អន្តរជាតិ
លោក មូន ចេអ៊ីន នឹងយកបញ្ហាឧបទ្វីបកូរ៉េទៅជជែកជាមួយលោក ត្រាំ ប្រធានាធិបតីអាមេរិក ដូណាល់ ត្រាំ និងលោកប្រធានាធិបតីកូរ៉េខាងត្បូង មូន ចេអ៊ីន
× ជំនួបរវាងប្រធានាធិបតីកូរ៉េខាងត្បូង មូន ចេអ៊ីន និងប្រធានាធិបតីអាមេរិក ដូណាល់ ត្រាំ នឹងត្រូវធ្វើឡើងនាទីក្រុងញូវយ៉កនៅថ្ងៃទី២៣ ខែកញ្ញា ដោយផ្ដោតលើការកសាងសន្តិភាពនៅលើឧបទ្វីបកូរ៉េ និងបញ្ហាពាណិជ្ជកម្មរវាងទីក្រុងសេអ៊ូល និងតូក្យូ។ នេះបើតាមការប្រកាសរបស់ការិយាល័យប្រធានាធិបតីកូរ៉េខាងត្បូងនៅថ្ងៃទី១៩ ខែកញ្ញា។
មេដឹកនាំកូរ៉េខាងត្បូង មូន ចេអ៊ីន និងមេដឹកនាំអាមេរិក ដូណាល់ ត្រាំ នឹងមានកិច្ចប្រជុំក្រៅផ្លូវការមួយបន្ទាប់ពីកិច្ចប្រជុំមហាសន្និបាតអង្គការសហប្រជាជាតិនៅទីក្រុងញូវយ៉ក ។ នេះបើយោងទៅតាមការលើកឡើងរបស់លេខាប្រធានាធិបតីកូរ៉េខាងត្បូង លោក Choi Jong-kun ។ ចំណែកវេលា និងទីកន្លែងជាក់ស្ដែង ដែលត្រូវពិភាក្សា ភាគីកូរ៉េខាងត្បូងមិនទាន់ច្បាស់ទេ គឺត្រូវធ្វើការគិតគូរជាមួយភាគីអាមេរិកជាមុនសិន។
យោងតាមការចុះផ្សាយរបស់ទីភ្នាក់ងារសារព័ត៌មាន Yonhap នៅក្នុងជំនួបទ្វេភាគីលើកទី៩ នេះ លោក មូន នឹងនាំយកបញ្ហាមួយចំនួនយកទៅពិភាក្សាជាមួយលោកត្រាំ ដូចជា ការរំសាយអាវុធនុយក្លេអ៊ែរកូរ៉េខាងជើង ការកសាងសន្តិភាពនៅលើឧបទ្វីបកូរ៉េ ការពង្រឹងមិត្តជាមួយទីក្រុងវ៉ាស៊ីនតោន និងភាពតានតឹងរវាងទីក្រុងសេអ៊ូល និងតូក្យូជាដើម។
បន្ថែមពីនេះទៅទៀត នៅក្នុងសេចក្តីប្រកាសសារព័ត៌មានកូរ៉េខាងត្បូង នាយកនៃក្រុមប្រឹក្សាសន្តិសុខជាតិ Chung Eui-yong បានគូសបញ្ជាក់ថា រដ្ឋាភិបាលទីក្រុងសេអ៊ូលនឹងខិតខំក្នុងការពង្រឹងកិច្ចសហប្រតិបត្តិការអន្តរជាតិ ដើម្បីសម្រេចឲ្យបានជោគជ័យនៅការរំសាយអាវុធនុយក្លេអ៊ែរលើឧបទ្វីបកូរ៉េ និងការកសាងសន្តិភាពជាយូរអង្វែង។
យ៉ាងណាមិញ បច្ចុប្បន្ននេះក្រុងវ៉ាស៊ីតោនកំពុងគាបសង្កត់ឲ្យទីក្រុងសេអ៊ូលបង់លុយលើបញ្ហាសន្តិសុខនៅតំបន់ច្រកសមុទ្រHormuz ប្រទេសអ៊ីរ៉ង់ ដែលពាក់ព័ន្ធនឹងនាវាដឹកប្រេងឆ្លងកាត់តំបន់នោះ។ ប៉ុន្តែមន្ត្រី កូរ៉េខាងត្បូង ជឿថាអាមេរិកនឹងមិនលើកបញ្ហានេះមកនិយាយទេ។
សូមបញ្ជាក់ថា ជំនួបរវាងមេដឹកនាំកូរ៉េខាងត្បូង និងអាមេរិកនៅពេលនេះគឺជាលើកដំបូងហើយ ចាប់តាំងពីមានការឈ្លោះគ្នារវាងជប៉ុន និងកូរ៉េខាងត្បូង ដែលធ្វើឲ្យអាមេរិកឈឺក្បាលយ៉ាងខ្លាំង ព្រោះតែខ្លាចបាត់បង់នូវកិច្ចសហប្រតិបត្តិការត្រីភាគីរបស់ខ្លួន៕
Tag:
អាមេរិក
កូរ៉េខាងត្បូង
ដូណាល់ ត្រាំ
មូន ចេអ៊ីន
© រក្សាសិទ្ធិដោយ thmeythmey.com