នាយករដ្ឋមន្ត្រី​ថៃ ទទូច​ឲ្យ​ភាគី​ពាក់ព័ន្ធ​ព​ន្លឿ​ន​ការចរចា​កិច្ចព្រមព្រៀង​ពាណិជ្ជកម្ម RCEP ឲ្យ​ចប់​ត្រឹម​ឆ្នាំនេះ
អន្តរជាតិ
​​​​ន​យោ​​បាយ​​អន្តរ​ជាតិ​
នាយករដ្ឋមន្ត្រី​ថៃ ទទូច​ឲ្យ​ភាគី​ពាក់ព័ន្ធ​ព​ន្លឿ​ន​ការចរចា​កិច្ចព្រមព្រៀង​ពាណិជ្ជកម្ម RCEP ឲ្យ​ចប់​ត្រឹម​ឆ្នាំនេះ
08, Sep 2019 , 2:38 pm        
រូបភាព
លោក ប្រាយុទ្ធ ចន្ទ អូចា (កណ្តាល) នាជំនួប​រដ្ឋមន្ត្រីសេដ្ឋកិច្ចអាស៊ាន។ រូបភាព៖ រដ្ឋាភិបាលថៃ
លោក ប្រាយុទ្ធ ចន្ទ អូចា (កណ្តាល) នាជំនួប​រដ្ឋមន្ត្រីសេដ្ឋកិច្ចអាស៊ាន។ រូបភាព៖ រដ្ឋាភិបាលថៃ
ប្រមុខ​រដ្ឋាភិបាល​ថៃ លោក ប្រា​យុទ្ធ ចន្ទ អូ​ចា បាន​ទទូច​ឲ្យ​អាស៊ាន និង​ដៃគូ​សន្ទនា​របស់ខ្លួន​ព​ន្លឿ​ន​ការចរចា​លើ​លក្ខខណ្ឌ​នៃ​កិច្ចព្រមព្រៀង​ពាណិជ្ជកម្ម​ភាពជា​ដៃគូ​គ្រប់​ជ្រុងជ្រោយ​ក្នុង​តំបន់ ( RCEP) ឲ្យ​បាន​ចប់សព្វគ្រប់​ត្រឹម​បំណាច់​ខែវិច្ឆិកា​។ ប្រមុខ​ដឹកនាំ​ថៃ​រូបនេះ មើលឃើញថា ដំណើរការ​នៃ​ការចរចា​កិច្ចព្រមព្រៀង​ល្មម​នឹងត្រូវ​បញ្ចប់​ហើយ​។



​តាមរយៈ​សុន្ទរកថា​បើក​កិច្ចប្រជុំ​រដ្ឋមន្ត្រី​សេដ្ឋកិច្ច​អាស៊ាន​លើក​ទី​៥១ ក្នុង​រាជធានី​បាងកក លោកនាយក​រដ្ឋមន្ត្រី ប្រា​យុទ្ធ ចន្ទ អូ​ចា បាន​ថ្លែង​ទៅកាន់​រដ្ឋមន្ត្រី​អាស៊ាន​ទាំង​ដប់ និង​ដៃគូ​សន្ទនា​ទាំង​ប្រាំមួយ​ត្រូវតែ​ធ្វើការ​ជាមួយគ្នា​ដើម្បី​កសាង​ការតភ្ជាប់​ទាំង​ក្នុង និង​ក្រៅ ក្នុង​គោលដៅ​បញ្ចប់​ការចរចា​កិច្ចព្រមព្រៀង​ពាណិជ្ជកម្ម​ភាពជា​ដៃគូ​គ្រប់​ជ្រុងជ្រោយ​ក្នុង​តំបន់​ឲ្យ​បាន​ចប់​នៅត្រឹម​ឆ្នាំនេះ​។​

​លោកនាយ​រដ្ឋមន្ត្រី តាម​ការចុះផ្សាយ​របស់​សារព័ត៌មាន Bangkok បាន​លើកឡើងថា ការ​ព​ន្លឿ​ន​ការបញ្ចប់​ការចរចា​រវាង​ភាគី​ពាក់ព័ន្ធ នឹង​ឆ្លុះបញ្ចាំង​ឲ្យ​ឃើញ​ពី​ការទុកចិត្ត​គ្នា​ក្នុងចំណោម​ដៃគូ​ក្នុង​ការកសាង​ប្រព័ន្ធ​ពាណិជ្ជកម្ម និង​វិនិយោគ​រួមគ្នា​ក៏ដូចជា​បទដ្ឋាន ក្នុងការ​គ្រប់គ្រង​ពាណិជ្ជកម្ម​ពហុភាគី​។​

គួរ​ឲ្យ​សម្គាល់​នោះ ក្នុងជំនួប​ចុងក្រោយ​នៅ​ខែមិថុនា​កន្លងទៅ អាស៊ាន និង​ដៃគូ​សន្ទនា​របស់ខ្លួន បាន​ឯកភាពគ្នា​លើ​៧​ជំពូក នៃ​ជំពូក​សរុប​ទាំង​២០ របស់ RCEP ដែល​នេះ​មានន័យថា មុនពេល​ជំនួប​កំពូល​របស់​អាស៊ាន​នា​ខែវិច្ឆិកា​ខាងមុខនេះ រដ្ឋ​ភាគី ត្រូវ​ព​ន្លឿ​ន​ការចរចា​លើ​ចំណុច​ដែល​សេសសល់​ឲ្យ​បាន​ឆាប់​។

ក្នុងនាម​ជា​ម្ចាស់ផ្ទះ និង​ជា​ស្ថាបនិក​របស់​អាស៊ាន​ផង​នោះ ប្រមុខ​ដឹកនាំ​ថៃ​រូបនេះ បាន​អះអាងថា អាស៊ាន បានកកើតឡើង​ជាមួយ​នឹង​ក្តី​ស្រ​ម៉ៃ និង​ចក្ខុវិស័យ ចង់ឃើញ​តំបន់​មាន​ភាពរុងរឿង​តាមរយៈ​ស្ថិរភាព​នយោបាយ កំណើនសេដ្ឋកិច្ច និង​ការអភិវឌ្ឍ​សង្គម​។

គួរ​ជម្រាប​ថា អាស៊ាន ដែលមាន​រាជាណាចក្រ​ថៃ ជា​ប្រធាន​វិលជុំ បានរៀបចំ​កិច្ចប្រជុំ​រដ្ឋមន្ត្រី​សេដ្ឋកិច្ច​អាស៊ាន ( AEM) ដែល​ត្រូវ​ចាប់ផ្តើម​ពីថ្ងៃ​៨-១២ កញ្ញា​។ ជំនួប​នេះ ផ្តោតលើ​មាគ៌ា​ដែល​អាស៊ាន​ត្រូវ​ដើរ​ក្នុង​ដំណើរ​សមាហរណកម្ម​សេដ្ឋកិច្ច និង​ជាពិសេស​នោះ​លើ​ដំណើរ​ការចរចា​កិច្ចព្រមព្រៀង​ពាណិជ្ជកម្ម​សេរី RCEP​។​

RCEP  គឺជា​កិច្ចព្រមព្រៀង​ពាណិជ្ជកម្ម​មួយ​ដែល​ផ្តួចផ្តើម​ដោយ​រដ្ឋាភិបាល​ចិន​ក្នុង​ឆ្នាំ​២០១២​។ កិច្ចព្រមព្រៀង​ដែលមាន​ទំហំ​ពាណិជ្ជកម្ម​ស្មើនឹង​៣០​ភាគរយ នៃ​ផលិតផល​ក្នុងស្រុក​សរុប​របស់​ពិភពលោក បង្កើតឡើង​ដើម្បី​ប្រែក្លាយ​តំបន់​រដ្ឋ​អាស៊ាន និង​ដៃគូ​សន្ទនា​របស់ខ្លួន​ក្លាយជា​តំបន់​ពាណិជ្ជកម្ម​សេរី ខណៈ​ពិភពលោក លើកកម្ពស់​សាកលភាវូបនីយកម្ម​។

ភាគី​នៃ​កិច្ចព្រមព្រៀង​នេះ រាប់បញ្ចូល​សមាជិក​អាស៊ាន​ទាំង​ដប់ និង ដៃគូ​សន្ទនា​ផ្សេងទៀត​រួមមាន​ចិន ជប៉ុន កូរ៉េខាងត្បូង ឥណ្ឌា អូស្ត្រាលី និង ណូ​វែ​ល​សេ​ឡង់​។ តាមពិតទៅ RCEP គ្រោង​នឹង​បញ្ចប់​ការ​ព្រមព្រៀងគ្នា​តាំងពី​ឆ្នាំ ២០១៥ ប៉ុន្តែ​ត្រូវ​បន្ត​ពន្យារពេល​ជា​បន្តបន្ទាប់​រហូតមក​ទល់​ពេលនេះ​។ អាស៊ាន និង​ដៃគូ បាន​ប្តេជ្ញា​សម្រេច​ការចរចា​ឲ្យ​បាន​ត្រឹម​បំណាច់​ចុងឆ្នាំ​នេះ ខណៈ​អាស៊ាន​ដែលមាន​ថៃ​ជា​ប្រធាន នឹងមាន​ជំនួប​កំពូល​មួយទៀត នៅ​ខែវិច្ឆិកា​ខាងមុខ​៕



Tag:
 ថៃ​
  អាស៊ាន​
  RCEP
© រក្សាសិទ្ធិដោយ thmeythmey.com