អន្តរជាតិ
ឥណ្ឌូណេស៊ី៖ គូស្នេហ៍រួមភេទមុនរៀបការ ប្រឈមមុខជាប់គុក៦ខែ
×
ដោយ៖ ងួន សុភាវត្តី
ឥណ្ឌូណេស៊ី ត្រៀមអនុម័តច្បាប់ព្រហ្មទណ្ឌថ្មីមួយដែលនឹងដាក់ទោសចំពោះការរួមភេទក្រៅអាពាហ៍ពិពាហ៍ និងមានការដាក់ពិន័យយ៉ាងតឹងរ៉ឹងដល់អ្នកដែលប្រមាថសេចក្តីថ្លៃថ្នូររបស់ប្រធានាធិបតី។ ប៉ុន្តែក្រុមសិទ្ធិមនុស្សយល់ថា សេចក្ដីស្នើច្បាប់នេះ បានរំលោភសិទ្ធិបុគ្គលរាប់លាននាក់ក្នុងប្រទេសអាស៊ីអាគ្នេយ៍មួយនេះ។
ឥណ្ឌូនណេស៊ី គឺជាប្រទេសដែលមានអ្នកកាន់សាសនាឥស្លាមច្រើនបំផុតរបស់ពិភពលោក។ ក្រៅពីឲស្លាម គេក៏ឃើញមានអ្នកកាន់សាសនាគ្រិស្ត ហិណ្ឌូ និងព្រះពុទ្ធមានតិចតួច។ ដោយសារឥទ្ធិពលសាសនាឥស្លាម ថ្មីៗនេះមានការសង្កេតឃើញថា ឥណ្ឌូណេស៊ីបានព្យាយាមវិវត្តខ្លួនទៅរកការប្រតិបត្តិសាសនាបែបអភិរក្សនិយមវិញ ដែលធ្វើឲ្យមានរឿងចម្រូងចម្រាសច្រើន។
ទីភ្នាក់ងារព័ត៌មាន Reuters បានស្រង់សម្ដីរបស់សមាជិកសភាបួនរូបមកកាន់ ថា ច្បាប់ព្រហ្មទណ្ឌថ្មីនេះនឹងត្រូវអនុម័តនៅសប្តាហ៍ក្រោយនេះ បន្ទាប់ពីសភានិងរដ្ឋាភិបាលប្រធានាធិបតី ចូកូ វីដូដូ ព្រមព្រៀងលើសេចក្តីព្រាងច្បាប់ចុងក្រោយនៅថ្ងៃទី១៨ ខែកញ្ញា។ ច្បាប់ព្រហ្មទណ្ឌថ្មីនេះនឹងជំនួសអោយច្បាប់ចាស់ដែលបន្សល់តាំងពីសម័យអាណានិគមហូឡង់មក។ ច្បាប់ថ្មីនេះ បង្ហាញពីឯករាជ្យភាពនិងភាពស្មោះត្រង់របស់ឥណ្ឌូណេស៊ី។
លោក Nasir Djamil អ្នកនយោបាយមកពីគណបក្ស Prosperous Justice Party បាននិយាយថា រដ្ឋត្រូវតែការពារពលរដ្ឋពីឥរិយាបទដែលផ្ទុយនឹងការគោរពព្រះដ៏ខ្ពស់បំផុត។ បើតាមអ្នកនយោបាយរូបនេះ មេដឹកនាំសាសនាទាំងអស់ ត្រូវបានសួរនាំពីយោបល់របស់ពួកគេរួចហើយទាក់ទងសេចក្ដីស្នើច្បាប់ថ្មី។
ក្រោមសេចក្ដីស្នើច្បាប់ថ្មីនេះ គូស្នេហ៍ដែលមិនទាន់រៀបការ ហើយរស់នៅជាមួយគ្នាដូចប្តីប្រពន្ធ អាចប្រឈមនឹងការជាប់ពន្ធនាគារ៦ខែ ឬត្រូវផាកពិន័យដល់ទៅ១០លានរូពី(៧១០ ដុល្លារអាមេរិក) ដែលជាប្រាក់ខែបីខែសម្រាប់ជនជាតិឥណ្ឌូណេស៊ីជាច្រើន។ ដំណើរការស៊ើបអង្កេតអាចចាប់ផ្ដើមបាន ប្រសិនបើមានបណ្ដឹងពីមេភូមិទៅកាន់ប៉ូលិស ហើយឪពុកម្ដាយជនសង្ស័យពីជំទាស់ទេនោះ។ ឪពុកម្ដាយ កូនៗ ឬប្ដីប្រពន្ធ ក៏អាចដាក់ពាក្យបណ្ដឹងបានដែរ។
ជាមួយគ្នានេះ សំណើច្បាប់ថ្មីនេះ ក៏មានចែងពីការជាប់ពន្ធនាគាររយៈពេល ៤ ឆ្នាំជាអតិបរមាសម្រាប់ស្ត្រីដែលបានរំលូតកូន ប្រសិនបើរកឃើញថា ការរំលូតនេះ មិនមែនមកពីសង្គ្រោះបន្ទាន់ ឬការរំលោភសេពសន្ថវៈ។ វានេះក៏បានចែងបន្ថែមពីការពិន័យជាលុយលើអ្នកដែលលើកកម្ពស់ការពន្យាកំណើតនិងទោស៦ខែសម្រាប់ការពិភាក្សាពីឧបករណ៍លរំលូតដោយគ្មានការអនុញ្ញាត។
ក្រោយពីមានការគ្រោងនឹងអនុម័តច្បាប់ថ្មីនេះ មនុស្សមួយចំនួនក៏បានប្រតិកម្មប្រឆាំងផងដែរ។ វិទ្យាស្ថានកំណែទម្រង់យុត្តិធម៌ព្រហ្មទណ្ឌដែលជាអង្គការក្រៅរដ្ឋាភិបាលបាននិយាយថា ប្រជាជនឥណ្ឌូណេស៊ីរាប់លាននាក់ អាចនឹងត្រូវជាប់អន្ទាក់ដោយច្បាប់ថ្មីនេះ។ ការសិក្សាបានបង្ហាញថាក្មេងជំទង់ឥណ្ឌូណេស៊ីចំនួន ៤០ ភាគរយបានចូលរួមសកម្មភាពផ្លូវភេទមុនពេលរៀបការ៕
© រក្សាសិទ្ធិដោយ thmeythmey.com