ជាតិ
២៥ខេត្ត/រាជធានី
អាជ្ញាធរនឹងរៀបសំណាញ់ដែកទប់ស្កាត់សំរាម ក្រោយប្រមូលសំរាមជិត១០០តោនពីឆ្នេរអូរឈើទាល សកម្មភាពមន្ត្រី ខេត្តព្រះសីហនុ ប្រមូលសំរាមដែលរសាត់ និងអណ្តែតនៅលើផ្នែកខាងចុងឆ្នេរអូរឈើទាល។ រូបថត លោក ឃាង ភារម្យ៕
× ភ្នំពេញ៖ សំរាមគ្រប់ប្រភេទប្រមាណ១០០តោន ដែលរសាត់ និងអណ្តែតពេញនៅផ្នែកចុងនៃឆ្នេរសមុទ្រអូរឈើទាល ត្រូវបានអាជ្ញាធរខេត្តព្រះសីហនុចុះសម្អាត និងប្រមូលដឹកចេញទៅកាន់ទីលានចាក់សំរាម នាថ្ងៃទី១៨កញ្ញានេះ។ អាជ្ញាធរនឹងរៀបសំណាញ់ដែកបន្ថែម ដើម្បីទប់ស្កាត់សំរាម កុំហូរចូលសមុទ្រទៀត។
លោក ឃាង ភារម្យ អ្នកនាំពាក្យខេត្តព្រះសីហនុ បាននិយាយថា មូលហេតុដែលសំរាមទាំងនេះ រសាត់អណ្ដែតមកចុងសមុទ្រឆ្នេរអូរឈើទាល គឺបណ្តាលមកពីមានភ្លៀងធ្លាក់ច្រើនជាបន្តបន្ទាប់ ដែលនាំយកសំរាមនៅតាមតំបន់នានាហូរធា្លក់ចូលសមុទ្រ ។ តែយ៉ាងណាបញ្ហាសំរាមនេះ អាជ្ញាធរបានបោសម្អាតអស់ហើយ។
ថ្លែងប្រាប់សារព័ត៌មានThmeyThmey តាមប្រព័ន្ធទំនាក់ទំនងសង្គមTelegram លោក ឃាង ភារម្យ បានបញ្ជាក់ថា មន្ត្រីជំនាញប្រើប្រាស់រថយន្តចំណុះ១២តោន ចំនួន៨គ្រឿង ដើម្បីដឹកសំរាមទាំងនេះចេញពីតំបន់ចុងឆ្នេរអូរឈើទាល ។
សំរាមដែលរសាត់មកធ្លាក់នៅចុងឆ្នេរសមុទ្រអូរឈើទាល នៅក្បែរតំបន់ដំណាក់ស្តេច
អ្នកនាំពាក្យរូបនេះ បានបញ្ជាក់ថា៖«ប្រភពសំរាមទាំងនេះ មានមួយផ្នែកហូរពីសមុទ្រផ្នែកខាងលើ និងមួយផ្នែកទៀតហូរពីអូរឬប្រឡាយ ហើយក៏ហូរមកចូលតំបន់ចុងអូរឈើទាលហ្នឹងតែម្តង ព្រោះខេត្តព្រះសីហនុយើង ជាពិសេសទីប្រជុំជនក្រុងព្រះសីហនុដែលនៅជាប់តំបន់ឆ្នេរដែលយើងរងនូវឥទ្ធិពលសម្ពោធទាបដែលធ្វើឱ្យមានភ្លៀងធ្លាក់ជាបន្តបន្ទាប់...»។
ដើម្បីទប់ស្កាត់បញ្ហានេះកុំឱ្យកើតមានឡើងទៀត អាជ្ញាខេត្តព្រះសីហនុ នឹងរៀបចំដាក់សំណាញ់ដែក បន្ថែម ដើម្បីទប់ស្កាត់សំរាមទាំងអស់នោះ កុំឱ្យចូលចាក់ទៅតំបន់ឆ្នេរ។ នេះជាការលើកឡើងរបស់លោក ឃាង ភារម្យ ។« កន្លងមកអាជ្ញាធរខេត្តបានដាក់សំណាញ់ដែករួចមកហើយ ដើម្បីទប់សំរាមនៅតាមតំបន់មួយចំនួនកុំឱ្យធ្លាក់ចូលក្នុងសមុទ្រ និងកាយប្រមូលយកទៅដឹកចោលនៅទីចាក់សំរាម ប៉ុន្តែមានសំរាមខ្លះ ក៏នៅតែហូរផុតពីសំណាញ់ដែកនោះ»។ នេះជាការបញ្ជាក់របស់អ្នកនាំពាក្យខេត្តព្រះសីហនុ។
កាលពីថ្ងៃទី១៤កញ្ញា ឆ្នាំ២០១៩ មានករណីហ្វេសប៊ុកមួយឈ្មោះYong Sok Khemerith បានបង្ហោះវីដេអូពីសកម្មភាពប្រមូលសំរាមដែលរសាត់ ឬអណ្តែតជាច្រើននៅលើឆ្នេរអូរឈើទាល ផ្នែកខាងចុងនេះ ដែលនាំឱ្យមានមតិប្រតិកម្មពីពលរដ្ឋលើបញ្ហាសំរាមនេះ៕
Tag:
សំរាម
ឆ្នេរ
អូរឈើទាល
© រក្សាសិទ្ធិដោយ thmeythmey.com