អន្តរជាតិ
លោក វីដូដូ៖ ឥណ្ឌូណេស៊ី កំពុងព្យាយាមប្រើគ្រប់វិធីដើម្បីពន្លត់ភ្លើងឆេះព្រៃ រូបភាព AFP
×
ដោយ៖ ឈួន ឈីវអ៊ីង
ប្រធានាធិបតីឥណ្ឌូណេស៊ី ចូកូ វីដូដូ នៅថ្ងៃទី១៧ ខែកញ្ញា បានទៅពិនិត្យទីតាំងភ្លើងឆេះព្រៃនៅកោះស៊ូម៉ាត្រា ដែលជាទីតាំងមួយក្នុងចំណោមទីតាំងភ្លើងឆេះព្រៃនៅទូទាំងប្រទេស។ លោក វីដូដូ និយាយថា រដ្ឋាភិបាលបានប្រើប្រាស់គ្រប់វិធីដើម្បីប្រយុទ្ធប្រឆាំងភ្លើងឆេះព្រៃដែលបណ្តាលឱ្យមានអ័ព្ទពុលនៅទូទាំងអាស៊ីអាគ្នេយ៍ ដោយប្រើយន្តហោះធ្វើភ្លៀងសិប្បនិម្មិត និងការអធិដ្ឋានផងដែរ។
ភ្លើងឆេះព្រៃនៅឥណ្ឌូណេស៊ី ហាក់មិនទាន់ថមថយឡើយ។ ភ្លើងកំពុងតែឆាបឆេះនៅលើកោះ ប័រណេអូ និងកោះស៊ូម៉ាត្រា ដែលធ្វើឱ្យមានការផ្សែងអ័ព្ទហោះពាសពេញតំបន់ រួមទាំងសាយភាយទៅដល់ប្រទេសជិតខាងម៉ាឡេស៊ី និងសិង្ហបុរីផងដែរ។ វិធានការចាំបាច់ជាច្រើន ត្រូវបានអនុវត្តរាប់ទាំងការអនុវត្តច្បាប់ដាក់ទោសទណ្ឌផង។ នៅថ្ងៃទី១៦ ខែកញ្ញា អាជ្ញាធរបានចាប់ខ្លួនជាង២០០នាក់ដែលជាប់សង្ស័យក្នុងសកម្មភាពធ្វេសប្រហែសហើយបង្កជាអគ្គិភ័យ។
ក្នុងដំណើរទស្សនកិច្ចទៅកាន់ខេត្ត Riau នៅកណ្តាលកោះស៊ូម៉ាត្រានៅថ្ងៃទី១៧ ខែកញ្ញា ប្រធានាធិបតីឥណ្ឌូណេស៊ី Widodo បាននិយាយថាកងទ័ពជិត ៦ពាន់នាក់ត្រូវបានបញ្ជូនទៅកន្លែងឆេះដើម្បីជួយពន្លត់អគ្គិភ័យ។ លោកបានមានប្រសាសន៍ថា យើងបានប្រឹងប្រែងអស់ពីសមត្ថភាពហើយ។ មិនត្រឹមតែអ្នកពន្លត់អគ្គិភ័យនៅដីប៉ុណ្ណោះទេ យន្តហោះរាប់សិនគ្រឿងត្រូវបានប្រើប្រាស់ដើម្បីបញ្ជូនទឹកទៅពន្លត់។
ប្រធានាធិបតីឥណ្ឌូណេស៊ីរូបនេះ បានបន្ថែមទៀតថា យើងក៏បានបន់ស្រន់ផងដែរ បន្ទាប់ពីដំណើរទស្សនកិច្ចទៅកាន់ព្រះវិហារ Amrulloh នៅ Pekan terbaru។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ផ្សែងពុលដែលបណ្តាលមកពីការដុតដោយចេតនា ដើម្បីកាប់ឆ្ការដីសម្រាប់ធ្វើកសិកម្ម គឺជាបញ្ហាប្រចាំឆ្នាំសម្រាប់ឥណ្ឌូណេស៊ីនិងប្រទេសជិតខាង។ ប៉ុន្តែវាកាន់តែអាក្រក់ទៅៗ នៅឆ្នាំនេះដោយសារអាកាសធាតុស្ងួត។ បើតាមភ្នាក់ងារឧតុនិយមរបស់អាស៊ាន តំបន់ដែលមានភ្លើងឆេះ មិនមានកំណើនទៀតទេតែអ័ព្ទក្រាស់ៗនៅមានកម្រិតធ្ងន់ធ្ងរ និងបន្តគ្រប់ដណ្តប់ពាសពេញតំបន់។ សាលារៀនជាច្រើននៅក្នុងឥណ្ឌូណេស៊ីត្រូវបានបិទ ដែលប៉ះពាល់ដល់ការសិក្សាររបស់សិស្សជាង៣៥ម៉ឺននាក់។
ខ្យល់អាកាសនៅលើកោះប័រណេអូ ក្នុងទឹកដីរបស់ម៉ាឡេស៊ី និងនៅឯសិង្ហបុរី គឺកាន់តែគ្រោះថ្នាក់ចំពោះសុខភាពពីមួយថ្ងៃទៅមួយថ្ងៃ។ កោះប័រណេអូ គឺជាកោះដែលបែងចែកជាបីផ្នែកស្ថិតក្រោមការគ្រប់គ្រងរបស់ឥណ្ឌូណេស៊ី ជាមួយម៉ាឡេស៊ី និងសិង្ហបុរី៕
© រក្សាសិទ្ធិដោយ thmeythmey.com