ONE Championship
កីឡាជាតិ
ជាតិ
កូនខ្មែរនៅកាណាដាម្នាក់ ចង់រួមចំណែកជួយកម្ពុជាក្នុងវិស័យក្បាច់គុនខ្មែរ
×
អត្ថបទ៖ ស៊ីធី
Thearron Sieng-You គឺជាកីឡាករប្រដាល់គុនខ្មែរ និង គុនចម្រុះម្នាក់ដែលកំពុងរស់នៅប្រទេសកាណាដាហើយក៏ហាត់ក្បាច់គុននៅទីនោះដែរ។ Thearron Sieng-You បានផ្ញើសារថា រូបគេចង់រួមចំណែកចូលរួមបំផុសចលនាក្បាច់គុនខ្មែរ និង ប្រកួតតំណាងឲ្យកម្ពុជាតាមតែអាចធ្វើទៅបានទៅថ្ងៃមុខ។ ការថ្លែងប្រាប់អ្នកយកព័ត៌មាន ONE Championship បែបនេះបន្ទាប់ពីកីឡាករវ័យ ៣៤ឆ្នាំរូបបានចុះឈ្មោះជាសមាជិកផ្លូវការរបស់សហព័ន្ធកីឡាយុទ្ធគុនចម្រុះកម្ពុជានាពេលថ្មីៗនេះ។
កូនខ្មែរកើតនៅបារាំងរូបនេះបានថ្លែងថា ៖«ការចុះឈ្មោះជាមួយសហព័ន្ធជាសមាជិកគឺខ្ញុំចង់រួមចំណែកជួយគុនខ្មែរ គុនចម្រុះ និងផ្សព្វផ្សាយតាមតែអាចធ្វើទៅបាន។ ខ្ញុំតែងតែឡើងប្រកួតក្បាច់គុនខ្មែរនៅបារាំង។ ខ្ញុំហ្វឹកហាត់គុនខ្មែរជាមួយ Albert Chey Veera នៅក្លិបប្រដាល់ The Temple Bordeaux តែខ្ញុំក៏ចង់ឡើងប្រកួត MMA ដែរដើម្បីធ្វើតេស្តសមត្ថភាព ព្រោះខ្ញុំក៏បានហ្វឹកហាត់ ជីជិតស៊ូដែរ»។
កីឡាករកូនខ្មែរកើតនៅបារាំងប៉ុន្តែរស់នៅកាណាដានាពេលបច្ចុប្បន្នសង្កត់ធ្ងន់ថា៖«ខ្ញុំបានឈ្នះជើងឯក New York Naga ដែលជាការប្រកួតជីជិតស៊ូ។ នេះជាហេតុផលខ្ញុំចង់ប្រកួតក្នុងពិភពគុនចម្រុះ។ វាមានក្បាច់ស្រដៀងគ្នា ហើយ ខ្ញុំក៏បានហាត់គុនខ្មែរដែរ»។
កីឡាករទម្ងន់៧២គីឡូក្រាមរូបនេះកំពុងហ្វឹកហាត់ក្បាច់គុនចម្រុះ ឬ MMA នៅក្លិប Sherbatov MMA។ កូនខ្មែរនៅបារាំងរូបនេះរំលឹកថា ពេលរូបគេត្រលប់ទៅប្រទេសបារាំង គឺត្រូវហ្វឹកហាត់ជាមួយ Albert Chey Veera ដែលជាគ្រូបង្វឹកនៅក្លិប The Temple Bordeaux។ កីឡាកររូបនេះមានកម្រិតខ្សែក្រវាត់ខៀវពីកីឡាជិជិតស៊ូតដែលទទួលបានពីក្លិប BTT Brazilian Top Team។ Sieng-You ធ្លាប់ហ្វឹកហាត់ក្បាច់គុន MMA ជាមួយកីឡាករប្រកួតក្នុងកម្មវិធី UFC ផងដែរនៅកាណាដា។
Sieng-You បានយល់ឃើញថា៖«ក្បាច់គុន MMA នៅកម្ពុជាកំពុងដើរទៅមុខ។ ខ្ញុំគិតថាវាកាន់តែល្អទៀតអនាគត»។
ទន្ទឹមនឹងការចុះឈ្មោះជាបន្តបន្ទាប់ពីសំណាក់កីឡាករខ្មែរនៅក្រៅប្រទេស លោក កែ ប៊ិនសូរស្មី អនុប្រធានសហព័ន្ធកីឡាយុទ្ធគុនចម្រុះកម្ពុជាបានបង្ហើបកន្លងទៅថា សហព័ន្ធប្រឹងប្រែងដើម្បីបង្កើតទំនាក់ទំនងអន្តរជាតិ និង ផ្សព្វផ្សាយគុនខ្មែរទៅកាន់ពិភពលោក ហើយគោលការណ៍របស់សហព័ន្ធត្រូវតែទទួលបានការចុះឈ្មោះផ្លូវការយ៉ាងហោចគ្រូបង្វឹកមួយ-ក្លិបមួយនៅក្រៅប្រទេសដែលមានខ្មែរហ្វឹកហាត់នៅទីនោះ។
ក្រោយបើកឲ្យចុះឈ្មោះជាផ្លូវពីកីឡាករក្នុងស្រុកនិងក្រៅស្រុកតាំងខែ មិថុនា មកនោះ សហព័ន្ធកីឡាយុទ្ធគុនចម្រុះកម្ពុជា (CMMAF)ទទួលបានការចុះឈ្មោះគ្រូបង្វឹកនិងកីឡាករក្រៅប្រទេសជាផ្លូវការមួយចំនួនដូចជា ចៅ សួស្ដី កូនខ្មែរនៅអូស្ត្រាលី , Albert Veera CHEY កូនខ្មែរនៅបារាំង, អែម សុវណ្ណារី កូនខ្មែរនៅអាមេរិក, Linda Chhon កូនខ្មែរនៅអាមេរិក, និង Thyalexander Sao កូនខ្មែរនៅអាមេរិក៕
សូមទស្សនាការផ្សាយផ្ទាល់ ពីសង្វៀន ONE: IMMORTAL TRIUMPH នៅថ្ងៃទី ៦ ខែ កញ្ញា ដែលរៀបចំនៅប្រទេសវៀតណាមចាប់ពីម៉ោង៥:៣០ ល្ងាចតទៅតាមរយៈ https://www.facebook.com/ONEChampionship/ , ONE Super App និង YouTube: https://www.youtube.com/user/OneFCMMA ៕
© រក្សាសិទ្ធិដោយ thmeythmey.com