សង្គមអន្តរជាតិ
អន្តរជាតិ
ស្ត្រីអាមេរិកម្នាក់អាចយកកូនសេះ ជិះយន្តហោះជាមួយខ្លួន
× ស្ត្រីអាមេរិកម្នាក់ បានធ្វើដំណើរជាមួយកូនសេះមួយក្បាលនៅលើជើងហោះហើរ American Airlines។ បើតាមការផ្សាយរបស់ TODAY អាជ្ញាធរ បានអនុញ្ញាតឲ្យមានករណីពិសេសបែបនេះ ក្រោមហេតុផលជំនួយគាំទ្រផ្នែកអារម្មណ៍។
ក្នុងដំណើរចេញពីអាកាសយានដ្ឋានក្រុង Chicago ឆ្ពោះទៅក្រុង Omaha នាង Abrea Hensley បានយកកូនសេះឈ្មោះ Flirty ទៅតាមខ្លួន។ ស្ត្រីវ័យ៣៣ឆ្នាំរូបនេះ មានប្រតិកម្មជាមួយសត្វឆ្កែ ហើយថែមកើតស្ត្រេស ក្រោយការប៉ះទង្គិចផ្លូវចិត្ត។ នារយៈពេលចុងក្រោយនេះ កូនសេះ Flirty បានក្លាយជាភ្នែកមួយដ៏សំខាន់ក្នុងជីវិតរបស់ Hensley។
Flirty ដែលមានអាយុ៧ឆ្នាំ តែងតែក្រើនរំលឹក Hensley ឲ្យលេបថ្នាំតាមពេលកំណត់ និងផ្តល់ការគាំទ្រផ្លូវចិត្ត។ «Flirty និងខ្ញុំ បានហោះហើរលើមេឃ។ នេះជាបទពិសោធន៍ដ៏អស្ចារ្យ ហើយខ្ញុំរៀនសូត្របានយ៉ាងច្រើន។ Flirty ពីមហិមាខ្លាំងណាស់ ដោយគេអាចរ៉ាប់រងបានគ្រប់យ៉ាង»។ នេះជាការរៀបរាប់របស់ Hensley នៅលើ Instagram របស់ខ្លួន។
នៅលើយន្តហោះ មិនមានកន្លែងអង្គុយសម្រាប់សេះនោះឡើយ ប៉ុន្តែវាក៏មិនបង្កការទើសទែងសម្រាប់អ្នកដំណើរផ្សេងទៀតនោះដែរ។ «ខ្ញុំបានធ្វើដំណើរជាមួយអ្នកកាសែតម្នាក់ ហើយគាត់បានជួយសម្រួលដើម្បីឲ្យ Flirty ឈរនៅមុខកៅអី ដែលអាចឲ្យអ្នកដំណើរចេញចូលបាន»។ នេះជាការរៀបរាប់របស់ Hensley។
តាមពិតទៅ Hensley ចង់ធ្វើដំណើរតាមរថយន្តជាមួយកូនសេះតូចរបស់ខ្លួន ប៉ុន្តែនាយកដ្ឋានដឹកជញ្ជូនអាមេរិក (DoT) កាលពីខែសីហា កន្លងមក បានអះអាងថា ពួកគេអនុញ្ញាតឲ្យពួកគេធ្វើដំណើរតាមយន្តហោះ ដោយផ្អែកលើមូលហេតុនៃការគាំទ្រផ្នែកស្មារតី។
អ្នកនាំពាក្យក្រុមហ៊ុន American Airlines បានបញ្ជាក់ថា ការអនុញ្ញាតពិសេសបែបនេះ គឺផ្អែកទៅលើស្ថានភាពជាក់ស្តែងជាពិសេសមាឌរបស់សត្វ ដែលមិនត្រូវធំពេកនោះឡើយ។ គាត់បានបន្ថែមថា៖ «យើងទទួលស្គាល់ពីសារសំខាន់របស់សត្វដែលដើរតួជាជំនួយផ្នែកស្មារតី ដូចជាឆ្មា ឆ្កែ និងសេះជាដើម ហើយករណីនេះ ក៏មិនសំដៅពិសេសតែលើជនពិការនោះឡើយ»។
បើតាម Hensley នាងមិនត្រូវបានតម្រូវឲ្យទិញសំបុត្រថែមនោះឡើយ ពីព្រោះ Flirty ត្រូវបានចាត់ទុកដូចជាសម្ភារពេទ្យ ដែលត្រូវនាងយកទៅតាមខ្លួនជាប់រហូត៕
© រក្សាសិទ្ធិដោយ thmeythmey.com