ជាតិ
សេដ្ឋកិច្ច
២០២០ សហជីព ទារប្រាក់ខែ១៩៩ដុល្លារឲ្យកម្មករ ខណៈថៅកែសុំត្រឹម១៨៤ដុល្លារ រូបពីក្រសួងការងារ
× ក្រុមមេសហជីព ដែលតំណាងឲ្យកម្មករក្នុងវិស័យដាត់ដេរ សុំឲ្យម្ចាស់រោងចក្រ ដំឡើងប្រាក់ខែឲ្យដល់១៩៩ដុល្លារ នៅឆ្នាំ២០២០ តែតំណាងរោងចក្រ សុំត្រឹម១៨៤ដុល្លារបានហើយ។ ការចរចាពីប្រាក់ខែរបស់កម្មករនេះ គឺធ្វើឡើងក្នុងកិច្ចប្រជុំត្រីភាគី (រដ្ឋាភិបាល និយោជក និង មេសហជីព) កាលពីថ្ងៃទី៦ ខែកញ្ញា ឆ្នាំ២០១៩។
គេហទំព័រក្រសួងការងារ បានស្រង់សម្តីរបស់លោក ហេង សួរ រដ្ឋលេខាធិការក្រសួងការងារ ដែលប្រាប់ក្រុមអ្នកសែតក្រោយកិច្ចប្រជុំ ទៅចុះផ្សាយដូច្នេះថា៖«តួលេខលើកឡើងរវាងភាគីនិយោជក និងភាគីសហជីព មិនចម្លែកទេ បើប្រៀបធៀបនឹងឆ្នាំកន្លងទៅ ដែលជាទូទៅភាគីនីមួយៗ តែងតែបង្ហាញតួលេខផ្តើមចេញពីខ្ពស់ រីឯម្ខាងទៀត ផ្តើមចេញពីទាប ហើយអ្វីទាំងអស់នេះ យើង នឹងកែសម្រួលគោលជំហរបន្តទៀតនៅពេលប្រជុំថ្ងៃខាងមុខ ដោយយោងទៅតាមលក្ខណៈវិនិច្ឆ័យតាមបែបសង្គមនិងសេដ្ឋកិច្ច....»។
យ៉ាងណាក៏ដោយ ភាគីទាំងបី មិនទាន់អាចសម្រេចរួមគ្នានៅឡើយទេអំពីប្រាក់ខែរបស់កម្មករសម្រាប់ឆ្នាំ២០២០។ ភាគីទាំងបី នឹងបើកកិច្ចប្រជុំបន្តទៀត នៅថ្ងៃទី១២ ខែកញ្ញាខាងមុខ។
បច្ចុប្បន្ន ប្រាក់ខែរបស់កម្មករ គឺ១៨២ដុល្លារ។ ក្នុងឆ្នាំ២០១៨ ប្រាក់ខែកម្មករ គឺ១៧៥ដុល្លារ៕
© រក្សាសិទ្ធិដោយ thmeythmey.com