ជាតិ
នយោបាយជាតិ
អ្នកនាំពាក្យក្រសួងយុត្តិធម៌ ថា លោក សម រង្ស៊ី «ចង់ផ្តួលរាជានិយម»
× ការប្រើសម្តីប៉ះពាល់ដល់អង្គព្រះមហាក្សត្ររហូតដល់ទៅពីរ-បីលើកជាប់ៗគ្នា ធ្វើឲ្យលោក គឹម សន្តិភាព អ្នកនាំពាក្យក្រសួងយុត្តិធម៌ សន្និដ្ឋានថា លោក សម រង្ស៊ី និង បក្សពួក មិនត្រឹមតែមានបំណងផ្តួលរំលំរដ្ឋាភិបាលនោះទេ តែថែមទាំងចង់ផ្តួលរំលំរបបរាជានិយមផងដែរ។
លោក គឹម សន្តិភាព សរសេរលើទំព័រហ្វេសប៊ុក នៅថ្ងៃទី២២ ខែកញ្ញា ឆ្នាំ២០១៩ យ៉ាងដូច្នេះថា៖«...នេះជាសកម្មភាពប៉ុនប៉ងធ្វើរដ្ឋប្រហារមួយយ៉ាងពិតប្រាកដ។ អំពើខាងលើនេះ គឺជាការប្រឆាំងនឹងរដ្ឋធម្មនុញ្ញ និងច្បាប់កម្ពុជាយ៉ាងធ្ងន់ធ្ងរ ដែលកំណត់បានជាបទឧក្រិដ្ឋ ត្រូវផ្តន្ទាទោសក្នុងបទឧក្រិដ្ឋធ្ងន់ធ្ងរអាចអស់មួយជីវិត តាមក្រមព្រហ្មទណ្ឌកម្ពុជា»។
អ្នកនាំពាក្យរូបនេះ សង្កត់ធ្ងន់ថា ស្ថាប័នមានសមត្ថកិច្ចគ្រប់លំដាប់ថ្នាក់ រួមទាំងស្ថាប័នអយ្យការ មានកាតព្វកិច្ចអនុវត្តច្បាប់យ៉ាងតឹងរ៉ឹង ដើម្បីបំផ្លាញនិងកម្ទេចចោលនូវរាល់ផែនការ និងអង្គការចាត់តាំងទាំងឡាយណា ដែលគាំទ្រសកម្មភាពខុសច្បាប់របស់លោក សម រង្ស៊ី និង បក្សពួក។
លើសពីនេះ ក្រសួងយុត្តិធម៌ ទើបនឹងបានចេញសេចក្តីប្រកាសព័ត៌មាន ដោយព្រមានពីការជាប់ទោសយ៉ាងធ្ងន់ធ្ងរ ចំពោះអ្នករៀបចំគម្រោងធ្វើរដ្ឋប្រហារ និង អ្នកចូលរួម។ ក្រសួងយុត្តិធម៌ លើកពីផ្លូវច្បាប់ថា មេដឹកនាំដែលដាក់ផែនការធ្វើរដ្ឋប្រហារ ត្រូវជាប់ពីបទឧបឃាត ដោយត្រូវផ្តន្ទាទោសពី ១៥ឆ្នាំ ទៅ ៣០ឆ្នាំ ហើយបើជនល្មើស ជាមន្ត្រីរាជការសាធារណៈ ដែលរាប់ទាំងកងកម្លាំងប្រដាប់អាវុធផងនោះ ត្រូវជាប់ទោសអស់មួយជីវិត។
ក្រសួងយុត្តិធម៌ បន្ថែមថា ចំពោះអ្នកដែលចូលរួមគាំទ្រឬអនុវត្តផែនការធ្វើរដ្ឋប្រហារ ត្រូវជាប់ពីបទរួមគំនិតក្បត់ជាតិ ដោយត្រូវផ្តន្ទាទោស ៥ឆ្នាំ ទៅ ១០ឆ្នាំ ហើយបើជាមន្ត្រីរាជការសាធារណៈ ត្រូវជាប់ទោស ពី១០ឆ្នាំ ទៅ ២០ឆ្នាំ។
យ៉ាងណាក៏ដោយ គេ ពុំទាន់បានឮលោក សម រង្ស៊ី ប្រកាសពីការផ្តួលរំលំរបបរាជានិយមនោះទេ តែលោក បានប្រកាសត្រង់ៗថា លោក នឹងដឹកនាំកម្លាំងមហាជន ដើម្បីផ្តាស់ប្តូររដ្ឋាភិបាល នៅពេលលោក មកដល់កម្ពុជា នៅថ្ងៃទី៩ ខែវិច្ឆិកា ឆ្នាំ២០១៩៕
Tag:
សម រង្ស៊ី
គឹម សន្តិភាព
© រក្សាសិទ្ធិដោយ thmeythmey.com