អន្តរជាតិ
ថៃសង្ឃឹមបង្កើតកិច្ចព្រមព្រៀងរុករកធនធានធម្មជាតិ «៥០-៥០» ជាមួយកម្ពុជា រដ្ឋមន្ត្រីថាមពលថៃ លោក សាន់ទីរ៉ាត់ សាន់ទីជីរ៉ាវង្ស (កាសែតថៃ៖ The Nation)
× កម្ពុជា និងថៃ បានយល់ព្រមពិចារណាបើកកិច្ចពិភាក្សាជាថ្មី លើការអភិវឌ្ឍធនធានធម្មជាតិក្នុងតំបន់ត្រួតស៊ីគ្នា (OCA) ក្នុងឈូងសមុទ្រថៃ ដែលទាមទារដោយប្រទេសទាំងពីរ។ នេះបើតាមការអះអាងរបស់ រដ្ឋមន្ត្រីថាមពលថៃ ដោយសង្ឃឹមថាភាគីទាំងពីរអាចបង្កើតកិច្ចព្រមព្រៀងមួយដែលបើកផ្លូវឲ្យប្រទេសនីមួយៗបានប្រយោជន៍៥០ភាគរយនៃផលិតកម្មឧស្ម័នសរុបនៅតំបន់រុករកនេះ។
សេចក្តីសម្រេចនេះ បានលើកឡើងដោយរដ្ឋមន្ត្រីថាមពលថៃ សុនទីរ៉ាត់ សុនទីជីរ៉ាវង្ស (Sontirat Sontijirawong) ក្នុងជំនួបជាមួយសមភាគីកម្ពុជា នៅក្រៅកិច្ចប្រជុំរដ្ឋមន្ត្រីថាមពលអាស៊ានលើកទី៣៧ក្នុងទីក្រុងបាងកក។ កិច្ចប្រជុំអាស៊ាននេះ បានចាប់ផ្តើមតាំងពីថ្ងៃចន្ទ និងបញ្ចប់នាថ្ងៃសុក្រទី ៦ ខែកញ្ញា ។
តាមកាសែតបាងកកប៉ុស្តិ៍ ក្នុងកិច្ចភាក្សាខាងលើ តំណាងមកពីប្រទេសទាំងពីរ បានយល់ស្របគ្នាថា តំបន់ទាមទារត្រួតស៊ីគ្នា (OCA) គួរត្រូវអភិវឌ្ឍក្នុងលក្ខខណ្ឌមួយដែលចំណេញទាំងភាគីថៃ និងកម្ពុជា ហើយសង្កត់ធ្ងន់ថា កិច្ចពិភាក្សាជុំវិញរឿងនេះ គួររៀបចំឡើងឱ្យបានលឿនតាមដែលអាចធ្វើទៅបាន។
«យើង កំពុងរកមើលមធ្យោបាយល្អបំផុតដើម្បីបន្តកិច្ចពិភាក្សាស្តីបញ្ហា[អភិវឌ្ឍធនធានធម្មជាតិរួមគ្នាក្នុងតំបន់ OCA ] ក្រោយពីការពន្យារពេលជាច្រើនទសវត្សរ៍មកហើយនេះ»។ លោករដ្ឋមន្ត្រីថៃ សុនទីរ៉ាត់ បញ្ជាក់បែបនេះ ដោយបន្ថែមថា ខណៈពេលវេលានៃជំនួបពុំទាន់យល់ព្រមនៅឡើយ ខាងថៃ នឹងជូនដំណឹងដល់ភាគីកម្ពុជានៅពេលពួកគេដោះស្រាយរឿងមួយចំនួនរួចរាល់។
ទន្ទឹមនេះ មន្ត្រីជាន់ខ្ពស់ថៃរូបនេះ បន្តទៀតថា កម្ពុជានិងថៃបានយល់ព្រមថា តំបន់ «OCA» គួរអភិវឌ្ឍដោយឈរគោលការណ៍ផ្តល់ប្រយោជន៍ដល់គ្នាទៅវិញទៅមក។ លោក ថា ក្នុងនាមជាប្រទេសមានកំណើនសេដ្ឋកិច្ចលឿនរហ័ស កម្ពុជានិងថៃ ត្រូវការប្រភពឧស្ម័នច្រើនបន្ថែមដើម្បីបំពេញការកើនឡើងនៃតម្រូវការក្នុងស្រុកសម្រាប់ថាមពល។
ម្យ៉ាងទៀត លោករដ្ឋមន្ត្រីថាមពលថៃខាងលើ ក៏សង្ឃឹមថា កម្ពុជានិងថៃ អាចបង្កើតកិច្ចព្រមព្រៀងមួយដែលស្រដៀងនឹងតំបន់អភិវឌ្ឍន៍រួមគ្នាម៉ាឡេស៊ី-ថៃ (MTJDA) ដែលបើកផ្លូវឲ្យប្រទេសនីមួយៗកាន់កាប់ ៥០ភាគរយនៃផលិតកម្មឧស្ម័នសរុបនៅតំបន់រុករកនេះ។ បន្ថែមពីនេះ លោក ក៏និយាយទៀតថា ថៃ បានស្នើឲ្យភាគីកម្ពុជាដាក់ចេញវិធានការទាក់ទាញក្រុមហ៊ុនថាមពលឯកជនថៃ ក៏ដូចជាក្រុមហ៊ុនរដ្ឋថៃ ដើម្បីឲ្យពួកគេបោះទុនវិនិយោគក្នុងវិស័យថាមពលនៅកម្ពុជា។
ក្រៅពីបង្ហើបពីគម្រោងបើកការចរចាឡើងវិញនេះ លោករដ្ឋមន្ត្រីថាមពលថៃរូបនេះ ក៏បញ្ជាក់ឲ្យដឹងទៀតថា ភាគីថៃមានបំណងលក់ថាមពលអគ្គិសនីខ្លះដល់កម្ពុជា ដែលនៅតែពុំអាចផលិតអគ្គីសនីគ្រប់គ្រាន់ដើម្បីបំពេញតម្រូវការប្រើប្រាស់ក្នុងស្រុក។ ត្រង់នេះ លោកនិយាយបែបនេះ៖«អាជ្ញាធរ អគ្គិសនីថៃ នឹងព្យាយាមបង្កើតកិច្ចព្រមព្រៀងមួយជាមួយកម្ពុជា នាពេលឆាប់ៗខាងមុខ»។
សូមបញ្ជាក់ថា កម្ពុជានិងថៃ បានទាមទារដែនអធិបតេយ្យភាពនៃតំបន់ត្រួតស៊ីគ្នា (OCA) ដែលមានទំហំ ២៧០០០គីឡូម៉ែត្រការ៉េព័ទ្ធជុំវិញដែនទឹកជម្លោះក្នុងឈូងសមុទ្រថៃ។ គេជឿថា តំបន់នេះ សម្បូរដោយឧស្ម័នធម្មជាតិ និងប្រេង។ ក្រុមហ៊ុនអូស្ត្រាលីមួយ ឈ្មោះថា Macquarie Securities ប៉ាន់ប្រមាណថា តំបន់នេះ មានផ្ទុកប្រេងដល់ ៣,៦ពាន់លានបារ៉ែល ដែលស្មើនឹង៤៤ពាន់លានដុល្លារ។
ក្នុងឆ្នាំ ២០០១ កម្ពុជា និងថៃ បានចុះហត្ថលេខាលើអនុសារណៈយោគយល់គ្នាមួយ (MOU) ដើមម្បីបង្កើតកិច្ចព្រមព្រៀងអភិវឌ្ឍន៍រួមគ្នាមួយក្នុងតំបន់ OCA ។ ទោះជាបែបនេះក្តី ភាគីថៃ បានសម្រេចផ្អាកកិច្ចព្រមព្រៀងនេះវិញក្នុងឆ្នាំ២០០៩៕
Tag:
ថៃ
កម្ពុជា
ឧស្ម័នធម្មជាតិ
© រក្សាសិទ្ធិដោយ thmeythmey.com