿង Brixit ឲ្យរួមគ្នាគាំទ្រយុទ្ធសាស្ត្រចាកចេញពីសហភាពអឺរ៉ុបនាថ្ងៃទី៣១ ខែតុលា ទោះមានឬគ្មានកិច្ចព្រមព្រៀងក៏ដោយ។

និយាយពីលោក ចូ ចនសុន ក្រោយពីបងប្រុសក្លាយជានាយករដ្ឋមន្ត្រី លោកទទួលយកតំណែងជារដ្ឋមន្ត្រីទទួលបន្ទុកក្រសួងអប់រំនិងអាជីវកម្ម។ ក្នុងឆ្នាំ២០១៦ លោកធ្លាប់បោះឆ្នោតគាំទ្រសម្រាប់ប្រជាមតិលើកទី២ ដើម្បីរក្សាសមាជិកភាពអង់គ្លេសក្នុងសហភាពអឺរ៉ុប។

បញ្ជាក់លើបណ្តាញសង្គម Twitter នៅថ្ងៃ៥ ខែកញ្ញា លោក ចូ សរសេរបែបនេះ៖«វាជាកិត្តិយសដែលក្លាយជាតំណែងរាស្ត្រនៃក្រុង Orpington អស់រយៈពេល៩ឆ្នាំ និងកាន់តួនាទីជារដ្ឋមន្ត្រី ក្រោមការដឹកនាំរបស់នាយករដ្ឋមន្ត្រីអង់គ្លេសចំនួន៣នាក់»។

តាមការចុះផ្សាយរបស់ទីភ្នាក់ងារព័ត៌មាន Reuters លោក សង្កត់ធ្ងន់ថា ប៉ុន្មានសប្តាហ៍មកនេះ លោករងគំនាបរវាងភក្តីភាពចំពោះគ្រួសារ និងផលប្រយោជន៍ជាតិ ហើយវាជាភាពតានតឹងដែលពុំអាចដោះស្រាយបាន។ ហេតុដូច្នេះ វាដល់ពេលហើយដែលអ្នកផ្សេងចូលមកកាន់តំណែងជំនួសលោកទាំងជាសមាជិកសភា និងរដ្ឋមន្ត្រី។

បច្ចុប្បន្ន គេពុំទាន់ដឹងច្បាស់នៅឡើយទេថា លោកនឹងចុះចេញពីសមាជិកសភាភ្លាមៗតែម្តង ឬក៏មិនឈរឈ្មោះជាបេក្ខភាពសម្រាប់ការបោះឆ្នោតឡើងវិញ។ គួរឲ្យកត់សម្គាល់ថា លោក ចូ ជាប់ឆ្នោតជាសមាជិកសភាសម្រាប់មណ្ឌលក្រុង Orpington ក្នុងរដ្ឋ Kent ភាគខាងកើត អង់គ្លេស ចាប់តាំងឆ្នាំ២០១០មក។

ក្រោយទទួលដំណឹងពីការលាលែងពីតំណែងនេះ លោកនាយករដ្ឋមន្ត្រី ចនសុន បានអរគុណប្អូនប្រុសលោកសម្រាប់កិច្ចប្រឹងប្រែងចំពោះជាតិ។ ក្នុងសេចក្តីថ្លែងការណ៍ លោក ចនសុន បានសរសើរប្អូនប្រុសថា ជាសមាជិកសភាដ៏អស្ចារ្យម្នាក់ និងជារដ្ឋមន្ត្រីប្រកបដោយទេពកោសល្យ។ លោក លើកឡើងទៀតថា ក្នុងនាមជាអ្នកនយោបាយនិងបងប្រុស លោកយល់ច្បាស់ថា វាពុំមែនជារឿងងាយស្រួលឡើយសម្រាប់លោក ចូ ។

មែនទែនទៅ គ្រួសារត្រកូល ចនសុន មានភាពខ្វែងគំនិតគ្នាជុំវិញសំណុំរឿងលែងលះជាមួយ EU ដោយប្អូនស្រីលោក បូរីស គឺលោកស្រី រ៉ាឆែល ចនសុន (Rachel Johnson) ដែលជាអ្នកកាសែតម្នាក់ បានប្រឆាំងនឹងគំនិតចាកចេញពី EU។ ចំណែកឪពុកលោក គឺលោក ស្តានលី (Stanly) ដែលជាអតីតមន្ត្រីម្នាក់នៃគណៈកម្មការអឺរ៉ុប ប្រកាន់ជំហររក្សាទុកសមាជិកភាពអង់គ្លេសក្នុងសហភាពអឺរ៉ុបដដែល៕