ពិធីកោរជុក ដែលចាស់បុរាណធ្វើដើម្បីអនាម័យ,ផ្ដល់ការអប់រំ...នៅតែសំខាន់ក្នុងសង្គមជឿនលឿន

ជាតិ

បទយកការណ៍ / បទសម្ភាសន៍

ពិធីកោរជុក ដែលចាស់បុរាណធ្វើដើម្បីអនាម័យ,ផ្ដល់ការអប់រំ...នៅតែសំខាន់ក្នុងសង្គមជឿនលឿន

15, Sep 2019 , 2:59 pm

រូបភាព

ដោយ: ប៉ូ សាគុន

ភ្នំពេញ៖ ពិធីកោរជុកត្រូ វបានដូនតាខ្មែរបង្កើតឡើងក្នុងបំណងសំខាន់ៗ៤យ៉ាង។ ទីមួយដើម្បីថែរក្សាស្បែកក្បាលឱ្យកុមារ។ ទីពីរ. ផ្ដល់ចំណេះដឹងនានាដល់ពួកគេ។ ទីបី.ជាការដឹងគុណដល់ព្រះមហាក្សត្រ និងវត្ថុស័ក្តិសិទ្ធិគ្រប់ទិសទី និងទីបួន. បញ្ជាក់ពីអត្តសញ្ញាណខ្មែរ។ នេះបើតាមលោក ប៉ុក វណ្ណធីរ អនុរដ្ឋលេខាធិការក្រសួងធម្មការនិងសាសនា និងជាឧទ្ទេសាចារ្យបង្ហាត់បង្រៀនអាចារ្យខ្មែរ។ ក្នុងបទសម្ភាសជាមួយសារព័ត៌មានថ្មីៗ លោក ប៉ុក វណ្ណធីរ ទោះជាមកដល់បច្ចុប្បន្ន សង្គមកាន់តែជឿនលឿន ការធ្វើពិធីកោរជុក ក៏នៅតែមានប្រយោជគ្រឹះស្ថានអប់រំ ក៏មាននៅគ្រប់ទីកន្លែង ក្នុងន័យថែរក្សាអត្តសញ្ញាណជាតិ។ ប៉ុន្តែបើមិនធ្វើក៏មិនប៉ះពាល់ដល់ការអប់រំដែរ ព្រោះផលិតផលថែរក្សាអនាម័យក្មេង នាបច្ចុប្បន្នក៏មានច្រើន ហើយគ្រឹះស្ថានអប់រំក៏មានគ្រប់ទីកន្លែងដែរ។

តទៅនេះ សូមអញ្ជើញស្ដាប់បទសម្ភាស រវាងកញ្ញា ប៉ូ សាគុន អ្នកសារព័ត៌មានថ្មីៗ និងលោក ប៉ុក វណ្ណធីរ ដូចតទៅ៖

ព្រោះតែពីសម័យមុនបច្ចេកវិទ្យាមិនទាន់ជឿនលឿន សម្ភារប្រើប្រាស់ដើម្បីថែរក្សាអនាម័យឱ្យកុមារមិនសម្បូរបែប ការកោរសក់គឺជាមធ្យោបាយដ៏ល្អមួយ ដើម្បីការពារស្បែកក្បាលឱ្យកូន។ ទោះជាយ៉ាងណាក្នុងអំឡុងពេលទុកជុក កុមារទាំងឡាយតែងតែត្រូវបានចាស់ទុំ មានដូចជាជីដូនជីតា ឬម្ដាយឪពុកអប់រំទូន្មានដោយពាក្យសម្តីផង ដោយសកម្មភាពផង និងដោយការនិទានរឿងឱ្យស្ដាប់ផង។ ជាពិសេសពួកគេត្រូវបានតម្រង់ទិសយ៉ាងល្អ ដើម្បីក្លាយជាមនុស្សស្គាល់គុណនិងទោស។ លោក ប៉ុក វណ្ណធី ថាចាស់ពីដើមបានដឹងច្បាស់ពីកម្រិតអាយុក្មេងដែលកំពុងពេញទទួលយកចំណេះ ដូច្នេះគាត់ផ្ដល់តែបទពិសោធដែលល្អ ឱ្យទៅពួកគេប៉ុណ្ណោះ។

គេចាប់ផ្ដើមកោរសក់ឱ្យទារកទារិកា ក្រោយពីកុមារទាំងនោះសម្រាលបាន៧ថ្ងៃ ឬក្រោយពីធ្វើពិធីទម្លាក់ចង្ក្រានរួច។ គេកោរសក់ទាំងអស់ ដោយទុកតែជុក កំប៉ោយ និងកន្ទូតអូងតែប៉ុណ្ណោះ។ ទុកសក់បែបនេះ ដើម្បីបញ្ជាក់ឱ្យដឹងពីចំណុចគ្រោះថ្នាក់បំផុតរបស់ក្បាល។

ក្រោយពីទុកជុកបាន ៩ឆ្នាំ ១១ឆ្នាំ ឬ១៣ឆ្នាំ សម្រាប់កុមារា គេនឹងធ្វើពីធីកោរជុកនោះចេញ។ ចំណែកកុមារី គេនឹងកោរជុក នៅអាយុត្រឹម៩ឆ្នាំប៉ុណ្ណោះ ព្រោះសរីររាង្គកាយរបស់ក្មេងស្រីឆាប់លូតលាស់ជាងក្មេងប្រុស។ ម្យ៉ាងក្មេងស្រី ជាភេទដែលពោរពេញទៅដោយគ្រឿងលម្អ។

លោក ប៉ុក វណ្ណធីរ បញ្ជាក់ថា នៅសម័យមុនចាស់បុរាណធ្វើពិធីកោរជុក ក្នុងបំណងថែរក្សាអនាម័យ ផ្ដល់ចំណេះដឹង ជាការដឹងគុណដល់ព្រះមហាក្សត្រ និងវត្ថុស័ក្តិសិទ្ធិ និងបញ្ជាក់ពីអត្តសញ្ញាណខ្មែរ។ មកដល់សម័យបច្ចុប្បន្ន សង្គមកាន់តែជឿនលឿន ផលិតផលថែរក្សាអនាម័យក្មេងក៏មានច្រើន ហើយគ្រឹះស្ថានអប់រំ ក៏មាននៅគ្រប់ទីកន្លែង។ ដូច្នេះ បើធ្វើពិធីកោរជុក ក៏នៅតែមានប្រយោជន៍ ព្រោះក្នុងន័យថែរក្សាអត្តសញ្ញាណជាតិ។ ប៉ុន្តែបើមិនធ្វើក៏មិនប៉ះពាល់អ្វី ព្រោះប្រយោជន៍ផ្សេងៗ នៅតែមានក្នុងពេលបច្ចុប្បន្ន៕