ONE Championship
កីឡាជាតិ
ជាតិ
ជ័យជម្នះ មិនទាន់គ្រប់គ្រាន់ទេសម្រាប់ Bibiano Fernandes នៅសង្វៀន ONE: CENTURY
×![]()
ដោយ: ថ្មីៗ
អត្ថបទ៖ ស៊ីធី
Bibiano Fernandes ឬ ហៅថា «The Flash» ទទួលបានការលើកទឹកចិត្តចំពោះការប្រកួតលើកទី៤ទល់នឹង Kevin Belingon រហស្សនាម «The Silencer» ពីសំណាក់អ្នកគាំទ្រនៅ ONE Championship។ បើទោះឈ្នះខ្សែក្រវាត់ក្រោយផ្តួលគូប្រជែងហ្វីលីពីននៅសង្វៀន ONE: A NEW ERA ប៉ុន្តែកីឡាករសញ្ជាតិប្រេស៊ីលរូបនេះ មិនទាន់ពេញចិត្តចំពោះការប្រកួតកន្លងនោះឡើយ។ 
កីឡាករមកពីក្លិប Team Lakay បានយល់ព្រមជួបBelingon ជាថ្មីម្ដងទៀតនៅសង្វៀន ONE: CENTURY នាថ្ងៃអាទិត្យទី ១៣ ខែ តុលា ខាងមុខ ដើម្បីជម្រះមន្ទិលសង្ស័យដោយបញ្ជាក់ថារូបគេពិតជាស្ដេចពិតប្រាកដលើសង្វៀនក្នុងប្រភេទទម្ងន់ខាងលើជាប្រវត្តិសាស្ត្រនៅសង្វៀន ONE។
«The Flash» បានថ្លែងថា ៖«មានមនុស្សជាច្រើនចង់ឃើញការប្រកួតនេះ។ នេះជាហេតុផលមួយ។ ការប្រកួតនេះមិនមែនសម្រាប់ខ្ញុំទេ ប៉ុន្តែសម្រាប់អ្នកគាំទ្រ។ ខ្ញុំផ្ដល់ការប្រកួតនេះដល់អ្នកគាំទ្រទាំងអស់គ្នា»។ Fernandes គូសបញ្ជាក់ទៀតថា៖«បើសិនការប្រកួតលើកទី៣ មិនបញ្ចប់ដោយភាពមន្ទិលសង្ស័យទេ ខ្ញុំមិនទទួលការប្រកួតជាមួយ Kevin ទៀតឡើយ ប៉ុន្តែ ខ្ញុំជឿថា ជនជាតិហ្វីលីពីនជាច្រើនមិនសប្បាយចិត្ត និង ចង់ឃើញការប្រកួតម្ដងទៀត។ អូខេ មនុស្សជាច្រើនចង់ឃើញ ខ្ញុំសុខចិត្តស្របតាម»។
អតីតម្ចាស់ជើងឯកជីជិតស៊ូពិភពលោកសញ្ជាតិប្រេស៊ីល បានផ្ដួល «The Silencer» ត្រឹមទឹកទី១ ប៉ុណ្ណោះក្នុងការប្រកួតកាលឆ្នាំ ២០១៦ ប៉ុន្តែ រងបរាជ័យវិញនៅខែវិច្ឆិកាឆ្នាំ ២០១៨។ យ៉ាងណាក្ដី កាលខែ មីនាឆ្នាំ ២០១៩ កីឡាករហ្វីលីពីនរបូតខ្សែក្រវាត់លើកីឡាករមកពីប្រេស៊ីល។ ដូច្នេះទើបមានការប្រកួតដើម្បីដណ្ដើមខ្សែក្រវាត់ឡើងនៅថ្ងៃទី ១៣ តុលា ខាងមុខក្នុងគោលបំណងអបអរដល់ការរៀបចំព្រឹត្តិការណ៍ប្រកួតលើកទី១០០ របស់ស្ថាប័នពិភពលោកONE Championship។
«Kevin ជាគូប្រជែងដ៏ស្វិតស្វាញ។ គេមានជំនាញល្អ ជាពិសេសដៃស្ដាំ និង ការទាត់លឿនៗ ដែលមានស្រាប់។ ខ្ញុំត្រូវតែវ៉ៃឲ្យមានភាពវ័យឆ្លាត ព្រោះគេពូកែចាប់ និង រត់បានល្អ។ គេរង់ចាំឱកាស ដើម្បីឆក់កណ្ដាប់ដៃ និង ជើងបានលឿន។ យ៉ាងណាក្ដី ខ្ញុំជឿជាក់ថា ខ្ញុំច្បាស់ជាល្អជាងមិនខាន»។ បុរសវ័យ ៣៩ ឆ្នាំមកពីប្រេស៊ីលបញ្ជាក់បែបនេះ។
កីឡាករដដែលរៀបរាប់ទៀតថា ៖«ខ្ញុំសប្បាយចិត្តដែលអាចប្រកួតលើកទី៤។ ខ្ញុំបាននិយាយខ្លួន ឯងថា ខ្ញុំត្រូវអត់ធ្មត់ និង អាចបញ្ចប់រូបគេបាន»។ ទោះជាយ៉ាងណា Fernandes ត្រូវតែរៀបចំគម្រោងដើម្បីការប្រកួតដ៏ធំនេះនៅឯទីលាន Ryogoku Kokugikan។
«ហេតុផលដែលអ្នក និងខ្ញុំ ជួបគ្នាជាថ្មីពេលនេះ គឺដើម្បីផ្ដាច់ចិត្តអ្នកគាំទ្រ។ យើងនឹងប្រកួតគ្នាដ៏អស្ចារ្យបំផុត។ ខ្ញុំនឹងវ៉ៃអ្នក ហើយអ្នកវ៉ៃខ្ញុំ។ ពិតជាវាគ្មានបញ្ញាទេសម្រាប់ខ្ញុំ ប៉ុន្តែកុំមកទីនេះដើម្បីរត់។ ខ្ញុំជឿជាក់ថា អ្នកគាំទ្រនឹងស្រលាញ់ការប្រកួតរបស់យើង»។ «The Flash» សង្កត់ធ្ងន់ដូច្នេះ។
ONE: CENTURY ជាការប្រកួតគុនចម្រុះលំដាប់ពិភពលោកមិនធ្លាប់មានក្នុងប្រវត្តិសាស្ត្រ។ ក្នុងនោះមានការប្រកួតដណ្ដើមខ្សែក្រវាត់ ជាច្រើនដូចជាវគ្គផ្ដាច់ព្រ័ត្រ World Grand Prix Championship ក្នុង៣ប្រភេទទម្ងន់ផ្សេងគ្នា ហើយមានគូប្រកួតជើងឯកពិភពលោក ប៉ះជើងឯកពិភពលោក។
កុំភ្លេចតាមដាន កម្មវិធីកក្រើកមិនធ្លាប់មានគម្រប់១០០លើកនៃការរៀបចំការប្រកួតរបស់ស្ថាប័ន ONE Championship ត្រូវបានដាក់ឈ្មោះថា ONE: CENTURY។ ONE CENTURY នឹងរៀបចំឡើងនៅថ្ងៃទី ១៣ តុលា ខាងមុខនឹងផ្សាយបន្តផ្ទាល់ចាប់ពីម៉ោង ៩ យប់តទៅ (ម៉ោងកម្ពុជា) តាមរយៈ https://www.facebook.com/ONEChampionship/ , ONE Super App និង YouTube: https://www.youtube.com/user/OneFCMMA។
© រក្សាសិទ្ធិដោយ thmeythmey.com
