អន្តរជាតិ
រដ្ឋាភិបាលឥណ្ឌាប្រកាសហាមឃាត់ការលក់បារីអេឡិចត្រូនិកនៅលើទីផ្សារ រូបភាព AP
×
ដោយ៖ ងួន សុភាវត្តី
កាលពីថ្ងៃទី១៨ ខែកញ្ញា រដ្ឋាភិបាលឥណ្ឌា បានប្រកាសហាមមិនអោយមានការចែកចាយបារីអេឡិចត្រូនិកនៅលើទីផ្សារខ្លួន។ ការប្រកាសហាមឃាត់នេះ ជាវិធានការការពារសុខភាពប្រជាជន ស្របពេលដែលយុទ្ធនាការប្រឆាំងបារីអេឡិចត្រូនិក កំពុងកើនឡើងជុំវិញពិភពលោក ទោះជាបារីប្រភេទនេះ មិនសូវបង្កផលប៉ះពាល់ដូចបារីផលិតចេញពីថ្នាំជក់ក្ដី។
រដ្ឋាភិបាលឥណ្ឌាបានប្រកាសហាមឃាត់ការផលិត ការនាំចូល និងការចែកចាយបារីអេឡិចត្រូនិចក្នុងទីផ្សារ។ ការប្រកាសហាមឃាត់នេះ ក៏ធ្វើឡើងប៉ុន្មានថ្ងៃបន្ទាប់ពីអាមេរិកបានហាមឃាត់មិនអោយមានបារីអេឡិចត្រូនិដែលមានរសជាតិផ្សេងៗលើទីផ្សារ ព្រោះជាដើមហេតុនៃជំងឺសួត និងការស្លាប់នៅសហរដ្ឋអាមេរិក។
រដ្ឋមន្ត្រីហិរញ្ញវត្ថុឥណ្ឌាលោកស្រី Nirmala Sitharaman បានប្រាប់អ្នកសារព័ត៌មានថា ការហាមឃាត់នេះ ជាការសម្រេចចិត្តមួយដែលបានគិតគូរពីផលប៉ះពាល់នៃបារីអេឡិចត្រូនិចដែលអាចកើតមានលើយុវជនឥណ្ឌា។ លោកស្រីបន្ថែមថា បារីអេឡិចត្រូនិចបានប៉ះពាល់ដល់សុខភាពមនុស្សកាន់តែខ្លាំងឡើង ដោយសារពួកគេប្រើប្រាស់វាជាឧបករណ៍ទាន់សម័យជាជាងការប្រើប្រាស់ដើម្បីជំនួសអោយបារីធម្មតាទៅវិញ។
ការហាមឃាត់បារីអេឡិចត្រូនិក នឹងត្រូវអនុវត្តជាបទបញ្ជាប្រតិបត្តិការ ដែលជាធម្មតាត្រូវបានប្រើប្រាស់ដើម្បីចេញសេចក្ដីសម្រេចបន្ទាន់អ្វីមួយពេលសភាឈប់សម្រាក។ ប៉ុន្តែការហាមឃាត់នេះអាចត្រូវបានលុបចេញវិញ ប្រសិនបើអ្នកតាក់តែងច្បាប់ឥណ្ឌាបោះឆ្នោតប្រឆាំងនៅកិច្ចប្រជុំនៅខែវិច្ឆិកាខាងមុខ។
ក្នុងសេចក្តីព្រាងការហាមឃាត់ដែលផ្សាយទីភ្នាក់ងារព័ត៌មាន Reuters ក្រសួងសុខាភិបាលឥណ្ឌាបានដាក់សំណើហាមឃាត់ការប្រើប្រាស់បារីអេឡិចត្រូនិចនៅទីសាធារណៈ ដើម្បីធានាថា បារីអេឡិចត្រូនិកនឹងមិនប៉ះពាល់ដល់ក្មេង និងយុវជនឥណ្ឌាឡើយ។
បារីអេឡិចត្រូនិក ជាប្រភេទបារីមិនត្រូវបានដុតទេ តែវាប្រើប្រាស់កម្តៅដើម្បីបំលែងសារធាតុរាវអោយកា្លយទៅជាចំហាយវិញ។ ជាធម្មតា ចំហាយនៃបារីអេឡិចត្រូនិកបានបាត់សារធាតុជាង៧០០០ដែលមានក្នុងបារី ប៉ុន្តែសារធាតុដែលបាត់បង់នេះត្រូវបានជំនួសវិញដោយសារធាតុមួយចំនួនដែលអាចប៉ះពាល់ដល់សុខភាព។
បទបញ្ជារបស់រដ្ឋាភិបាលឥណ្ឌា បានទីផ្សារបារីអេឡិចត្រូនិកដែលមានអតិថិជន១.៣លាននាក់។ រដ្ឋមួយចំនួននៅឥណ្ឌាបានហាមឃាត់បារីអេឡិចត្រូនិក មុនពេលការប្រកាសនេះទៅទៀតប៉ុន្តែការចែកចាយនៅតែបន្តកើតមានដោយការលក់តាមអ៊ីនធឺណិត។ បើយោងតាមអង្គការសុខភាពពិភពលោក ឥណ្ឌាគឺជាប្រទេសប្រើប្រាស់ផលិតផលថ្នាំជក់ធំទីពីរ តែវាបានសម្លាប់មនុស្សប្រមាណជាង៩សែននាក់ជារៀងរាល់ឆ្នាំដែរ៕
© រក្សាសិទ្ធិដោយ thmeythmey.com