ជាតិ
សង្គមជាតិ
ស្រី្តជាប់ពន្ធនាគារ១៦៦ឆ្នាំ ត្រូវបានតុលាការសម្រេចទោសត្រឹម១៩ឆ្នាំវិញ រូបភាពពីគណៈកម្មាធិការសិទ្ធិមនុស្សកម្ពុជា
× ភ្នំពេញ៖ ស្រី្តដែលជាប់ទោស១៦៦ឆ្នាំនោះ ត្រូវបានសាលាឧទ្ធរណ៍ប្រកាសសាលដីកាឲ្យរួចផុតបទចោទ៨សំណុំរឿង ហើយត្រូវអនុវត្តទោសជាប់ពន្ធនាគារត្រឹម១៩ឆ្នាំប៉ុណ្ណោះ។ នេះបើតាមសេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា កាលថ្ងៃទី ៥កញ្ញា ឆ្នាំ២០១៩។
គណៈកម្មាធិការសិទ្ធមនុស្ស ដែលបានអន្តរាគមន៍ផ្នែកច្បាប់ ជួយដោះស្រាយសំណុំរឿងក្តីពិរុទ្ធជនឈ្មោះ ពេជ្រ សូណែត នេះ បានបញ្ជាក់ថា សំណុំរឿងទាំង៨ ដែលតុលាការសម្រេចឲ្យរួចផុតបទចោទនោះ មាន១សំណុំរឿងបានប្តូរ បទចោទមកបទល្មើសមិនបរិហារពីបទល្មើស ដោយផ្ដន្ទាទោស១ឆ្នាំ ហើយសំណុំរឿង១ទៀត ត្រូវបានសាលាឧទ្ធរណ៍ សម្រេចផ្តន្ទាទោស១៨ឆ្នាំ។ ដូច្នេះសរុបទោសមក ពិរុទ្ធជន ពេជ្រ សូណែត នេះ ត្រូវជាប់ពន្ធនាគារ១៩ឆ្នាំ តាមការសម្រេចរបស់សាលាឧទ្ធរណ៍ លើសំណុំ ២រឿងនេះ។
សេចក្តីប្រកាសព័ត៌មានរបស់គណៈកម្មាធិការសិទ្ធិមនុស្ស បានសរសេរដូច្នេះថា៖«ក្រុមមេធាវីសិទ្ធិមនុស្សនៃគណៈកម្មាធិការសិទ្ធិមនុស្ស នឹងខិតខំធ្វើការងារបន្ថែមទៀតជាមួយពិរុទ្ធជន ពេជ្រ សូណែត ក្នុងការបន្តនីតិវិធីដាក់ពាក្យបណ្ដឹងសារទុក្ខទៅតុលាការកំពូល ដើម្បីស្វែងរកយុត្តិធម៌ជូនជនជាប់ចោទ ដោយក្រុមមេធាវីយល់ឃើញថា ឈ្មោះ ពេជ្រ សូណែត មិនមានពាក់ព័ន្ធជាមួយនឹងអំពើប្លន់ម៉ូតូ និងសម្លាប់ជនរងគ្រោះនោះទេ ហើយពិរុទ្ធជន ពេជ្រ សូណែត ក៏បានបដិសេធនូវការសម្រេចរបស់សាលាឧទ្ធរណ៍ផងដែរ»។
កាលពីអំឡុងឆ្នាំ២០១៧ សាលាដំបូងរាជធានីភ្នំពេញ សម្រេចផ្តន្ទាទោស ពេជ្រ សូណែត ជាប់ពន្ធនាគារសរុប១៦៦ឆ្នាំ លើ៩សំណុំរឿង ពីបទលួចមានស្ថានទម្ងន់ទោស ដោយសារការប្រព្រឹត្តហិង្សា (ប្លន់ម៉ូតូ) និងមានមរណភាពនៃជនរងគ្រោះ រួមទាំងការកាន់កាប់អាវុធដោយគ្មានការអនុញ្ញាត។ ពិរុទ្ធជនរូបនេះ ក៏បានប្តឹងសារទុក្ខទៅសាលាឧទ្ធរណ៍ លើករណីសាលក្រមទាំង៩ខាងលើនេះ នៅអំឡុងឆ្នាំ២០១៧ដែរ។
គិតមកដល់ថ្ងៃប្រកាសសាលក្រម កាលថ្ងៃទី៥កញ្ញានេះ ពិរុទ្ធជន ពេជ្រ សូណែត ត្រូវបានឃុំខ្លួន៣ឆ្នាំ ៨ខែ និង២០ថ្ងៃហើយ បើកិតចាប់ពីថ្ងៃទី១៦ ខែធ្នូ ឆ្នាំ២០១៥មក។ អំឡុងពេលជាប់ពន្ធនាគារស្ត្រីរូបនេះ បានសម្រាលកូន ហើយបន្តជាប់ឃុំទាំងម្តាយទាំងកូនក្នុងពន្ធនាគារ។
កូនប្រុសអាយុ៣ឆ្នាំរបស់ស្ត្រីជាប់ឃុំ ពេជ្រ សូណែត ត្រូវបានផ្នែកមនុស្សធម៌នៃគណៈកម្មាធិការសិទ្ធិមនុស្សកម្ពុជា អន្តរាគមន៍ជាមួយអង្គការដៃគូការអភិវឌ្ឍន៍កុមារកម្ពុជា ទទួលយកទៅចិញ្ចឹមនិងផ្តល់ការអប់រំ កាលពីថ្ងៃទី២កក្កដា ឆ្នាំ២០១៩៕
© រក្សាសិទ្ធិដោយ thmeythmey.com