ជាតិ
បាក់ឌុប
សង្គមជាតិ
សាកលវិទ្យាល័យនានា ប្រកាសផ្តល់អាហារូបករណ៍
× ភ្នំពេញ៖ បណ្តាសាកលវិទ្យាល័យនានានៅកម្ពុជា បានប្រកាសផ្តល់អាហារូបករណ៍ជាបន្តបន្ទាប់ ដល់សិស្ស ដែលប្រឡងជាប់បាក់ឌុប នាឆ្នាំ២០១៩ ក៏ដូចជាអ្នកដែលប្រឡងជាប់កាលពីឆ្នាំកន្លងៗទៅផងដែរ។
សាកលវិទ្យាល័យ ដែលផ្តល់អាហារូបករណ៍១០០ភាគរយ ដល់សិស្សដែលប្រឡងជាប់បាក់ឌុបឆ្នាំនេះ មានសាកលវិទ្យាល័យកម្ពុជា (UC) គឺផ្តល់ឲ្យ៥០០កន្លែង លើជំនាញច្បាប់ ភាសាបរទេស សិល្បៈ និង ការសិក្សាអំពីព័ត៌មាន គ្រប់គ្រងពាណិជ្ជកម្ម ព័ត៌មានវិទ្យា ការអប់រំ ទំនាក់ទំនងអន្តរជាតិ សិល្បៈតន្ត្រី និង ចម្រៀង។ ការដាក់ពា្យសម្រាប់អាហារូបករណ៍នេះ នឹងផុតកំណត់ នៅថ្ងៃទី១ ខែតុលា ឆ្នាំ២០១៩។
សាកលវិទ្យាល័យជាតិគ្រប់គ្រង ផ្តល់អាហារូបករណ៍៩០កន្លែង លើជំនាញ Digital Economy, Financial Technology, Smart city planning Management។
ក្រសួងអប់រំ យុវជន និង កីឡា ផ្តល់អាហារូបករណ៍១៩០កន្លែង សម្រាប់សិស្សដែលចូលរៀននៅវិទ្យាស្ថានបច្ចេកវិទ្យាខេត្តកំពង់ស្ពឺ។
អាហារូបករណ៍១០០ភាគរយ ចំនួន១៨០កន្លែង នៅវិទ្យាសា្ថនកំពង់ឈើទាល ខេត្តកំពង់ធំ ក៏នឹងកំពុងរង់ចាំសិស្សមកប្រឡងយកអាហារូបករណ៍សម្រាប់សិក្សាផ្នែក អនុភាពអគ្គិសនី វិទ្យាសាស្ត្រសត្វ វិទ្យាសាស្ត្រដំណាំ គ្រប់គ្រងទេសចរណ៍និងសណ្ឋាគារ អេឡិចត្រូនិច និង កំព្យូទ័រពាណិជ្ជកម្ម។ ចំពោះបេក្ខជនដែលមានចំណាប់អារម្មណ៍សិក្សានៅវិទ្យាស្ថានកំពង់ឈើទាល អាចទៅដាក់ពាក្យចាប់ពីថ្ងៃជូនដំណឹង រហូតដល់ថ្ងៃទី១៥ ខែតុលា ឆ្នាំ២០១៩។
សាកលវិទ្យាល័យផ្សេងៗទៀត ក៏ផ្តល់អាហារូបករណ៍សម្រាប់សិស្សដែលប្រឡងជាប់បាក់ឌុបផងដែរ ដោយក្នុងនោះ មានសាកលវិទ្យាល័យអាមេរិកកាំងកម្ពុជា (AUPP) ដេបាតឺម៉ង់ប្រព័ន្ធផ្សព្វផ្សាយនិងសារគមនាគមន៍ (DMC) លើជំនាញផ្នែកប្រព័ន្ធផ្សព្វផ្សាយ។
សាកលវិទ្យាល័យ Western បានផ្តល់អាហារូបករណ៍ ចាប់ពី៥០ ទៅ ១០០ភាគរយ សម្រាប់ថ្នាក់បរិញ្ញាបត្រ និងបរិញ្ញាបត្ររង។
សាកលវិទ្យាល័យបញ្ញាសាស្ត្រកម្ពុជា (PUC) ផ្តល់អាហារូបករណ៍៥០កន្លែង។
សហភាពសហព័ន្ធយុវជនកម្ពុជា (ស.ស.យ.ក.) ផ្តល់អាហារូបករណ៍៣០០កន្លែង ដែលឈប់ទទួលពាក្យនៅថ្ងៃទី២៣ ខែកញ្ញា។
សាលារៀនឯកជនមួយចំនួនទៀត ក៏នឹងផ្តល់អាហារូបករណ៍ដល់សិស្សដែលប្រឡងជាប់បាក់ឌុប ក្នុងនោះមានសាលាភាសាអង់គ្លេស អេស៊ីអ៊ី (ACE) ផ្តល់អាហារូបករណ៍១០០កន្លែង សម្រាប់សិក្សាភាសាអង់គ្លេសរយៈពេលមួយឆ្នាំ។
សាកលវិទ្យាល័យ ខេមអាយយូ (CamIU) ផ្តល់អាហារូបករណ៍ សម្រាប់សិក្សាផ្នែកគ្រប់គ្រងពាណិជ្ជកម្ម សេដ្ឋកិច្ច ហិរញ្ញវត្ថុ គណនេយ្យ សវនកម្ម ច្បាប់ពាណិជ្ជកម្ម ពន្ធដារ ជំនួញអន្តរជាតិ គ្រប់គ្រងសណ្ឋាគារ និង បដិសណ្ឋារកិច្ច អក្សរសាស្ត្រអង់គ្លេស និងទំនាក់ទំនងអន្តរជាតិ។
សាកលវិទ្យាល័យ Limkokwing ផ្តល់អាហារូបករណ៍១០០ភាគរយ ចំនួន៥០កន្លែង។
ចំពោះអ្នកដែលចង់សិក្សាលើជំនាញវិទ្យាសាស្ត្រអប់រំ ព័ត៌មានវិទ្យា នីតិសាស្ត្រ ទស្សនវិជ្ជាសាសនាអក្សរសាស្ត្រអង់គ្លេស និង គ្រប់គ្រងទូទៅ ក៏អាចទៅដាក់ពាក្យយកអាហារូបករណ៍១០០ភាគរយ នៅពុទ្ធិកសាកលវិទ្យាល័យព្រះសីហមុនីរាជាផងដែរ។ អាហារូបករណ៍នេះមានការឧបត្ថម្ភពីសម្តេចនាយករដ្ឋមន្ត្រី ហ៊ុន សែន និងសម្តេចសង្ឃ បួរ គ្រី ព្រះសាកលវិទ្យាធិការនៃពុទ្ធិកសាកលវិទ្យាល័យព្រះសីហមុនីរាជា៕
Tag:
អប់រំ
បាក់ឌុប
អាហារូបករណ៍
© រក្សាសិទ្ធិដោយ thmeythmey.com