ពីនេះ ពីនោះ
ព័ត៍មានសុខភាព
ងាយណាស់! សើចច្រើនៗ នឹងចម្រើនផលល្អទាំងនេះចំពោះសុខភាពរាងកាយមិនខាន
× ភាគច្រើននៃពួកយើងប្រហែលជាធ្លាប់បានឮទាក់ទងនឹងឃ្លាមួយដែលថា “សំណើច គឺជាថ្នាំដ៏ល្អបំផុតមួយ។” ប៉ុន្តែថាតើការសើចអាចប៉ះពាល់យ៉ាងណាខ្លះទៅចំពោះសុខភាពរបស់ពួកយើង? វាហាក់បីដូចជាសំណើចជួយធ្វើឲ្យរបៀបនៃការរស់នៅកាន់តែមានភាពប្រសើរឡើងពោរពេញដោយភាពរីករាយ។
ខាងក្រោមនេះយើង នឹងបង្ហាញឲ្យដឹងពីអត្ថប្រយោជន៍អស្ចារ្យនៃការសើចចំពោះសុខភាព ៖
១. កាត់បន្ថយស្ត្រេស ឬភាពតានតឹងក្នុងអារម្មណ៍
បំបាត់អាការៈនៃភាពតានតឹងក្នុងអារម្មណ៍ជាមួយនឹងសំណើច គឺជាវិធីដ៏ងាយ ប៉ុន្តែមានប្រសិទ្ធភាពខ្ពស់បំផុតដែលអ្នកគួរសាកល្បង។ ការស្ត្រេសអាចបង្កជំងឺគួរឲ្យព្រួយបារម្ភជាច្រើនចាប់ពីជំងឺបេះដូងដល់បញ្ហានៃជំងឺផ្លូវចិត្ត។ ដូច្នេះចូរព្យាយាមសើចអោយបានច្រើន ខណៈដែលវានឹងជួយកាត់បន្ថយកម្រិតនៃអ័រម៉ូនស្ត្រេស ព្រមទាំងរក្សាការបូមឈាមនៃបេះដូង។
២. កាត់បន្ថយបញ្ហាថប់អារម្មណ៍និងជំងឺធ្លាក់ទឹកចិត្ត (Depression)
នៅពេលថប់អារម្មណ៍ ឬបាក់ទឹកចិត្ត ២យ៉ាងដែលមនុស្សភាគច្រើនត្រូវការបំផុតនោះគឺអ្នកដែលស្រឡាញ់ពួកគេនិងសំណើច។ ការប្រយុទ្ធប្រឆាំងជំងឺធ្លាក់ទឹកចិត្តដោយការសើចជួយបង្កើនអារម្មណ៍ល្អនិងធ្វើអោយមុខងារនៃខួរក្បាលកាន់តែប្រសើរឡើង។ សំណើចត្រូវបានគេស្គាល់ថាអាចជួយព្យាបាលជំងឺធ្លាក់ទឹកចិត្តនិងបញ្ហាថប់អារម្មណ៍បានយ៉ាងមានប្រសិទ្ធភាព។
៣. កាត់បន្ថយហានិភ័យនៃជំងឺបេះដូង
នោះក៏ព្រោះតែការសើចធ្វើអោយសរសៃឈាមរីកដែលអាចនាំឈាមហូរកាត់យ៉ាងស្រួល ហើយអ្នកនឹងចៀសផុតបញ្ហាសម្ពាធឈាមឡើងខ្ពស់។ ខណៈដែលបញ្ហាសម្ពាធឈាមមិនប្រក្រតីជាមូលហេតុចម្បងនៃជំងឺបេះដូងនិងដាច់សរសៃឈាមខួរក្បាល។
៤. ទប់ស្កាត់ជំងឺមហារីក
សំណើចជាថ្នាំដ៏ប្រសើរបំផុតមួយសម្រាប់អ្នកជំងឺមហារីកដែលស្ថិតក្រោមការព្យាបាលដោយគីមីដោយវាជួយកាត់បន្ថយការឈឺចាប់និងភាពទុទ្ទិដ្ឋិនិយម។ មន្ទីរពេទ្យខ្លះប្រើប្រាស់ការសើចជាវិធីព្យាបាលដើម្បីជំរុញប្រព័ន្ធភាពស៊ាំរបស់អ្នកជំងឺឲ្យកាន់តែប្រសើរឡើង បង្កើនអារម្មណ៍ល្អ និងកាត់បន្ថយការឈឺចាប់។ សំណើចក៏អាចជួយបង្កើនបរិមាណនៃកោសិកាប្រឆាំងជំងឺមហារីកក្នុងរាងកាយផងដែរ។
៥. ជួយឲ្យគេងលក់បានស្កប់
អ្នកអាចទទួលបាននូវដំណេកដែលពោរពេញទៅដោយភាពស្ងប់និងមិនយល់សប្តិដោយគ្រាន់តែសើចអោយបានច្រើន។ យោងតាមការសិក្សាមួយដែលត្រូវបានធ្វើឡើងនៅក្នុងប្រទេសជប៉ុនអំពីទំនាក់ទំនងរវាងការសើចនិងការគេងបានបង្ហាញអោយដឹងថាអ្នកដែលសើចច្រើនកំឡុងពេលល្ងាច គឺទទួលបាននូវដំណេកមួយដ៏ស្ងប់ប្រសើរ។ ដូច្នេះដើម្បីអាចគេងលក់បានស្ងប់ ចូរមើលរឿងកំប្លែង ឬអានសៀវភៅកំប្លែងមុនពេលគេង។
៦. កាត់បន្ថយការឈឺចាប់
ការសើចជួយបង្កើនអ័រម៉ូន endorphins ក្នុងរាងកាយ ហើយអ័រម៉ូននេះជាសារធាតុគីមីនៅក្នុងខួរក្បាលដើរតួជាថ្នាំបំបាត់ការឈឺចាប់និងធ្វើអោយមានអារម្មណ៍ល្អ។ ការសិក្សាស្រាវជ្រាវមួយបានបង្ហាញថាអ្នកដែលមានបញ្ហាឈឺចាប់រ៉ាំរ៉ៃប្រែជាជួបប្រទះការឈឺចាប់តិចតួចវិញនៅពេលទទួលការព្យាបាលតាមរយៈការសើច៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com