អន្តរជាតិ
Anwar រំពឹងថានឹងស្នងតំណែងនាយករដ្ឋមន្ត្រីជំនួសមហាធៀក្នុងឆ្នាំ ២០២០ រូបភាព (AFP)
× តាមរយៈកិច្ចសម្ភាសជាមួយជាមួយទូរទស្សន៍ Bloomberg កាលពីថ្ងៃទី១៨ ខែកញ្ញា លោក អាន់វ៉ា អ៊ីប្រាហ៊ីម (Anwar Ibrahim) រំពឹងថា គាត់នឹងជំនួសតំណែងនាយករដ្ឋមន្ត្រីម៉ាឡេស៊ីនៅពាក់កណ្តាលឆ្នាំក្រោយ។
វាមានការព្រមព្រៀងគ្នាច្បាស់ថាវាគួរតែជារយៈពេលនោះ ប៉ុន្តែខ្ញុំមិនគិតថា ខ្ញុំគួរតែចាំខែច្បាស់លាស់នោះទេ។ នេះបើតាមអ្វីដែលប្រមុខដឹកនាំបក្សយុត្តិធម៌របស់ប្រជាជន លោក អាន់វ៉ា អ៊ីប្រាហ៊ីម ក្នុងបទសម្ភាសជាមួយទូរទស្សន៍សេដ្ឋកិច្ចអាមេរិក។ យ៉ាងណាមិញលោក អាន់វ៉ា ក៏បញ្ជាក់ផងដែរថា ការព្រមព្រៀងមួយនេះ គឺលោក មហាធៀ នឹងលាលែងពីតំណែង ហើយលោកជាអ្នកចូលកាន់តំណែងជំនួស។
ជាការពិត កិច្ចព្រមព្រៀងរវាងលោក មហាធៀ និងលោក អាន់វ៉ា គឺត្រូវផុតកំណត់នៅក្នុងខែឧសភា ឆ្នាំ២០២០ បន្ទាប់ពីសម្ព័ន្ធភាពកាន់អំណាច Pakatan Harapan បានឈ្នះឆ្នោតកាលពីឆ្នាំ ២០១៨។ កាលពីមុនបោះឆ្នោតគណបក្សយុត្តិធម៌របស់ប្រជាជនរបស់លោក អាន់វ៉ា បានធ្វើសម្ពន្ធភាពជាមួយបក្សរបស់លោកមហាធៀ ក្នុងគោលបំណងប្រកួតប្រជែងជាមួយនឹងអតីតបក្សកាន់អំណាចរួបរួមជាតិម៉ាឡេ។
ការរួបរួមរវាងគណបក្សពីរនេះ គឺភ្ជាប់ជាមួយនឹងលក្ខខណ្ឌឲ្យលោក មហាធៀ កាន់តំណែងជានាយករដ្ឋមន្ត្រីពីរឆ្នាំ ហើយលោក អាន់វ៉ា នឹងត្រូវកាន់តំណែងជំនួស។ ក្នុងរយៈពេលនោះ លោកអាន់វ៉ា កំពុងពន្ធនាគារពាក់ព័ន្ធបទការរួមសង្វាសជាមួយភេទដូចគ្នា។ លោកតែងច្រានចោលថា វាជារឿងនយោបាយរបស់រដ្ឋាភិបាល។
យ៉ាងណាក៏ដោយ លោកនាយករដ្ឋមន្ត្រីម៉ាឡេស៊ីវ័យ៩៤ឆ្នាំ បានហៅខ្លួនឯងថាជា នាយករដ្ឋមន្ត្រីកាន់តំណែងមួយរយៈពេល ហើយលោកតែងតែនិយាយដដែលថា គាត់នឹងប្រគល់តំណែងឲ្យលោក អាន់វ៉ា តាមការសន្យា បើទោះបីជាគាត់មិនបានបញ្ជាក់ពីថ្ងៃផុតកំណត់ក៏ដោយ។ ប៉ុន្តែមានមតិខ្លះបានស្នើឲ្យគាត់កាន់តំណែងពេញមួយអាណត្តិរហូតដល់ឆ្នាំ២០២៣។
សូមបញ្ជាក់ថា កាលពីឆ្នាំ២០១៨ សម្ព័ន្ធភាពប្រឆាំង បានយកឈ្នះលើអតីតបក្សកាន់អំណាចដោយសារតែរឿងអាស្រូវពុករលួយទាក់ទងមូលនិធិរដ្ឋ 1MDB ៕
© រក្សាសិទ្ធិដោយ thmeythmey.com