ហេតុអ្វីផ្លូវក្នុងក្រុងសៀមរាបខូចច្រើន ហើយមិនជួសជុល? ស្តាប់ប្រធានមន្ទីរសាធារណការបកស្រាយ

ជាតិ

ហេតុអ្វីផ្លូវក្នុងក្រុងសៀមរាបខូចច្រើន ហើយមិនជួសជុល? ស្តាប់ប្រធានមន្ទីរសាធារណការបកស្រាយ

09, Sep 2019 , 9:39 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ គិតមកដល់ថ្ងៃទី៩ ខែកញ្ញា គឺមានរយៈពេល២៦ថ្ងៃហើយ ដែលលោក គី វីរិន្ទ ឡើងជាប្រធានមន្ទីរសាធារណការ និងដឹកជញ្ជូនខេត្តសៀមរាប ជំនួសលោក គឹម ប៉ុណ្ណា ដែលត្រូវឡើងជាអនុរដ្ឋលេខាធិការក្រសួងសាធារណការ។ ការរិះគន់ចំពោះបញ្ហាផ្លូវថ្នល់ក្នុងក្រុងសៀមរាបមិនមែនទើបតែកើតនោះទេ ជារួមគឺកើតឡើងច្រើនឆ្នាំមកហើយ ដ្បិតប្រជាពលរដ្ឋមើលឃើញថាហេដ្ឋារចនាសម្ព័ន្ធក្នុងខេត្តនេះមិនស័ក្ដិសមនឹងខេត្តទេសចរណ៍ឡើយ។

ថ្មីៗនេះ ដោយសារភ្លៀងធ្លាក់ជាបន្តបន្ទាប់ ធ្វើឱ្យផ្លូវថ្នល់ដែលខូចខាតតិចតួច កាន់តែរីក ក្លាយជាជង្ហុកធំៗ ផ្លូវខ្លះបែកភក់ ធ្វើឱ្យការធ្វើដំណើររបស់ប្រជាពលរដ្ឋមានការពិបាក។ ជាមួយគ្នានេះ ផ្លូវសំខាន់ៗដែលបានបើកការដ្ឋានជួសជុលរួចហើយនោះ ក៏មិនទាន់ដំណើរការផងដែរ បន្ទាប់ពីមានការឈូសឆាយបានខ្លះហើយនោះ។ ការណ៍នេះ ធ្វើឱ្យប្រជាពលរដ្ឋមានការងឿងឆ្ងល់ និងរិះគន់អាជ្ញាធរកាន់តែខ្លាំង។

ប្រធានមន្ទីរសាធារណការថ្មី លោក គី វីរិន្ទ បានចេញមុខធ្វើសន្និសីទកាសែតនៅថ្ងៃទី៧ កញ្ញា ដើម្បីបំភ្លឺពីរឿងនេះ។ លោក គី វីរិន្ទ ពន្យល់ថា ផ្លូវក្នុងក្រុងសៀមរាបដែលរងការខូចខាតគឺសុទ្ធសឹងមានគម្រោងអភិវឌ្ឍន៍និងជួសជុលថ្មីហើយ ដែលក្នុងនោះមានទាំងគម្រោងរបស់ខេត្តនិងមន្ទីរ។ ឆ្លើយតបនឹងផ្លូវក្រវ៉ាត់ក្រុងនិងផ្លូវខ្នារចាញ់ដែលសរុបប្រវែងប្រមាណ៧គីឡូម៉ែត្រ ដែលបើកការដ្ឋានជិតមួយខែហើយ តែមិនទាន់បន្តការជួសជុលនោះ លោកប្រធានសាធារណការបកស្រាយថា ដោយសារប៉ុន្មានថ្ងៃមុន «មានភ្លៀងធ្លាក់ច្រើនពេក និងស្របពេលដែលមន្ទីរកំពុងខ្វះខាតថវិកា» ទើបធ្វើឱ្យការជួសជុលមានភាពយឺតយ៉ាវ។

ជាមួយគ្នានេះដែរ លោក គី វីរិន្ទ ក៏សុំការយោគយល់ពីប្រជាពលរដ្ឋ ហើយថាបន្ទាប់ពីឡើងជាប្រធានសាធារណការមក លោកបានធ្វើការងារជាច្រើន បំណងដើម្បីអភិវឌ្ឍហេដ្ឋារចនាសម្ព័ន្ធក្នុងខេត្តសៀមរាបឱ្យបានល្អប្រសើរ៕