ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
សិស្សនិទ្ទេសA កែវ ពន្លឺ នៃខេត្តឧត្តរមានជ័យ ប្តេជ្ញារៀនឲ្យបានខ្ពស់ ដើម្បីរំដោះខ្លួនចេញពីភាពក្រីក្រ
22, Sep 2019 ,
10:59 pm
រូបភាព
×
ដោយ:
ភ្នំពេញ៖ យុវជន កែវ ពន្លឺ គឺជាសិស្សនិទ្ទេសA តែម្នាក់គត់ នៅក្នុងខេត្តឧត្តរមានជ័យ សម័យប្រឡង ថ្ងៃទី១៩ ខែសីហា ឆ្នាំ២០១៩។ ជាកូនកសិករក្រីក្រនៅជាយដែនថៃ កែវ ពន្លឺ អះអាងថា ភាពក្រីក្រ មិនបានរារាំងបំណងរបស់លោកឲ្យក្លាយជាសិស្សពូកែបានឡើយ តែផ្ទុយទៅវិញ វាបានជំរុញលោកឲ្យកាន់តែខំប្រឹងសិក្សា ដើម្បីរំដោះខ្លួនឲ្យផុត ពីជីវភាពដ៏លំបាកទាំងនេះ។
ជាបន្តសូមស្តាប់ជីវព័ត៌មាន ដែលរៀបចំដោយ លោក រ៉ឹម ភារី នៃសារព័ត៌មានថ្មីៗ ដូចតទៅ៖
«ខ្ញុំសង្ឃឹមថា ថ្ងៃណាមួយ បើខ្ញុំរៀនឲ្យខ្ពង់ខ្ពស់ នោះខ្ញុំនឹងលែងក្រហើយ»។ នេះជាប្រយោគដ៏ខ្លីរបស់យុវសិស្ស កែវ ពន្លឺ សិស្សនិទ្ទេសA ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី១៩ ខែសីហាឆ្នាំ២០១៩។
លទ្ធផលដ៏ល្អនេះ បានធ្វើឲ្យយុវជនកូនកសិករក្រីក្រ វ័យ១៩ឆ្នាំរូបនេះ រំភើប និងមានមោទកភាពក្រៃលែង។ យុវជន កែវ ពន្លឺ បានបរិយាយប្រាប់សារព័ត៌មានថ្មីៗយ៉ាងដូច្នេះ៖ «នៅពេលខ្ញុំបានជាប់និទ្ទេសA ខ្ញុំមានអារម្មណ៍សប្បាយចិត្ត និងរំភើបយ៉ាងខ្លាំងសម្រាប់លទ្ធផលមួយនេះ។ ហើយក៏បានធ្វើឲ្យឪពុកម្តាយខ្ញុំ សប្បាយចិត្តជាងខ្ញុំទៀត ព្រោះ គាត់រំភើបដែលបានជួយខ្ញុំទាំងលំបាករហូតមក។ គាត់បានឃើញលទ្ធផលមួយនេះ គាត់ថា មិនស្តាយដែលបានជ្រោមជ្រែងខ្ញុំតាំងពីតូចមក។ ខ្ញុំក៏មានមោទកភាពសម្រាប់ផ្តល់ឲ្យពួកគាត់ដែរ»។
រូបថតពីហ្វេសប៊ុកយុវសិស្ស កែវ ពន្លឺ
មានម្តាយជាអ្នកធ្វើស្រែ និងឪពុកជាកម្មករសំណង់ ពន្លឺ ជាកូនច្បងក្នុងចំណោមបងប្អូន៣នាក់។ គ្រួសារមួយនេះ កំពុងរស់នៅក្នុងផ្ទះខ្ទម ដែលបាំងភ្លៀងខ្យល់ដោយជញ្ជាំងក្តារ ដំបូលប្រក់ស្បូវ ស្ថិតក្នុងភូមិទួលក្រសាំង ឃុំត្រពាំងប្រាសាទ ស្រុកត្រពាំងប្រាសាទ។
មានទឹកមុខស្រពាប់ស្រពោនបន្តិច ពេលកំពុងរៀបរាប់ពីជីវភាពគ្រួសារ ប៉ុន្តែ កែវ ពន្លឺ នៅតែអាចបញ្ចេញសំឡេងដ៏មុះមុត និងក្លៀវក្លារបស់ខ្លួន។ យុវជន កែវ ពន្លឺ បញ្ជាក់ថា បើទោះជីវភាពរបស់លោកលំបាកមែន តែលោកមិនដែលចាត់ទុកវាជាឧបសគ្គនៃការសិក្សាឡើយ តែផ្ទុយទៅវិញ យុវជនរូបនេះ បែរជាបានចាត់ទុកភាពក្រីក្រ ជាការជំរុញទឹកចិត្តក្នុងការសិក្សារៀនសូត្រ រហូតទទួលបានជោគជ័យជាបន្តបន្ទាប់។ បើតាម កែវ ពន្លឺ រូបគេ ជាសិស្សពូកែគណិតវិទ្យាលេខ២ ប្រចាំខេត្តនៅថ្នាក់ទី៩ និងជាសិស្សពូកែរូបវិទ្យាលេខ៤ ប្រចាំខេត្ត នៅថ្នាក់ទី១២។ ហើយចុងក្រោយនេះ រូបគេ បានក្លាយជាសិស្សនិទ្ទេសA តែម្នាក់គត់ប្រចាំខេត្តឧត្តរមានជ័យ ក្នុងសម័យប្រឡងបាក់ឌុបដ៏តានតឹងនេះ។
កែវ ពន្លឺ បានអះអាងថា បើតាមជីវភាពរបស់លោកបច្ចុប្បន្ន លោកប្រាកដជាលំបាកខ្លាំងនៅក្នុងការសិក្សា ប៉ុន្តែរូបគេ ទទួលបានជំនួយពីអង្គការអភិវឌ្ឍន៍ប្រជាជនសម្រាប់ប្រទេសកម្ពុជា(DPC) ដែលបានផ្តល់កន្លែងស្នាក់នៅ និងអាហារឧបត្ថម្ភមួយចំនួន។ យុវជន កែវ ពន្លឺ បានអះអាងយ៉ាងដូច្នេះថា៖«សម្រាប់លុយរៀនគួរ ពេលខ្លះខ្ញុំសុំលោកគ្រូអ្នកគ្រូរៀន គាត់អត់យកលុយទេបង។ បើនិយាយពីម្ហូបអាហារ ខ្ញុំនៅកន្លែងអង្គការមួយ មួយខែចូលរួមចំណែក៤៥,០០០រៀល និងអង្ករ១០គីឡូក្រាម តែខែខ្លះម្តាយឪពុកខ្ញុំអត់បានឲ្យទេ គេក៏យោគយល់ខ្លះ។ តាមពិតទៅ បើពឹងលើគ្រួសារខ្ញុំទាំងស្រុងមក មិនអាចទៅមុខបានទេ ព្រោះអីខ្វះខាតខ្លាំង តែបានប្រធានអង្គការខាងលើជួយផ្គត់ផ្គង់ទំនុកបម្រុងខ្លះដែរ សម្រាប់រៀនគួរផ្សេងៗ»។
រូបថត ផ្តល់ដោយលោក ស៊ិន កាន គ្រូបង្រៀននៅវិទ្យាល័យ ហ៊ុន សែន ត្រពាំងប្រាសាទ
ក្រៅពីរៀនពូកែហើយនោះ យុវជនរូបនេះ ក៏មានសីលធម៌ល្អផងដែរ។ លោក ស៊ិន កាន គ្រូបង្រៀននៅវិទ្យាល័យ ហ៊ុន សែន ត្រពាំងប្រាសាទ និងជាគ្រូបន្ទប់ថ្នាក់ផងនោះ បានកោតសរសើរយុវជនរូបនេះ មិនដាច់ពីមាត់ថា មានចរិតល្អ រួសរាយរាក់ទាក់ និងចេះជួយអ្នកដទៃ។ លោកបានបញ្ជាក់យ៉ាងដូច្នេះថា៖«ការវិនិច្ឆ័យលើបុគ្គលលក្ខណៈរបស់គាត់ គឺគាត់ល្អត្រង់ថា គាត់ជាប្រធានថ្នាក់ទី១២A។ គាត់មានទំនាក់ទំនងល្អជាមួយមិត្តភក្តិក្នុងថ្នាក់។ គាត់រួសរាយរាក់ទាក់ មានសីលធម៌ល្អ ព្រោះមានការទទួលស្គាល់ពីលោកគ្រូ អ្នកគ្រូ ទាំងអស់នៅក្នុងសាលា។ គាត់ក៏ជាប្រធានយុវជនប្រចាំសាលា គាត់តែងដឹកនាំយុវជនទាំងអស់ ដែលជាសមាជិកទៅជួយសហគមន៍ ឬការងារមនុស្សធម៌ ដូចជាកាកបាទក្រហមអ៊ីចឹង។ ពេលមានគ្រោះអគ្គិភ័យ… កែវ ពន្លឺ បានដឹកនាំរៃអង្គាសជាថវិកា ជួយសិស្សដែលជួបការលំបាក»។
កែវ ពន្លឺ៖ ដើម្បីរំដោះខ្លួនចេញពីភាពក្រីក្របាន មានតែសិក្សាតែមួយគត់
កើតក្នុងត្រកូលកសិករក្រីក្រ ជីវិតពន្លឺ ហាក់មានចែងចាំង ដូចឈ្មោះគេបណ្តើរៗហើយ។ និទ្ទេសA ដែល ពន្លឺ ទទួលបាន នឹងផ្តល់ភាពងាយស្រួលដល់រូបគេ ក្នុងការដាក់អាហារូបករណ៍នៅសាកលវិទ្យាល័យ ឬប្រឡងទៅរៀននៅបរទេស។ លោកជំរុញឲ្យសិស្សក្រីក្រផ្សេងទៀត សូមកុំឲ្យបាក់ទឹកចិត្ត និងកុំបន្ទោសឪពុកម្តាយ តែត្រូវតែតស៊ូរៀនសូត្រឲ្យបានខ្ពស់ខ្ពស់ ដើម្បីវិលទៅជួយកែប្រែជីវភាពគ្រួសារវិញ។
សិស្សនិទ្ទេស A រូបនេះ រៀបរាប់យ៉ាងដូច្នេះ៖«ទោះបីយើងក្រីក្រ យើងត្រូវតែខំប្រឹងសិក្សា។ អ្វីដែលអាចផ្លាស់ប្តូរជីវភាពគ្រួសារ និងជីវិតរបស់យើងបាន មានតែមួយគត់ គឺចំណេះវិជ្ជា។ កុំបាក់ទឹកចិត្ត សម្រាប់ប្អូនផ្ទាល់ ប្អូនមិនដែលបាក់ទឹកចិត្តចំពោះជីវភាពរបស់ប្អូនទេ។ ភាពក្រីក្រ ខ្ញុំអត់បន្ទោសក្រុមគ្រួសារ ឬបន្ទោសមកពីអ៊ីចេះអ៊ីចុះទេ។ ខ្ញុំដឹងថា ភាពក្រីក្រ កើតចេះមកពីយើងមិនចេះដឹង។ ខ្ញុំត្រូវតែពុះពារ និងជម្នះ ដោយខិតខំសិក្សាឲ្យបានជោគជ័យ ដើម្បីផ្លាស់ប្តូរជីវភាពរបស់ខ្ញុំឲ្យបាន ព្រោះយើងក្រហើយ បើយើងខ្សោយទៀត គឺអត់មានអ្វីជាទីពឹងទេ»។
កែវ ពន្លឺ បង្ហាញគន្លឹះសំខាន់ៗមួយចំនួន ដើម្បីរៀនឲ្យពូកែ
ក្រោយទទួលបានជោគជ័យជាបន្តបន្ទាប់ក្នុងការប្រឡងហើយនោះ យុវសិស្ស កែវ ពន្លឺ បានបង្ហាញគន្លឹះខ្លះៗ ដើម្បីឲ្យការសិក្សាទទួលបានលទ្ធផលល្អប្រសើរ។ លោកបានអះអាងថា កត្តាដែលធ្វើឲ្យលោកទទួលបានលទ្ធផលល្អបែបនេះ គឺបណ្តាលមកពីការប្រឹងប្រែងបង្រៀនរបស់លោកគ្រូអ្នកគ្រូ ការគាំទ្រពីឪពុកម្តាយ និងមនុស្សនៅជុំវិញខ្លួន ព្រមទាំងការខិតខំរៀនដោយខ្លួនឯង។
យុវជន កែវ ពន្លឺ ពន្យល់បន្ថែម៖ «យើងត្រូវចេះកាលវិភាគរៀនដោយខ្លួនឯង។ យើងត្រូវស្គាល់ខ្លួនឯងឲ្យបានច្បាស់ថា យើងពូកែមុខវិជ្ជាអី យើងខ្សោយមុខវិជ្ជាអ្វី។ សម្រាប់ខ្ញុំ មុខវិជ្ជាណាដែលខ្ញុំខ្សោយ មុខវិជ្ជាហ្នឹង ខ្ញុំរៀនមុនគេ ហើយបន្ថែមម៉ោងរហូតដល់២ម៉ោង។ មុខវិជ្ជាដែលយើងគិតថា ចេះហើយ យើងយកវាដាក់ក្រោយគេ ព្រោះ ពេលខ្លះ សុខភាពយើងមិនសូវល្អ យើងងាយនឹងងងុយដេកច្រើន ចឹងពេលយប់ជ្រៅយើងអាចដេកក៏បាន ព្រោះយើងចេះហើយ ទោះយើងមិនបានរៀនច្រើន ក៏យើងអាចទៅរួចដែរ។ មួយទៀត ត្រូវស្រាវជ្រាវលំហាត់ថ្មីៗឲ្យបានច្រើន និងចងចាំរូបមន្ត។ យើងត្រូវរកដៃគូរ(មិត្តភក្តិ) ដែលខ្ពស់ជាងយើង ដើម្បីសាកសួរពួកគេ ព្រោះយើងមិនសូវហ៊ានសួរគ្រូទេ តែបើយើងសួរមិត្តភក្តិ យើងនឹងចាំរហូត»។
សម្រាប់សិស្សដែលចេះស្ទាក់ស្ទើរ លោក កែវ ពន្លឺ អះអាងថា ពួកគេគួរតែចាប់ផ្តើមពីការធ្វើលំហាត់តូចៗ មុននឹងផ្តើមធ្វើលំហាត់ធំៗ និងស្រាវជ្រាវពីប្រភពផ្សេងទៀត ដូចជា ការសិក្សាពីយូធូប និងហ្វេសប៊ុកជាដើម។ យុវជន កែវ ពន្លឺ ចង់ក្លាយវិស្វករម្នាក់ទៅថ្ងៃអនាគត ដើម្បីចូលរួមចំណែកជួយអភិវឌ្ឍន៍វិស័យវិស្វកម្មនៅកម្ពុជា ឲ្យមានការរីកចម្រើនបន្ថែមទៀត៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
កែវ ពន្លឺ
ឧត្តរមានជ័យ
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
1 សប្តាហ៍
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
5 ថ្ងៃ
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
7 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
3 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
5 ថ្ងៃ
អត្ថបទពេញនិយមបន្ថែម