លោក ទៀ សីហា ស្នើឱ្យពលរដ្ឋបោសដីនិងសំរាមមុខផ្ទះឱ្យស្អាត ដើម្បីទីក្រុងស្អាត

ជាតិ

សង្គមជាតិ

លោក ទៀ សីហា ស្នើឱ្យពលរដ្ឋបោសដីនិងសំរាមមុខផ្ទះឱ្យស្អាត ដើម្បីទីក្រុងស្អាត

21, Sep 2019 , 3:30 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ បញ្ហាកកស្ទះប្រព័ន្ធលូក្នុងក្រុងសៀមរាប តែងកើតជារឿយៗរាល់ពេលភ្លៀងធ្លាក់ខ្លាំងម្ដងៗ ដែលធ្វើឱ្យផ្លូវមួយចំនួនធំក្នុងក្រុងទេសចរណ៍នេះលិចទឹក។ ចំណុចនេះអភិបាលខេត្តសៀមរាបលោក ទៀ សីហា មើលឃើញថាបណ្ដាលមកពីកំណកដីនិងសំរាម ដែលកកនៅតាមលូនានាដែលធ្វើឱ្យទឹកហូរមិនទាន់កម្លាំងទឹកភ្លៀង។

ជាថ្មីម្ដងទៀត អភិបាលខេត្តសៀមរាប លោក ទៀ សីហា បានបង្ហាញកង្វល់ផ្ទាល់ខ្លួនទៅនឹងបញ្ហានៃការធ្លាក់ចុះចំនួនទេសចរក្នុងខេត្តមួយនេះ។ យ៉ាងណាលោកថា ការធ្លាក់ចុះនេះសម្រាប់តែខេត្តសៀមរាបទេ ជារួមទេសចរនៅកម្ពុជាបន្តមានកំណើនគួរឱ្យកត់សម្គាល់។ ការធ្លាក់ចុះទេសចរនៅសៀមរាប បានធ្វើឱ្យប៉ះពាល់ជីវភាពអ្នករកស៊ីមួយចំនួនធំ។

សូមស្ដាប់ការលើកឡើងរបស់លោក ទៀ សីហា ក្នុងពិធីប្រគល់រង្វាន់លើកទឹកចិត្តដល់សិស្សនិន្ទេសA និងនិន្ទេសB នៅសាលប្រជុំសាលាខេត្ត នាថ្ងៃទី២០ កញ្ញា ឆ្នាំ២០១៩៖

នៅចំពោះមុខសិស្សានុសិស្សនិទ្ទេសA និងសិស្សនិទ្ទេសB ប្រមាណជាង២០០នាក់ លោក ទៀ សីហា បានឱ្យដឹងថា វិស័យសំខាន់ៗក្នុងខេត្តសៀមរាបក្រៅពីទេសចរណ៍ នោះគឺវិស័យសាធារណការ។ ទាក់ទងនឹងវិស័យសាធារណការ លោកអភិបាលខេត្តវ័យក្មេងរូបនេះពន្យល់ថា បច្ចុប្បន្នអាជ្ញាធរកំពុងប្រឹងប្រែងរៀបចំហេដ្ឋារចនាសម្ព័ន្ធក្នុងខេត្តនេះឱ្យបានល្អប្រសើរសម្រួលការធ្វើចរាចរណ៍ដល់ប្រជាពលរដ្ឋ។ យ៉ាងណាក៏ដោយ លោក ទៀ សីហា ពន្យល់ថាការងារនេះត្រូវការចូលរួមពីប្រជាពលរដ្ឋផងដែរ។ លោកអភិបាលខេត្តអំពាវនាវឱ្យប្រជាមានការបោសដីនិងសំរាមមុខផ្ទះឱ្យបានស្អាត ហើយនេះជាស្មារតីចូលរួមជាមួយអាជ្ញាធរក្នុងការធ្វើឱ្យទីក្រុងសៀមរាបមានសោភ័ណភាពស្អាត។

លោក ទៀ សីហា លើកឡើងយ៉ាងដូច្នេះថា៖«...អំពាវនាវទទូចយ៉ាងខ្លី សូមប្អូនៗមេត្តាចូលរួមជាមួយអាជ្ញាធរខេត្តក្នុងការផ្សព្វផ្សាយក៏ដូចជាដល់អាណាព្យាបាលទាំងអស់ថា មិនចាំបាច់ធ្វើអ៊ីទេ គ្រាន់តែនៅខាងមុខផ្ទះរបស់ប្អូន មេត្តាកាយដី សំរាមទាំងអស់ចាក់ចូលក្នុងធុងសំរាមតែប៉ុណ្ណឹងក្នុងការចូលរួម ព្រោះឥឡូវភ្លៀងនៅតាមផ្លូវវាហូរយកសំរាមចាក់ទៅក្នុងលូទាំងអស់ ហើយការកកស្ទះផ្លូវទាំងអស់កំពុងលិចទឹក គឺយើងឃើញជាក់ស្ដែងហើយ យើងបានចុះកាយឃើញតែសំរាមនិងដី...»៕