អន្តរជាតិ
ក្រុមអ្នកជំនាញUN ៖ កូរ៉េខាងជើងបន្តអភិវឌ្ឍកម្មវិធីមីស៊ីលប៉ាលីស្ទិកអន្តរទ្វីប
× ក្រុមអ្នកជំនាញរបស់អង្គការសហប្រជាជាតិ នៅថ្ងៃទី០៥ ខែសីហា បាននិយាយថា កូរ៉េខាងជើងចាប់ផ្តើមរៀបចំកម្មវិធីមីស៊ីល ដើម្បីអភិវឌ្ឍមីស៊ីលប៉ាលីស្ទិកអន្តរទ្វីបរបស់ខ្លួន។
នៅក្នុងរបាយការណ៍វាយតម្លៃរបស់ក្រុមអ្នកជំនាញ ដែលបានដាក់ទៅគណៈកម្មាធិការត្រួតពិនិត្យលើការអនុវត្តទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខអង្គការសហប្រជាជាតិ ប្រឆាំងនឹងកូរ៉េខាងជើង សាធារណរដ្ឋប្រជាមានិតកូរ៉េនៅតែបន្តអភិវឌ្ឍកម្មវិធីនុយក្លេអ៊ែររបស់ខ្លួនដដែល ទោះបីមានការចរចាជាមួយអាមេរិកដើម្បីរំសាយអាវុធនេះក៏ដោយ។
ទាក់ទងនឹងរបាយការណ៍ខាងលើនេះ ក្រុមអ្នកជំនាញបង្ហាញថា ការសាកល្បងមីស៊ីលប៉ាលីស្ទិកចំងាយខ្លីថ្មីៗនេះ គឺជាការគំរាមកំហែងមួយ។ ការរកឃើញនេះ គឺផ្ទុយពីការយល់ឃើញរបស់ប្រធានាធិបតីអាមេរិក ដូណាល់ ត្រាំ ដែលចាត់ទុកការសាកល្បងមីស៊ីលជាការត្រូវតាមបទដ្ឋានអន្តរជាតិទៅវិញ។
របាយកាណ៍របស់ក្រុមអ្នកជំនាញអង្គការសហប្រជាជាតិបានគូសបញ្ជាក់ថា ប្រភេទមីស៊ីលថ្មី SRBM ដែលបានសាកល្បងកាលពីថ្ងៃទី០៤ និងទី០៩ ខែឧសភា និងមីស៊ីលពីរទៀត ដែលត្រូវបានកូរ៉េខាងជើងអះអាងថាជាអាវុធប្រភេទថ្មីនោះ គឺជាភស្តុតាងបង្ហាញពីសមត្ថភាពរបស់ទីក្រុងព្យុងយ៉ាង ក្នុងការពង្រឹងប្រព័ន្ធមីស៊ីលប៉ាលីស្ទិករបស់ខ្លួន។ ជាពិសេសគឺវារួមបញ្ជូលជាមួយនឹង ការបាញ់បង្ហោះកាំជ្រួចរ៉ុកកែតពីរថយន្តបាញ់គ្រាប់រ៉ុកកែតផ្សេងៗគ្នា និងសមត្ថភាពក្នុងការជ្រៀតចូលប្រព័ន្ធការពារមីស៊ីលប៉ាលីស្ទិកទៀតផង។
ក្នុងន័យនេះ ក្រុមអ្នកជំនាញបានសង្កត់ធ្ងន់ថា វាគឺច្បាស់ណាស់លើដំណើរការអភិវឌ្ឍពីរថយន្តបាញ់គ្រាប់រ៉ុកកែត និងSRBMs មកបំពាក់លើការបាញ់មីស៊ីលប៉ាលីស្ទិកអន្តរទ្វីប ក្នុងគោលបំណងបាញ់មីស៊ីលចម្ងាយមធ្យម និងចំងាយឆ្ងាយឲ្យបានកាន់តែខ្លាំងជាមុន។
ដើម្បីគាំទ្រនូវរបាយការណ៍របស់ពួកគេ ក្រុមអ្នកជំនាញបានលើកឡើងពីទីតាំងមីស៊ីលប៉ាលីស្ទិកអន្តរទ្វីបមួយចំនួននៅក្បែរព្រំដែនភាគខាងជើងដូចជា តំបន់ Hoejung-ri ដែលមានសកម្មភាពក្នុងការអភិវឌ្ឍកម្មវិធីនុយក្លេអ៊ែរនេះ។ នេះបើតាមទីភ្នាក់ងារព័ត៌មាន Yonhap ។
សូមបញ្ជាក់ថា កាលពីឆ្នាំ២០១៧ កូរ៉េខាងជើងបានបាញ់សាកល្បងមីស៊ីលនុយក្លេអ៊ែរអន្តរទ្វីបចំនួន២ដង ហើយវាអាចបាញ់រហូតដល់ទឹកដីរបស់អាមេរិកគ្រប់ពេល។ ប៉ុន្តែចាប់តាំងពីមានជំនួបកិច្ចចរចាកម្មវិធីអាវុធនុយក្លេអ៊ែររវាងលោក ត្រាំ និងលោក គីម ជុងអ៊ុន មក កូរ៉េខាងជើងបានផ្អាកការសាកល្បងមីស៊ីលប៉ាលីស្ទិកមួយរយៈ និងកម្ទេចកន្លែងបាញ់គ្រាប់រ៉ុក្កែតចោលមួយ នៅក្នុងតំបន់ Dongchang-ri ចោល។ យ៉ាងណាក៏ដោយ ថ្មីៗកូរ៉េខាងជើងបានចាប់ផ្តើមបាញ់មីស៊ីលចំងាយខ្លីជាច្រើនដង ខណៈពេលកិច្ចចរចារវាងកូរ៉េខាងជើង និងអាមេរិកមិនទាន់កើតមាន៕
© រក្សាសិទ្ធិដោយ thmeythmey.com