ជាតិ
នយោបាយជាតិ
រដ្ឋមន្ត្រីមហាផ្ទៃ បកស្រាយថា មិនបានរារាំងអ្នកណាម្នាក់ មិនឲ្យទៅវត្តក្នុងរដូវភ្ជុំបិណ្ឌឡើយ
× សម្តេច ស ខេង រដ្ឋមន្ត្រីក្រសួងមហាផ្ទៃនិងជាអនុប្រធានគណបក្សប្រជាជនកម្ពុជា ចេញមកបដិសេធថា មិនបានដាក់បញ្ជាឲ្យរារាំងឬគាបសង្កត់ប្រជាពលរដ្ឋណាម្នាក់ មិនឲ្យចូលរួមប្រារព្ធពិធីបុណ្យភ្ជុំបិណ្ឌឡើយ។ ការបដិសេធនេះ ជាការឆ្លើយតបទៅនឹងព័ត៌មានមួយចំនួន ដែលផ្សាយថា សម្តេច បញ្ជាឲ្យរារាំងនិងគាបសង្កត់ប្រជាពលរដ្ឋមិនឲ្យទៅវត្តក្នុងរដូវភ្ជុំបិណ្ឌ។
សម្តេចរដ្ឋមន្ត្រី បានហៅសារព័ត៌មានទាំងនោះ ថាមាននិន្នាការប្រឆាំង ហើយចុះផ្សាយបំភ្លើស និងមួលបង្កាច់។ រដ្ឋមន្ត្រីមហាផ្ទៃ សរសេរលើទំព័រហ្វេសប៊ុក នៅថ្ងៃទី១៨ ខែកញ្ញា ឆ្នាំ២០១៩ ដូច្នេះថា៖«នេះជាចេតនាអាក្រក់ ដែលខ្ញុំ មិនទទួលយកបាន»។
សារព័ត៌មាននានា បានចុះផ្សាយពីសំឡេងរបស់សម្តេច ស ខេង ដែលបែកធ្លាយកាលពីប៉ុន្មានថ្ងៃមុន។ ក្នុងសំឡេងនោះ សម្តេច បានបង្គាប់ទៅគ្រប់អភិបាលរាជធានី-ខេត្ត ឲ្យដាក់កម្លាំងឃ្លាំមើលអ្នកគាំទ្រគណបក្សប្រឆាំង នៅតាមវត្តអារាម ក្នុងពិធីបុណ្យភ្ជុំបិណ្ឌ ដោយបារម្ភថា ពួកគេ យកលេសនៃការទៅវត្ត ដើម្បីជួបជុំគ្នា ហើយលួចជជែកគ្នាពីផែនការខ្មៅងងឹត។
តាមរយៈសារលើទំព័រហ្វេសប៊ុក អនុប្រធានគណបក្សកាន់អំណាច បកស្រាយពីសំឡេងរបស់ខ្លួនបែបនេះថា៖«ក្នុងនាមជាអ្នកទទួលខុសត្រូវសន្តិសុខសណ្ដាប់ធ្នាប់សាធារណៈសម្រាប់ប្រទេសជាតិ ខ្ញុំ មានសិទ្ធិ និងកាតព្វកិច្ចតាមផ្លូវច្បាប់ ក្នុងការដាក់ចេញបទបញ្ជាដើម្បីថែរក្សាសន្តិសុខសណ្ដាប់ធ្នាប់សាធារណៈសម្រាប់គ្រប់ព្រឹត្តិការណ៍នានា។ ...ហើយសកម្មភាពទាំងឡាយណា ដែលប៉ុនប៉ងបំផ្លាញសុខសន្តិភាព ស្ថិរភាពនយោបាយ បំផុសឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល អាជ្ញាធរសមត្ថកិច្ចគ្រប់លំដាប់ថ្នាក់ត្រូវមានវិធានការច្បាប់យ៉ាងម៉ឺងម៉ាត់បំផុត»៕
© រក្សាសិទ្ធិដោយ thmeythmey.com