ហេតុអ្វីប្រកាសលទ្ធផលបាក់ឌុបនៅភ្នំពេញ និងកណ្តាល មុនបណ្តាខេត្ត? អ្នកនាំពាក្យពន្យល់

ជាតិ

បាក់ឌុប

សង្គមជាតិ

ហេតុអ្វីប្រកាសលទ្ធផលបាក់ឌុបនៅភ្នំពេញ និងកណ្តាល មុនបណ្តាខេត្ត? អ្នកនាំពាក្យពន្យល់

09, Sep 2019 , 5:33 pm

រូបភាព

ដោយ:

បេក្ខជននៅរាជធានី និងកណ្តាល ដឹងច្បាស់ថា ខ្លួនជាប់ ឬធ្លាក់សញ្ញាបត្រមធ្យមសិក្សាទុតិយភូមិ (បាក់ឌុប) រួចអស់ហើយនៅថ្ងៃចន្ទនេះ ដោយឡែកបណ្តាខេត្តផ្សេងទៀត ត្រូវរង់ចាំដល់ថ្ងៃស្អែក ទើបដឹងពីវាសនារបស់ខ្លួន។

ទាក់ទងនឹងការប្រកាសលទ្ធផលបាក់ឌុបសម្រាប់រាជធានីភ្នំពេញ និងខេត្តកណ្តាល មុនបណ្តាខេត្ត ត្រូវបានអ្នកនាំពាក្យក្រសួងអប់រំ យុវជន និងកីឡា អះអាងថា គ្មានអ្វីខុសប្លែកនោះឡើយ ពោលគឺដូចអ្វីដែលបានធ្វើអស់រយៈពេល៥ឆ្នាំកន្លងមក។

អ្នកនាំពាក្យរូបនេះ បានលើកឡើងពីហេតុផលថា៖ «រាជធានីភ្នំពេញ និងខេត្តកណ្តាលត្រូវប្រកាសមុនបណ្តាខេត្ត គឺដោយសារតែក្រសួងតម្រូវឲ្យអ្នកតំណាងខេត្តផ្សេងៗ ត្រូវឡើងមកទទួលយកបញ្ជីប្រកាសលទ្ធផលប្រឡងបាក់ឌុប នៅបន្ទប់បូកសរុបរបាយការណ៍ របស់អគាររដ្ឋបាលក្រសួងអប់រំ សម្រាប់បិទនៅតាមមណ្ឌលប្រឡងនីមួយៗ»។

លោក រស់ សុវាចា បានពន្យល់ថា សម្រាប់លទ្ធផលបាក់ឌុបដែលព្រីនជាក្រដាស គឺតម្រូវឲ្យខេត្តដែលនៅឆ្ងាយៗ មកយកលទ្ធផលនៅភ្នំពេញ។ និយាយរួម ករណីនេះ គឺទាក់ទងនឹងទីតាំងភូមិសាស្ត្រ។

សូមបញ្ជាក់ថា ការប្រកាសលទ្ធផលប្រឡងបាក់ឌុបសម្រាប់រាជធានីភ្នំពេញ និងខេត្តកណ្តាល ប្រកាសនារសៀលថ្ងៃចន្ទនេះ ចំណែកបណ្តាខេត្តផ្សេងៗនឹងប្រកាសនៅព្រឹកថ្ងៃអង្គារ ថ្ងៃទី១០ ខែកញ្ញា៕