ពីនេះ ពីនោះ
ព័ត៍មានសុខភាព
ចូលចិត្តញ៉ាំ “ខ្នុរ” អត់? ឆ្ងាញ់ហើយល្អខ្លាំងចំពោះសុខភាពទៀត
× ខ្នុរជាផ្លែឈើហូបផ្លែមួយប្រភេទដែលមានរសជាតិផ្អែមឈ្ងុយនៅពេលទុំ ហើយសម្បូរណាស់ក្នុងប្រទេសកម្ពុជា។ ទោះបីជាភាគច្រើននៃពួកយើងសុទ្ធតែធ្លាប់ទទួលទានផ្លែឈើនេះ ប៉ុន្តែប្រហែលជាមិនបានចាប់អារម្មណ៍ទេថា ខ្នុរអាចផ្ដល់ឥទ្ធិពលវិជ្ជមានគួរឱ្យភ្ញាក់ផ្អើលចំពោះសុខភាពរាងកាយ។
ថ្ងៃនេះយើង នឹងបង្ហាញឱ្យដឹងពីអត្ថប្រយោជន៍ដ៏ប្រសើរនៃការទទួលទានផ្លែខ្នុរក្នុងកម្រិតមធ្យម ៖
១. ពង្រឹងប្រព័ន្ធភាពស៊ាំ
ផ្លែខ្នុរ ជាប្រភពដ៏ប្រសើរនៃវីតាមីន A វីតាមីន B និង C ដែលជួយក្នុងការធ្វើឲ្យប្រព័ន្ធភាពស៊ាំរាងកាយកាន់តែរឹងមាំមានលក្ខណៈប្រសើរឡើង។ ដូច្នេះវាកាត់បន្ថយហានិភ័យនៃមេរោគឆ្លងទូទៅ។
២. សុខភាពឆ្អឹង
ផ្លែខ្នុរ មានផ្ទុកសម្បូរទៅដោយជាតិកាល់ស្យូមដែលជួយពង្រឹង និងលើកកម្ពស់សុខភាពឆ្អឹងល្អរឹងមាំទប់ស្កាត់បញ្ហាឆ្អឹងផ្សេងៗ រួមទាំងជំងឺពុកឆ្អឹង។ វាក៏ជាប្រភពដ៏ប្រសើរនៃជាតិប៉ូតាស្យូមដែលជួយបង្កើនដង់ស៊ីតេឆ្អឹង និងកាត់បន្ថយការបាត់បង់ជាតិកាល់ស្យូមតាមរយៈតម្រងនោមផងដែរ។
៣. សម្រួលដល់ការរំលាយអាហារ
នោះក៏ព្រោះតែផ្លែខ្នុរមានផ្ទុកសម្បូរទៅដោយជាតិសរសៃ dietary fiber ដែលជួយសម្រួលការរំលាយអាហារនិងទប់ស្កាត់អាការៈទល់លាមក។
៤. បង្កើនថាមពលរាងកាយតាមបែបធម្មជាតិ
ផ្លែខ្នុរមានផ្ទុកនូវជាតិស្ករធម្មជាតិ fructose និង sucrose ដែលផ្ដល់នូវអ្នកនូវថាមពលបន្ថែមភ្លាមៗ។
៥. ទប់ស្កាត់ជំងឺបេះដូង
នោះក៏ព្រោះតែផ្លែខ្នុរជាប្រភពដ៏ប្រសើរនៃវីតាមីន B6 ដែលមានប្រសិទ្ធិភាពកាត់បន្ថយកម្រិត homocystei ក្នុងឈាម។ Homocystein ជាសារធាតុដែលបង្កបញ្ហានៃជំងឺស្ទះសរសៃឈាមបេះដូង។
៦. បញ្ចុះសម្ពាធឈាម
ខ្នុរ ក៏មានផ្ទុកសម្បូរទៅដោយជាតិប៉ូតាស្យូមដែលជួយក្នុងការគ្រប់គ្រងកម្រិតនៃសម្ពាធឈាមមិនឱ្យឡើងខ្ពស់ខុសប្រក្រតី។ ហើយការរក្សាបាននូវសម្ពាធឈាមប្រក្រតីនឹងធ្វើឱ្យអ្នកជៀសផុតពីហានិភ័យនៃជំងឺបេះដូងដាច់សរសៃឈាមក្នុងខួរក្បាល និងជំងឺលើសសម្ពាធឈាម។
៧. ទប់ស្កាត់ជំងឺមហារីក
ខ្នុរ ជាប្រភពដ៏ប្រសើរនៃសារធាតុ phyto-nutrients ដែលមានប្រសិទ្ធភាពទប់ស្កាត់ជំងឺមហារីកតាមរយៈការកម្ចាត់រ៉ាឌីកាល់សេរីដែលបង្កជំងឺចេញពីរាងកាយ។
៨. ទប់ស្កាត់ជំងឺខ្វះគ្រាប់ឈាមក្រហម
ផ្លែខ្នុរមានផ្ទុកសម្បូរទៅដោយសារធាតុ folate និងជាតិដែកដែលចាំបាច់ក្នុងការរក្សាបាននូវកម្រិតអេម៉ូក្លូប៊ីន ហើយទប់ស្កាត់បញ្ហានៃជំងឺស្លេកស្លាំងដោយកង្វះជាតិដែក ឬជំងឺខ្វះគ្រាប់ឈាមក្រហម៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com