FIFA
កីឡាជាតិ
ជាតិ
លោក Honda លើកទឹកចិត្តកីឡាករពេលចាញ់ តែក៏ជាសារផ្តល់កម្លាំងចិត្តដល់អ្នកគាំទ្រផងដែរ
× ក្រោយកម្ពុជាចាញ់បារ៉ែន ១-០ អ្នកចាត់ការទូទៅក្រុមជម្រើសជាតិកម្ពុជាលោក Keisuke Honda បានប្រាប់ឲ្យកីឡាករកុំបាក់ទឹកចិត្ត និងថា ពួកគេជាក្តីសុបិនរបស់អ្នកគាំទ្រ។ សាររបស់លោក មិនត្រឹមតែជួយលើកទឹកចិត្តកីឡាករឲ្យបន្តខិតខំប្រឹងប្រែងប៉ុណ្ណោះទេ ថែមទាំងទទួលបានការគាំទ្រយ៉ាងច្រើនពីអ្នកគាំទ្រ។
«អ្នកជាសុបិនរបស់ពួកគេ (អ្នកគាំទ្រ)។ ដូច្នេះសូមកុំធ្វើយ៉ាងដូច្នេះ [កុំបាក់ទឹកចិត្ត]! ទេ ទេ ទេ! ត្រូវនិយាយទៅកាន់អ្នកគាំទ្រ! អរគុណ អរគុណ បែបនេះ! ត្រូវមានមោទកភាពចំពោះខ្លួន អូខេ? នេះហើយជាក្រុមបាល់ទាត់»។ នេះជាសម្តីរបស់លោក Keisuke Honda ប្រាប់ទៅកាន់កីឡាករជម្រើសជាតិកម្ពុជាក្រោយប្រកួតចាញ់បារ៉ែន ១-០ នាវគ្គជម្រុះ World Cup ជុំទី២ កាលពីល្ងាចថ្ងៃទី១០ កញ្ញា នាពហុកីឡដ្ឋានជាតិ។
ការលើកឡើងបែបនេះ របស់លោក Honda ធ្វើឡើងពេលជួបជុំមុនក្រុមជម្រើសជាតិកម្ពុជាដើរគោរព និងថ្លែងអំណរគុណដល់អ្នកគាំទ្រក្រោយការប្រកួតនៅពហុកីឡដ្ឋានជាតិ។ លោកបានបន្ថែមថា៖«ប្រហែលជាបន្ទាប់ពីការបរាជ័យ អ្នកទាំងអស់គ្នាអាចគិតថា មិនអាចញញឹមបានឡើយ ប៉ុន្តែអ្នកទាំងអស់គ្នាគួរតែរីករាយ។ តើអ្នកទាំងអស់គ្នាដឹងទេ? ខ្ញុំគោរពអ្នកទាំងអស់គ្នា ពួកគេ [អ្នកគាំទ្រ] ក៏គោរពអ្នកទាំងអស់គ្នាដែរ។ នេះជាមូលហេតុដែលអ្នកត្រូវបង្ហាញទៅពួកគេ ដោយនិយាយថា «អរគុណដែលបានមកគាំទ្រ»។
សាររបស់លោក Honda មិនតែជួយលើកទឹកចិត្តកីឡាករឲ្យបន្តការខិតខំប្រឹងប្រែងហ្វឹកហាត់កាន់តែខ្លាំងនោះទេ ថែមទាំងទទួលបានការកោតសរសើរ និងគាំទ្រយ៉ាងច្រើនពីប្រជាពលរដ្ឋកម្ពុជា ពិសេសលើការដឹកនាំ និងប្រព័ន្ធរៀបចំ ដែលធ្វើឲ្យទម្រង់លេងរបស់ក្រុមជម្រើសជាតិកម្ពុជាកាន់តែមានភាពទាក់ទាញ។
តាមរយៈវីដេអូរយៈពេល៤៤វិនាទី ដែលបង្ហោះដោយសារព័ត៌មាន Thmey Thmey នៅយប់ថ្ងៃទី១០ ខែកញ្ញា មានអ្នកចូលមើលជាង៧៣,០០០នាក់(ជាង76K) និងចែករំលែកជាង១,២០០នាក់(ជាង1.2K)(គិតត្រឹមម៉ោង៤:៥០នាទីថ្ងៃទី១១ ខែកញ្ញា)។ ពិសេសក្នុងចំណោមអ្នកផ្តល់យោបល់(Comment)ជាង១៥០នាក់បានសរសើរលើទម្រង់លេងរបស់កីឡាករកម្ពុជា ក្រោមការដឹកនាំរបស់លោក Keisuke Honda ដែលមានលោក Felix Dalmas ជាគ្រូបង្វឹក និងក្រុមការងារ។
ជាក់ស្តែងទំព័រហ្វេសប៊ុកមានឈ្មោះ សុ ភាព បានសរសេរសារដោយភ្ជាប់ជាមួយទង់ជាតិជប៉ុន អាហ្សង់ទីន និងកម្ពុជារៀបរាប់យ៉ាងដូច្នេះថា៖«នេះទើបជាក្រុមជម្រើសជាតិលេងតំណាងជាតិមែន។ ដាវមួយនេះ ទើបលុត និងសម្លៀងបានប៉ុណ្ណេះប្រើបានប៉ុណ្ណេះល្អពេកណាស់ទៅហើយ ពិតណាស់យើងចាញ់តែចាញ់យ៉ាងសប្បាយចិត្ត។ យើងគ្មានអ្នកណាម្នាក់ជាតារាទេ តែយើងមានក្រុមតារាជម្រើសជាតិមួយក្រុមរះភ្លឺពេញក្នុងចិត្តប្រជាជនខ្មែរ។ អគុណអ្នកទាំងអស់គ្នា អគុណលោកគ្រូ Honda លោកគ្រូ Felix»។
ជាមួយគ្នានេះ ទំព័រហ្វេសប៊ុកមានឈ្មោះជាភាសាអង់គ្លេស Leakhena Chhem ក្រៅពីសរសើរទម្រង់លេងរបស់ក្រុមជម្រើសជាតិកម្ពុជាបានឆ្លៀតដាស់តឿនកីឡាករកម្ពុជាកុំឲ្យបោះបង់ការតស៊ូព្យាយាម និងជឿជាក់ថា កម្ពុជានឹងធ្វើបានល្អក្នុងការប្រកួតក្រោយៗទៀត។ ហ្វេសប៊ុកនេះសរសេរដូច្នេះថា៖«អរគុណកីឡាករជម្រើសជាតិទាំងអស់គ្នា ដែលខំប្រឹងគ្រប់ការប្រកួតដើម្បីហ្វេន ដែលជាអ្នកគាំទ្ររបស់កម្ពុជាទូទាំងប្រទេស។ កីឡាករទាំងអស់គ្នា គឺបានស្ថិតនៅក្នុងបេះដូងរបស់អ្នកគាំទ្រកម្ពុជា រួចរាល់ហើយ ដូច្នេះសូមកុំបោះបង់ ការតស៊ូ ព្យាយាម ខ្ញុំជឿថា គោព្រៃកម្ពុជាប្រាកដជាធ្វើបានល្អនៅជំនួបលើកក្រោយៗទៀត»។
ជាមួយគ្នា អ្នកចូលរួមបញ្ចេញមតិយោបល់ដែលជាជនបរទេស ក៏បានកោតសរសើរពីទម្រង់លេងរបស់កម្ពុជាផងដែរ ដោយអ្នកខ្លះជឿជាក់ថា កម្ពុជានឹងក្លាយជាក្រុមដ៏ប្រកួតប្រជែងមួយក្នុងតំបន់៕
Tag:
World Cup
Keisuke Honda
ជម្រើសជាតិកម្ពុជា
© រក្សាសិទ្ធិដោយ thmeythmey.com