Euro 2020៖ ជ័យជម្នះរបស់ហូឡង់ និងអាល្លឺម៉ង់ នាំឲ្យពូល C ប្រទាញប្រទង់ខ្លាំង

កីឡាអន្តរជាតិ

អន្តរជាតិ

Euro 2020៖ ជ័យជម្នះរបស់ហូឡង់ និងអាល្លឺម៉ង់ នាំឲ្យពូល C ប្រទាញប្រទង់ខ្លាំង

10, Sep 2019 , 11:23 am

រូបភាព

ដោយ: ទេព ពិទូរ្យ

ជ័យជម្នះរបស់ក្រុមជម្រើសជាតិហូឡង់លើក្រុមអេស្តូនីក្នុងលទ្ធផល ៤-០ ជាការដាក់សម្ពាធលើអៀរឡង់ខាងជើងដែលប្រកួតចាញ់អាល្លឺម៉ង់ ២-០ នាការប្រកួតវគ្គជម្រុះ Euro 2020 នៅយប់ថ្ងៃទី៩ ខែកញ្ញា។ ក្នុងពូល C នេះ អាល្លឺម៉ង់ និងអៀរឡង់ខាងជើងមាន១២ពិន្ទុដូចគ្នា ខណៈហូឡង់មាន៩ពិន្ទុ ប៉ុន្តែសល់១ប្រកួតក្នុងដៃ។

៤គ្រាប់ដែលសម្រេចទីបានដោយ ខ្សែប្រយុទ្ធ Ryan Babel ពីរគ្រាប់ Memphis Depay មួយគ្រាប់ និង Georginio Wijnaldum មួយគ្រាប់ បានជួយឲ្យក្រុមរបស់លោក Ronald Koeman ទទួលបាន៣ពិន្ទុបន្ថែមសម្រាប់ជំនួបលើកទី៤នេះ។ ក្រុមរហស្សនាមទឹកក្រូចទទួលបាន៩ពិន្ទុពីការប្រកួត៤លើក ស្ថិតនៅចំណាត់ថ្នាក់ទី៣ ពូល C តាមពីក្រោយក្រុមលេខ២ អៀរឡង់ខាងជើង និងក្រុមកំពូលតារាងអាល្លឺម៉ង់ដែលប្រកួត៥លើកដូចគ្នាមាន១២ពិន្ទុ។

បរាជ័យរបស់អៀរឡង់ខាងជើង ក្រោមថ្វីជើងក្រុមឥន្ទ្រីដែកក្នុងលទ្ធផល ២-០ ដែលស៊ុតបញ្ចូលទីដោយ Marcel Halstenberg និងខ្សែប្រយុទ្ធ Serge Gnabry បានបង្កការលំបាកដល់អៀរឡង់ខាងជើងក្នុងការប្រជែងកៅអីទៅវគ្គផ្តាច់ព្រ័ត្រពាន់រង្វាន់ទ្វីបអឺរ៉ុបឆ្នាំ២០២០ ប៉ុន្តែបានផ្តល់ឱកាសឲ្យហូឡង់ច្រើនវិញ។

ជំនួបបន្ទាប់ សម្រាប់ការប្រកួតលើកទី៥របស់ហូឡង់ដែលជាក្រុមកំពុងឡើងជើងខ្លាំង ត្រូវបើកទ្វារទទួលភ្ញៀវអៀរឡង់ខាងជើងដែលជាប្រកួតលើកទី៦។ ប្រសិនបើហូឡង់ឈ្នះ នោះអៀរឡង់ខាងជើងនឹងធ្លាក់ទៅលេខ៣ ក្នុងពូល C វិញ ខណៈអាល្លឺម៉ង់មានភាគរយខ្ពស់ក្នុងការរក្សាចំណាត់កំពូលតារាង ដ្បិតប៉ះក្រុមខ្សោយបេឡារុស៕