សង្គមអន្តរជាតិ
អន្តរជាតិ
ដំបូន្មានល្អៗរបស់លោក ជេក ម៉ា ជួយជីវិតឲ្យអ្នកកាន់តែប្រសើរ! លោក ជេក ម៉ា នាពេលទៅទស្សនាប្រាសាទអង្គរវត្តកន្លងមក។ រូបថត អ៊ីសា រ៉ហានី
× លោក ជេក ម៉ា បុរសមានដាច់គេប្រចាំប្រទេសចិន បានយកថ្ងៃខួបកំណើត ៥៥ឆ្នាំរបស់លោក កាលពីថ្ងៃទី១០ កញ្ញា ដើម្បីលាលែងពីតំណែងប្រធានក្រុមហ៊ុនអាលីបាបា។ វា គឺជាក្រុមហ៊ុនពាណិជ្ជកម្មអេឡិចត្រូនិក (e-commerce) ដែលលោកបានបង្កើតដោយផ្ទាល់ដៃកាលពី២០ឆ្នាំមុន នៅផ្ទះដ៏តូចចង្អៀតមួយរបស់លោកក្នុងប្រទេសចិន។ លោក ដានីញែល ចាង (Daniel Zhang) ដែលបានក្លាយជានាយកប្រតិបត្តិនៃក្រុមហ៊ុន Alibaba កាលពីឆ្នាំ២០១៥ នឹងចូលកាន់តំណែងជាប្រធានក្រុមហ៊ុនយក្សចិននេះបន្តពីលោក ជេក ម៉ា។
ខាងក្រោមនេះជាដំបូន្មានចំនួន ៣ ដ៏មានអត្ថន័យរបស់លោក ជេក ម៉ា ដែលអាចជួយឲ្យជីវិតអ្នកកាន់តែល្អប្រសើរ៖
«ការងារដំបូងរបស់អ្នក គឺសំខាន់បំផុត»
នៅវេទិកាសេដ្ឋកិច្ចពិភពលោក ក្នុងទីក្រុង Davos នៃប្រទេសស្វីស កាលពីឆ្នាំ២០១៨ លោក ម៉ា បានចែករំលែកដំបូន្មានក្នុងវិស័យការងាររបស់លោក។ លោកនិយាយបែបនេះ៖«នៅពេលអ្នកបញ្ចប់ការសិក្សា និងកំពុងស្វែងរកការងារធ្វើ ការងារដំបូងរបស់អ្នក គឺសំខាន់បំផុត។ មិនសំខាន់ថា ក្រុមហ៊ុននោះ មានឈ្មោះល្បីឬអត់ទេ អ្នកគួរ ស្វែងរកមេដឹកនាំល្អម្នាក់ដែលអាចបណ្តុះបណ្តាលអ្នកឲ្យក្លាយជាបុគ្គលល្អ និងធ្វើរឿងត្រឹមត្រូវ។ សម្រាប់ដំបូន្មានខ្ញុំ អ្នកគួរធ្វើការនៅទីនោះយ៉ាងតិច ៣ឆ្នាំ ទើបប្រសើរ»។
«ការបង្រៀនជំនាញទន់ដល់កូនៗ គឺសំខាន់ណាស់សម្រាប់អនាគតពួកគេ»
ក្នុងព្រឹត្តិការណ៍នៅ Davos ក្នុងឆ្នាំ២០១៨ដដែល អតីតគ្រូបង្រៀនភាសាអង់គ្លេសរូបនេះ និយាយថា យើងត្រូវការផ្លាស់ប្តូរវិធីនៃការបង្រៀនក្មេងជំនាន់ក្រោយដើម្បីញែកឲ្យដាច់រវាង មនុស្ស និងបញ្ញាសិប្បនិម្មិត (AI) ។
«ប្រសិនបើយើងពុំផ្លាស់ប្តូរវិធីសាស្ត្រនៃការបង្រៀនរបស់យើងទេ ក្នុងពេល៣០ឆ្នាំទៀត យើងនឹងមានបញ្ហាជាមិនខាន។ យើងកំពុងបង្រៀនក្មេងៗនូវមេរៀនតាំងពី២០០ឆ្នាំមុន ដ្បិតវាផ្អែកលើចំណេះដឹងតែម្យ៉ាង។ ទន្ទឹមនេះ យើងគ្មានលទ្ធភាពបង្រៀនក្មេងៗយើង ដើម្បីប្រកួតប្រជែងជាមួយម៉ាស៊ីន ដែលនឹឹងឆ្លាតវៃជាងយើងឡើយ»។ លោក ម៉ា បញ្ជាក់បែបនេះ។
លោក សង្កត់ធ្ងន់ថា យើងត្រូវបង្រៀនក្មេងៗនូវអ្វីដែលម៉ាស៊ីនពុំអាចរៀនសូត្របាន ហើយនោះគឺមានដូចជា គុណតម្លៃ ជំនឿ ការគិតត្រិះរិះដោយឯករាជ្យ ការធ្វើការជាក្រុម ការយកចិត្តទុកដាក់លើអ្នកដទៃ។ ជំនាញទន់ទាំងនេះ គួបផ្សំនឹងកីឡា តន្ត្រី ការគូរគំនូ សិល្បៈ ជាអ្វីដែលធ្វើឲ្យមនុស្ស ខុសប្លែកពីម៉ាស៊ីន។
«ប្រសិនបើបារម្ភពីការប្រកួតប្រជែង កុំធ្វើអ្នកជំនួញ»
ក្នុងវេទិកាសេដ្ឋកិច្ចពិភពលោកប្រចាំឆ្នាំ២០១៩ លោក ជេក ម៉ា និយាយថា គ្មានឡើយអ្នកជំនាញសម្រាប់ថ្ងៃស្អែក ហើយអ្វីដែលពួកគេដឹងនោះ គឺជា ថ្ងៃម្សិលមិញ ប៉ុណ្ណោះ។ លោក សង្កត់ថា៖ «ក្នុងវិស័យជំនួញ កុំព្រួយបារម្ភពីការប្រកួតប្រជែង និងសម្ពាធ។ ប្រសិនបើ អ្នកបារម្ភពីវា កុំធ្វើជាអ្នកជំនួញអី»៕
Tag:
ចិន
ជេកម៉ា
ដំបូន្មាន
© រក្សាសិទ្ធិដោយ thmeythmey.com