អន្តរជាតិ
លោក មហាធៀ ប្រាប់សមាជិកបក្សឲ្យរៀនពីកំហុសរបស់អតីតបក្សកាន់អំណាច នាយករដ្ឋមន្រ្តីម៉ាឡេស៊ី មហាធៀ មហាម៉ាត់, រូបភាព(MalayMail)
× នាយករដ្ឋមន្ត្រីម៉ាឡេស៊ី លោកមហាធៀ មហាម៉ាត់ បានប្រាប់សមាជិកបក្សរបស់លោកឲ្យរៀនពីកំហុសរបស់អតីតបក្សកាន់អំណាចគណបក្សជាតិរួបរួមម៉ាឡេ(UMNO) ដែលចាញ់ឆ្នោតកាលពីឆ្នាំមុន។ លោក មហាធៀ ព្រមានថា ការដើរតាមគន្លងអតីតបក្សកាន់អំណាចនឹងនាំឲ្យបាត់បង់ការគាំទ្រពីសំណាក់ប្រជាជន។
និយាយនៅក្នុងពិធីគម្រប់ខួបលើកទី៣ នៃការបង្កើតបក្សជនជាតិដើមរួបរួមម៉ាឡេស៊ី (MUIP) នាថ្ងៃទី១២ ខែកញ្ញា លោកប្រមុខដឹកនាំបក្ស មហាធៀ មហាម៉ាត់ បានលើកឡើងថា កិច្ចខិតខំរបស់សមាជិកបក្សទាំងអស់ មិនមែនជាអំណាច ឬលុយនោះឡើយ ប្រសិនបើចង់មានតំណែងក្នុងរដ្ឋាភិបាល។
ក្នុងន័យកុំឲ្យសមាជិកបក្សគិតតែពីរឿងលុយពេក លោកនាយករដ្ឋមន្ត្រីម៉ាឡេស៊ីវ័យ ៩៤ឆ្នាំរូបនេះបាននិយាយថា៖ « នៅក្នុងការបោះឆ្នោតថ្នាក់ជាតិលើកទី១៤ អតីតគណបក្សកាន់អំណាចបានសន្យាថាដំឡើងប្រាក់ខែ ដំឡើងលុយឲ្យប្រជាជន ដោយសារពួកគេជឿថាប្រជាជននឹងគាំទ្រពួកគេ ប៉ុន្តែអ្វីទាំងនោះត្រូវបានប្រជាជនបដិសេធទៅវិញ»។
ក្នុងន័យនេះលោកមហាធៀ ចង់ឲ្យសមាជិកបក្សរបស់លោកធ្វើការដោយផ្អែកលើមនសិការ និងជាតិនិយមជាជាងយកលុយទៅទិញទឹកចិត្ត ឬការគាំទ្រពីប្រជាជន។ លោកបញ្ជាក់ថា៖ «ប្រសិនបើគណបក្សជនជាតិដើមរួបរួមម៉ាឡេស៊ីប្រើលុយជាឧបករណ៍នយោបាយដូចគណបក្សជាតិរួបរួមម៉ាឡេនោះ យើងនឹងចាញ់ដូចពួកគេដែរ។» នេះបើតាមការផ្សាយរបស់សារព័ត៌មាន Bernama ។
យ៉ាងណាក៏ដោយ ក្នុងសប្តាហ៍នេះគណបក្សជាតិរួបរួមម៉ាឡេ ដែលកំពុងតែបាត់បង់ការគាំទ្ររបស់ខ្លួននោះ នឹងបង្កើតកិច្ចព្រមព្រៀងនយោបាយជាមួយគណបក្សផ្សេងទៀតដូចជា គណបក្សមូលដ្ឋានម៉ាឡេនិងគណបក្សឥស្លាមម៉ាឡេស៊ី។
នៅក្នុងពិធីគំរប់ខួបលើកទី៣ដដែល លោកមហាធៀ ក៏បាននិយាយបញ្ជាក់ពីមូលហេតុក្នុងការទទួលជ័យជម្នះលើអតីតគណបក្សកាន់អំណាចផងដែរ។ តាមពិតទៅ គណបក្សជនជាតិដើមរួបរួមម៉ាឡេស៊ី មិនមានកម្លាំងអ្វីទេ ប៉ុន្តែដោយសារភាពខ្សោយរបស់គូប្រជែងដែលប្រជាជនមួយចំនួនធំមិនគាំទ្រ។
នាយករដ្ឋមន្ត្រីវ័យ៩៤ឆ្នាំរូបនេះ ធ្លាប់បានកាន់តំណែងជានាយករដ្ឋមន្ត្រីម្តងហើយចាប់ពីឆ្នាំ ១៩៨១ ដល់ឆ្នាំ ២០០៣ មុនពេលគាត់ចូលនិវត្តន៍នៅអាយុ៧៨ឆ្នាំ។ កាលពីឆ្នាំ២០១៨កន្លងទៅ លោកមហាធៀបានរួមគ្នាជាមួយដៃគូប្រជែង ដើម្បីទម្លាក់គណបក្សជាតិរួបរួមម៉ាឡេ៕
© រក្សាសិទ្ធិដោយ thmeythmey.com