កីឡាជាតិ
ជាតិ
លីគកំពូលត្រឡប់មកវិញហើយ! វិសាខាប៉ះទ័ព ក្រោយការប្រកួតពីរគូទៀត
× ក្រោយសម្រាកពីរសប្តាហ៍ដើម្បីទុកពេលឲ្យក្រុមជម្រើសជាតិបំពេញបេសកកម្មក្នុងវគ្គជម្រុះ World Cup 2022 ជុំទី២ ការប្រកួតពានរង្វាន់ក្របខណ្ឌមិត្តហ្វូនខេមបូឌានលីគ បានត្រឡប់មកវិញហើយ។ នៅថ្ងៃទីសៅរ៍នេះ មានការប្រកួតចំនួន៣គូនៅទីលានផ្សេងៗគ្នា ក្នុងនោះ វិសាខាត្រូវបើកទ្វារកីឡដ្ឋានខ្លួនស្វាគមន៍ក្រសួងការពារជាតិ(ទ័ព) ដើម្បីជម្រះបញ្ជីចាស់។ មុនការប្រកួតនេះមកដល់ ក៏មានការប្រកួតពីរផ្សេងទៀតផងដែរ។
វិសាខាត្រូវការឈ្នះក្រសួងការពារជាតិនៅល្ងាចនេះ ដើម្បីទទួលបាន៣បន្ថែម សម្រាប់ពង្រឹងទីតាំងលេខ២ ដែលខ្លួនកំពុងឈរមាន៤៧ពិន្ទុ។ វាក៏ជាឱកាសសម្រាប់ពួកគេ ដើម្បីជម្រះបញ្ជីចាស់ ដែលទ័ពធ្វើឲ្យខ្លួនខកចិត្តជាមួយបរាជ័យ ១-០ នៅកីឡដ្ឋានស្តាតចាស់នៅជើងទី១ផងដែរ។ ក្រុមក្រោមការដឹកនាំបណ្តោះអាសន្នរបស់លោក Tunji Ayoyinka Akeeb មួយនេះមិនទាន់ស្គាល់បរាជ័យនៅឡើយទេសម្រាប់១០ប្រកួតចុងក្រោយ ដែលទាមទារឲ្យពួកគេត្រូវតែយកឈ្នះ ដើម្បីរក្សាកំណត់ត្រាមិនស្គាល់ចាញ់១១ប្រកួត។
ចំណែកក្រុមក្រសួងការពារជាតិទោះបីអស់ឱកាសប្រជែងដណ្តើមពាន តែពួកគេ ក៏ត្រូវការឈ្នះ ដើម្បីបន្តឱកាសក្នុងការប្រជែងដណ្តើមចំណាត់ថ្នាក់លេខ២។ ប៉ុន្តែបើចាញ់ក្នុងការប្រកួតនេះ ពួកគេនឹងអស់ឱកាសទាំងប្រជែងចំណាត់ថ្នាក់លេខ២។ នាការប្រកួតក្នុងសប្តាហ៍ទី២១ ក្រុមនេះបានរងបរាជ័យ ២-១ ក្រោមថ្វីជើងគីរីវង់សុខសែនជ័យ នៅលើទឹកដីខ្លួន។ ការរវាងក្រុមទាំងពីរធ្វើឡើងនៅម៉ោង៦ល្ងាចនាកីឡដ្ឋានវិសាខា។
មុនជំនួបដ៏ជក់ចិត្តខាងលើមកដល់ ក្រុមអគ្គស្នងការដ្ឋាននគរបាលជាតិ ប្រើកីឡដ្ឋានអគ្គិសនីកម្ពុជា ស្វាគមន៍អង្គរថាយហ្គឺរនៅម៉ោង៣:៣០នាទីរសៀល។ ជ័យជម្នះវាជារឿងចាំបាច់សម្រាប់អង្គរ ដ្បិតពួកគេត្រូវការ៣ពិន្ទុជាចាំបាច់ ដើម្បីឡើងឈរលេខរៀងទី៣បណ្តោះអាសន្ន ក៏ដូចជាបន្តឱកាសក្នុងការប្រជែងដណ្តើមជើងឯក។ ប៉ុន្តែបើចាញ់ក្នុងការប្រកួតនេះ ពួកគេនឹងក្លាយជាក្រុមទី១១ ដែលអស់ឱកាសប្រជែងពាន។ បច្ចុប្បន្នក្រុមមានមូលដ្ឋាននៅខេត្តសៀមរាបមួយនេះ ស្ថិតនៅលេខរៀងទី៤មាន៤២ពិន្ទុ ដោយមានគម្លាតពីក្រុមកំពូលតារាង១៣ពិន្ទុ។
នៅម៉ោង៣:៣០នាទីរសៀលនេះដែរ ក្រុមសូលទីឡូអង្គរប៉ះអគ្គិសនីកម្ពុជានៅកីឡដ្ឋានខេត្តសៀមរាប។ នេះជាការប្រកួតបង្គ្រប់កិច្ច ដ្បិតក្រុមទាំងពីរសុទ្ធតែអស់ឱកាសដូចគ្នា។ ទោះបីយ៉ាងនេះក្តី អគ្គិសនីកម្ពុជាត្រូវការនៅថ្ងៃនេះ ដើម្បីសងសឹកដែលសូលទីឡូអង្គរបានយកឈ្នះខ្លួន ៤-២ នៅជើងទី១លើទឹកដីខ្លួន៕
Tag:
Cambodia League 2019
វិសាខា
ក្រសួងការពារជាតិ
© រក្សាសិទ្ធិដោយ thmeythmey.com