អន្តរជាតិ
វៀតណាម សន្យានាំចូលទំនិញបន្ថែមពីអាមេរិក កំពង់ផែក្រុង ដាណាង វៀតណាម (ប្រភពរូប៖ AFP)
× វៀតណាម សន្យានាំចូលទំនិញបន្ថែមពីសហរដ្ឋអាមេរិកដើម្បីផ្គាប់ចិត្តក្រុងវ៉ាស៊ីនតោន ពាក់ព័ន្ធនឹងអតិរេកពាណិជ្ជកម្មដែលកំពុងប៉ោងឡើង។ ហើយមួយទៀត គឺដើម្បីលុបបំបាត់ការយល់ឃើញថា ក្រុងហាណូយ កេងចំណេញពីសង្គ្រាមពាណិជ្ជកម្មអាមេរិក-ចិន ។ នេះបើតាមការលើកឡើងរបស់មន្ត្រីនៃប្រទេសទាំងពីរ។
ក្នុងជំនួបកាលពីថ្មីៗនេះ ជាមួយមន្ត្រីការទូត និងអ្នកជំនាញអាមេរិក មន្ត្រីវៀតណាម លើកឡើងពីគម្រោងបង្កើនការនាំចូលផលិតផល ដែលក្នុងនោះរួមមាន ធ្យូងថ្ម ឧស្ម័នធម្មជាតិ សាច់ ផ្លែឈើ និងផលិតផលកសិកម្មផ្សេងទៀត។ នេះបើតាមការចុះផ្សាយរបស់កាសែតអាមេរិក Financial Times នៅថ្ងៃទី៦ ខែកញ្ញា។
កិច្ចពិភាក្សានេះ ធ្វើឡើងក្រោយពីប្រធានាធិបតីអាមេរិក ដូណាល់ ត្រាំ កាលពីខែមិថុនា បានចាត់ទុកវៀតណាមជាអ្នករំលោភបំពានដ៏អាក្រក់បំផុតក្នុងបញ្ហាពាណិជ្ជកម្ម។ ការលើកឡើងរបស់លោកបែបនេះ បង្កើតជាកង្វល់ដល់ទីក្រុង ហាណូយថា ប្រទេសក្នុងតំបន់អាស៊ីអាគ្នេយ៍មួយនេះ អាចជាគោលដៅបន្ទាប់នៃបញ្ជីដំឡើងពន្ធរបស់រដ្ឋបាលលោកត្រាំ។
របាយការណ៍មួយចំនួន បង្ហាញថា អតិរេកពាណិជ្ជកម្មរបសវៀតណាមជាមួយសហរដ្ឋអាមេរិក ដែលជាទីផ្សារនាំចេញដ៏ធំរបស់ខ្លួន បានកើនដល់ ៣៩,៥ពាន់លានដុល្លារ កាលពីឆ្នាំ ២០១៨ ហើយកំពុងឆ្ពោះទៅបំបែកកំណត់ត្រាថ្មី ក្នុងឆ្នាំ២០១៩នេះ។
ចាប់តាំងពីផ្ទុះសង្គ្រាមពាណិជ្ជកម្មកាលពីដើមឆ្នាំ២០១៨មក ក្រុមហ៊ុនអាមេរិកខ្លះ បានបិទទ្វាររោងចក្រខ្លួនក្នុងប្រទេសចិន ដោយសារការដំឡើងពន្ធនាំចូលខ្ពស់ពេក។ ហើយពួកគេ កំពុងសម្លឹងមើលវៀតណាម និងបណ្តាប្រទេសក្នុងតំបន់អាស៊ីអាគ្នេយ៍ដទៃទៀត ជាទីតាំងបង្កើតរោងចក្រជំនួសចិន។
លោក Pete Rickett ដែលជាអភិបាលរដ្ឋ Nebraska បានធ្វើទស្សនកិច្ចនៅទីក្រុងហាណូយ កាលពីសប្តាហ៍មុន។ ប្រាប់កាសែត Financial Times លោក Ricketts បញ្ជាក់ឲ្យដឹងថា ខណៈចិនបញ្ឈប់ការនាំចូលផលិតកម្មកសិកម្មពីសហរដ្ឋអាមេរិក ក្រុងវ៉ាស៊ីនតោន ចាំបាច់ត្រូវធ្វើពិពិធកម្មទីផ្សារ។ លោក សង្កត់ធ្ងន់ថា៖ «យើង ចង់ស្វែងរកទីផ្សារផ្សេងទៀតនៅតំបន់អាស៊ីអាគ្នេយ៍ សម្រាប់កសិករអាមេរិកដើម្បីលក់ផលិតផលខ្លួន»។
សូមបញ្ជាក់ថា វៀតណាម ជាប្រទេសដែលកេងផលចំណេញច្រើនបំផុតមួយពីចំហាយសង្គ្រាមពាណិជ្ជកម្ម ព្រោះថាវាផលិតទំនិញដូចគ្នាជាច្រើន ដែលជាគោលដៅនៃការដំឡើងពន្ធអាមេរិកប្រឆាំងចិន។ ប្រទេសនេះ ទទួលការវិនិយោគបរទេសថ្មីៗជាច្រើន ដោយសារ លក្ខខណ្ឌវិនិយោគល្អជាច្រើន ដូចជា តម្លៃពលកម្មទាប និងកម្លាំងច្រើនហូរហៀជាដើម ៕
Tag:
វៀតណាម
សហរដ្ឋអាមេរិក
ដូណាល់ត្រាំ
© រក្សាសិទ្ធិដោយ thmeythmey.com