ប៉េកាំងសរសើរពីវីរភាពលោក Mugabe ជាពិសេសការប្រឆាំងការលូកដៃពីបរទេស

អន្តរជាតិ

នយោបាយអន្តរជាតិ

ប៉េកាំងសរសើរពីវីរភាពលោក Mugabe ជាពិសេសការប្រឆាំងការលូកដៃពីបរទេស

07, Sep 2019 , 1:59 pm

រូបភាព

ប្រធានាធីបតី ស៊ី ជិនភីង និងមេដឹកនាំស៊ីមបាវ៉េ Robert Mugabe ប្រភពរូប៖ AFP

ដោយ:

រដ្ឋាភិបាលក្រុងប៉េកាំង តាមរយៈក្រសួងការបរទេស បានចូលរួមរំលែកទុក្ខចំពោះមរណភាពរបស់អតីតប្រធានាធិបតីស៊ីមបាវ៉េ លោក Robert Mugabe ក្រោយពីលោកបានស្លាប់កាលពីថ្ងៃសុក្រ ទី៦ កញ្ញា នៅអាយុ ៩៥ នាប្រទេសសិង្ហបុរី។

ថ្លែងក្នុងសន្និសីទព័ត៌មាននៅថ្ងៃសុក្រ អ្នកនាំពាក្យក្រសួងការបរទេសចិន លោក Geng Shuang បានបញ្ជាក់បែបនេះថា៖«លោក Mugabe ជាមេដឹកនាំចលនារំដោះជាតិដ៏ឆ្នើមម្នាក់ និងជារដ្ឋបុរសនៃប្រទេសស៊ីមបាវ៉េ»។ នេះបើតាមការចុះផ្សាយទីភ្នាក់ងារចិន Xinhua ។

«ពេញមួយជីវិតរបស់លោក លោក Mugabe បានការពារអធិបតេយ្យភាព និងឯករាជ្យរបស់ប្រទេសលោកយ៉ាងមុតមាំ, ប្រឆាំងការលូកដៃពីសំណាក់បរទេស និងប្រឹងប្រែងលើកស្ទួយយ៉ាងសកម្មនូវកិច្ចសហប្រតិបត្តិ និង មិត្តភាពរវាង ស៊ីមបាវ៉េ-ចិន និង ចិន-អាហ្វ្រិក»។ លោក Geng លើកឡើងបែបនេះ ដោយសង្កត់ធ្ងន់ថា រដ្ឋាភិបាលចិន ចូលរួមរំលែកទុក្ខយ៉ាងជ្រាលជ្រៅចំពោះមរណភាពរបស់លោក Mugabe និងផ្ញើការអាណិតអាសូរដោយស្មោះដល់រដ្ឋាភិបាល ប្រជាជនស៊ីមបាវ៉េ ក៏ដូចជាជាសមាជិកគ្រួសារលោកផងដែរ។

អត្ថបទទាក់ទង

លោក Mugabe អតីតប្រធានាធិបតីស៊ីមបាវ៉េ ស្លាប់ក្នុងអាយុ៩៥ឆ្នាំនៅសិង្ហបុរី

សូមបញ្ជាក់ថា លោក Robert Mugabe អតីតប្រធានាធិបតីផ្តាច់ការស៊ីមបាវ៉េ បានទទួលមរណភាពក្នុងអាយុ៩៥ឆ្នាំនៅមន្ទីរពេទ្យប្រទេសសិង្ហបុរី។ យោងតាមការផ្សាយរបស់ CNN លោកប្រធានាធិបតីក្នុងតំណែងនាពេលបច្ចុប្បន្ន គឺលោក Emmerson Mnangagwa បានប្រកាសពីដំណឹងមរណភាពនេះដោយផ្ទាល់។

ដំណឹងផ្សេងៗ បានផ្សព្វផ្សាយថា អតីតប្រធានាធិបតីផ្តាច់ការរូបនេះ បានចំណាយពេលទៅព្យាបាលនៅមន្ទីរពេទ្យផ្កាយ៥ Gleneages Hospital ប្រទេសសិង្ហបុរី តាំងពីដើមឆ្នាំមក ដោយសារសុខភាពកាន់តែទ្រុឌទ្រោម។ លោក Mugabe បានកាន់អំណាច៣៧ឆ្នាំនៅស៊ីមបាវ៉េ ដោយក្នុងតួនាទីជានាយករដ្ឋមន្ត្រីពីឆ្នាំ១៩៨០ដល់ឆ្នាំ១៩៨៧ និងជាប្រធានាធិបតីពីឆ្នាំ១៩៨៧ ដល់ឆ្នាំ២០១៧ មុនពេលដែលកងកម្លាំងយោធាធ្វើរដ្ឋប្រហារទម្លាក់លោក។

បច្ចុប្បន្នសិង្ហបុរី និងស៊ីមបាវ៉េ កំពុងសហការគ្នារៀបចំដឹកសពអតីតមេដឹកនាំរូបនេះ ទៅកាន់ប្រទេសស៊ីមបាវ៉េ វិញ។ ក្រៅចិន អតីតប្រធានាធិបតីកុងហ្គោ លោក Joseph Kabila, ប្រធានាធិបតីអាហ្វ្រិកខាងត្បូង លោក Cyril Ramaphosa រួមទាំងថ្នាក់ដឹកនាំ និងអតីតថ្នាក់ដឹកនាំផ្សេងទៀត ក៏បានសម្តែងការសោកស្តាយផងដែរ។

ទោះបីជាយ៉ាងណាក៏ដោយ លោក Mugabe ក៏ទទួលនូវការរិះគន់ពីអន្តរជាតិផងដែរ នាអំឡុងពេលលោកកាន់អំណាចជិត៤០ឆ្នាំនៅស៊ីមបាវ៉េ តាមរយៈការដឹកនាំផ្តាច់ការ និងរំលោភសិទ្ធិមនុស្ស៕