ជាតិ
បាក់ឌុប
ក្រសួងអប់រំ៖ មន្ត្រីធ្វើការពេញដោយបទពិសោធន៍ និងជំនាញ ដូច្នេះលទ្ធផលបាក់ឌុបគឺសុក្រឹត
លោករដ្ឋមន្ត្រី ហង់ ជួន ណារ៉ុន ចុះពិនិត្យផ្ទាល់រាល់ដំណាក់កាល។ រូបថត MoEYS Cambodia
×![]()
ភ្នំពេញ៖ ដំណើរការគ្រប់ដំណាក់កាលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១៩ សីហា ២០១៩ ត្រូវបានក្រសួងអប់រំ យុវជន និងកីឡា អះអាងថា អាចទទួលយកបាន ដោយសារតែមន្ត្រីដែលទទួលបន្ទុក ធ្វើការប្រកបដោយជំនាញ និងមានបទពិសោធន៍ខ្ពស់។ សេចក្តីប្រកាសព័ត៌មានរបស់ក្រសួង នាថ្ងៃទី១២ ខែកញ្ញា នេះ ដែរ ក៏បានលើកឡើងជាពិសេសទាក់ទងនឹងសុក្រឹតភាពនៃការស្រង់ពិន្ទុតាមប្រព័ន្ធកុំព្យូទ័រផងដែរ។
អត្ថបទទាក់ទង
បន្ទាប់ពីមានបេក្ខជនប្រមាណ១០០នាក់ ដោយខ្លះពុំសុខចិត្តលើលទ្ធផលប្រឡងធ្លាក់ និងបេក្ខជនមួយចំនួនទៀតពុំសុខចិត្តលទ្ធផលដែលខ្លួនទទួលនិទ្ទេស B ឬ C នោះ ក្រសួងអប់រំ យុវជន និងកីឡា បានចេញសេចក្តីប្រកាសព័ត៌មាន ដើម្បីបញ្ជាក់ពីសុក្រឹតភាពនៃការងាររបស់ខ្លួន ជាមួយនឹងការបកស្រាយ៦ចំណុច។
ក្រសួងបានអះអាងថា ដំណាក់កាលសំណេរ កំណែ និងបូកស្រង់ពិន្ទុ មានយន្តការត្រួតពិនិត្យផ្នែកបច្ចេកទេសយ៉ាងហ្មត់ចត់ តាមរយៈការបង្កើតគណៈកម្មការបច្ចេកទេសជាច្រើន ដោយមន្ត្រីដែលបំពេញភារកិច្ចទាំងនោះ ពោលគឺសាស្ត្រាចារ្យប្រកបដោយបទពិសោធន៍ខ្ពស់ បានអនុវត្តបានគោលការណ៍ច្បាប់ រក្សាយុតិ្តធម៌ និងសម្ងាត់។
ទាក់ទងនឹងដំណាក់កាលបូកស្រង់ពិន្ទុដោយប្រើប្រាស់កុំព្យូទ័រ ក្រសួងអប់រំ បានបង្កើតមជ្ឈមណ្ឌលបូកស្រង់ពិន្ទុ ដោយបានកែលម្អប្រព័ន្ធហេដ្ឋារចនាសម្ព័ន្ធ Hardware និងដាក់ឱ្យប្រើប្រាស់នូវប្រព័ន្ធSoftwareថ្មី ព្រមទាំងមានការត្រួតពិនិត្យដែលអនុវត្តទៅតាមProtocol បច្ចេកវិទ្យា និងគណៈកម្មការត្រួតពិនិត្យផ្ទៀងផ្ទាត់។
រួមជាមួយនឹងដំណើរអនុវត្តទាំងនេះ មន្ត្រីអប់រំដែលក្រសួងជ្រើសរើសឱ្យមកបំពេញភារកិច្ចក្នុងដំណើរការបញ្ជូលពិន្ទុលើប្រព័ន្ធកុំព្យូទ័រ បានឆ្លងកាត់ការប្រឡងធ្វើតេស្តសមត្ថភាព និងវគ្គបំប៉នបចេ្ចកទេសបន្ថែមនេះបើយោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា នាថ្ងៃទី១២កញ្ញា។
ការកែសន្លឹកិច្ចការរបស់បេក្ខជន ត្រូវបានធ្វើឡើងដោយមានលក្ខណៈសម្ងាត់និងយុត្តិធម៌ តាមរយៈការផ្តល់ពិន្ទុដោយសាស្ត្រចារ្យ២រូប លើសន្លឹកកិច្ចការតែមួយ ដើម្បីធានាសង្គតិភាពលើកការកែនេះ។
ជាលទ្ធផលនៃដំណើរការកែនិងបូកស្រង់ពិន្ទុ របស់បេក្ខជនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ក្នុងសម័យប្រឡង១៩-២០សីហា ឆ្នាំ២០១៩ មាន បេក្ខជនប្រឡងជាប់ស្ថាពរសរុប ៧៩,០៥២នាក់ ស្មើនឹង៦៨,៦២ភាគរយ ក្នុងចំណោមបេក្ខជនដែលមានវត្តមានក្នុងការប្រឡងចំនួន១១៥,២០៨នាក់។ ក្រសួងបានបន្ថែមថា៖ «ចំនួនបេក្ខជនដែលជាប់បាក់ឌុបនេះ គឺជាលទ្ធផលដែលមិនអាចកាត់ផ្តាច់បាន អំពីកិច្ចខិតខំប្រឹងប្រែងរបស់មន្ត្រីអប់រំ គ្រប់គណៈកម្មការទាំងអស់ និងការគាំទ្រយ៉ាងពេញទំហឹងបំផុតពីសំណាក់ស្ថាប័នពាក់ព័ន្ធជាច្រើន»។
ការតវ៉ារបស់បេក្ខជន មានមួយចំនួនពុំសុខចិត្តលើលទ្ធផល ធ្លាក់ ប៉ុន្តែមួយចំនួនទៀត ពុំសុខចិត្តដោយសារទទួលបាននិទ្ទេសត្រឹម B ឬ C ហើយពួកគេទាមទារយកនិទ្ទេស A។ ក្រៅពីបង្ហាញការជឿជាក់លើមន្ត្រីរបស់ខ្លួន ក្រសួងបានរំលឹកថា លទ្ធផលប្រឡងនេះគឺឆ្លុះបញ្ចាំងសារសំខាន់បីយ៉ាង។ ទី១.អ្នកចេះគឺជាប់ ទី២. ការប្រឡងប្រព្រឹត្តទៅដោយយុតិ្តធម៌ តម្លាភាពគោលការណ៍ច្បាប់ និងភាពទទួលយកបាន។ ទី៣. លទ្ធផលប្រឡងពុំមែនជាការកំណត់វាសនារបស់បេក្ខជនទេ ប៉ុន្តែជាការវាស់ស្ទង់សមត្ថភាព និងជំរុញឱ្យមានការខិតខំប្រឹងបន្តទៅមុខទៀត៕
© រក្សាសិទ្ធិដោយ thmeythmey.com
